الدايت: أكل طقّة ولا تلاتة ولا سبعة؟
كتب: أحمد حسين
أول ما فكرت بس أصرّح لحد من قرايبي أو أصحابي إني بفكر أعمل دايت، إلا ولازم أسمع منه جملة: ”ماتاكلش وجبة واحدة في اليوم أو تلاتة كُبار، كُل وجبات كتير بس في كل وجبة كُل شوية صغيرين، كده إنت هتشبع وفي نفس الوقت هتهضم كويس ومش هتأثر على الدايت“ مع بعض التجويد والتحابيش اللي تطلبت إن أحاول أعرف هل الكلام ده صحيح ولا لأ؟
مبدأ الاعتماد على الوجبات الصغيرة الموزعة على مدار اليوم ده يحظى بشعبية كبيرة بين المتخصصين في الدايت، يمكن كمان أكتر من موضوع التلات وجبات الأساسية ده (فطار – غداء – عشاء). الموضوع كمان منتشر بين الرياضيين واللي بيلعبوا كمال أجسام على أمل إنهم كمان وهما في ”الجيم“ بيحطوا أوزان إضافية علشان يحرقوا السعرات الحرارية اللي بياخدوها من وجبات الأكل على مدار اليوم.
في فرضية بتقول إن الجسم البشري أكثر قدرة على إدارة الأكل اللي بييجي له بشكل متقطّع وكمية صغيرة بشكل أفضل من الأكل اللي بييجي له كطوفان مفاجئ من السعرات الحرارية. بعض الدراسات دعمت الفرضية دي، وقالت إنه التمثيل الغذائي (Metabolism) والشهية ومستويات الكوليسترول والسكر، كلهم بيستفيدوا من الجرعات الثابته القليلة من السعرات الحرارية أكتر من استفادتهم من الوجبات التلاتة الأساسية.
لكن في دراسة حديثة اتعملت عن نفس الموضوع بتقول عكس الكلام ده. من حيث فقدان الوزن وتجنب المرض، إنت لازم تاكل عدد وجبات قليل، وفقًا لـ ”د. فالتر لونجو“، مدير معهد جامعة جنوب كاليفورنيا ومدير المعهد الإيطالي لعلم الأورام، إن الأمر لما يتعلق بتوقيت الوجبات والحد من السعرات الحرارية، فلا شك إن هدفك لازم يكون إنك تاكل وجبات وكميات طعام أقل لأسباب لا تعد ولا تحصى.
د. لونجو كمان، عنده قاعدة بيقول فيها إن الناس غالبًا ما بيفترضوا إنهم قللوا بالفعل من عدد السعرات الحرارية اللي بتكون موجودة في أكلهم، يعني لو هما بياكلوا حاجة فيها 500 سعر حراري فهما بيفتكروا إنه فيه 250 بس عشان كده منطق الوجبات كتيرة العدد قليلة الكميات والسعرات مش عملي. كما إن مشغولياتنا ودوامة الحياة اليومية بتلهينا عن إننا نركز في كم السعرات الحرارية اللي بنتناولها كل يوم. ده طبعًا غير إن الأكل الحلو اللي غالبًا بنحب نستهلكه بيكون عبارة عن وجبات سريعة، والوجبات دي غالبًا ما بتكون غير صحية تمامًا، ومفيش مجال للأسف للاستغناء عنها بشكل كامل وعمل وجبات صحية لضيق الوقت يعني.
يعني من الآخر كده، لو فرضنا إني هاكل تلات وجبات في اليوم، هل ده معناه إني كده هاكل كتير؟ الإجابة غالبًا هتكون أيوه، بس الموضوع هيأثر على السعرات الحرارية اللي بتدخل جسمك كل يوم. في دراسة اتعملت سنة 2013 في جامعة كورنيل بتقول إن لما الناس بيتوقفوا عن أكل وجبة من الوجبات اللي متعودين ياكلوها في اليوم، ده بيخليهم يفقدوا عدد كبير من السعرات الحرارية اللي المفروض يتناولوها.
بمعنى إيه؟ بمعنى إن كل جسم المفروض بيتعود على عدد معين من السعرات الحرارية، سواء بقى بتاكل وجبات كتير أو بتاكل تلات وجبات أو وجبتين في اليوم، كل اللي عليك إنك تحافظ على عدد السعرات الحرارية اللي بتستهلكها يوميًا، ولو ده هيكون صعب عليك، فالأفضل إنك تتابع مع طبيب حمية أو دكتور تخسيس يعني.
المصادر
