وادي الحيتان: تاريخ التطور يمر بأرض مصر!
كتبت: مها طــه
من زمن بعيد جدًا، من ملايين السنين، شكل الأرض كان مختلف تمامًا عن اللي تعرفه. الصحراء كانت محيط. القارات اللي نعرفها كانت كلها قارة واحدة كبيرة اسمها “بانجيا”، وشوية بشوية بدأت القارات تنفصل، والحيوانات المختلفة تظهر وتختفي، وندخل في أزمنة انقراضات وبعدها أزمنة ازدهار، عصور كتير مرت على الأرض.
من حوالي 40 مليون سنة، وفي زمن الأيوسين في العصر الجيولوجي الثالث، كانت بداية ظهور الثدييات الحديثة عشان تحل محل الديناصورات اللي انقرضت في نهاية العصر اللي قبله (العصر الطباشيري). وعلى مدار ملايين السنين دي جفت المياه وبدأت تظهر الصحاري واختفت حيوانات عملاقة احتلت الأرض في زمانها ومفضلش منها غير حفريات تحكي التاريخ.
اعرف أكتر| منصوراصورس: صدفة تحل لغز 25 مليون سنة!
وادي الحيتان: قصة الحيتان التي عاشت على أرض مصر
سنة 1902، تم اكتشاف أول حفريات الهياكل العظمية للحيتان في منطقة وادي الحيتان، وكانت من أوائل الحفريات في العالم كله. على مدى 80 سنة بعدها، البحث في المنطقة كان قليل إلى حدٍ ما بسبب صعوبة الوصول ليها، لكن في التمانينات ومع تطور سيارات الدفع الرباعي اللي تقدر توصل وتتوغل في الصحراء، بدأ البحث ياخد شكل أكثر جدية.
وفي يوليو سنة 2005، تم تصنيف منطقة وادي الحيتان في محافظة الفيوم من اليونسكو كموقع للتراث العالمي. متحف بديع مفتوح بيضم مئات الحفريات القديمة لأسلاف الحيتان اللي عاشت في المنطقة دي من ملايين السنين، عشان يحكي تاريخ تطور الحيتان، وظهور الأنواع الحالية منها، بعد ما كانت أسلافها حيوانات أرضية (برية) عملاقة.
نوع أسلاف الحيتان الموجود في وادي الحيتان اسمه “archaeoceti” وده شكل قريب من الثدييات البحرية اللي بنشوفها النهاردة مع فرق مهم وواضح من الناحية التشريحية، وهو وجود أرجل خلفية، وده وقت ما ظهر كان بمثابة تغير ملفت للنظر في تاريخ السجل الأحفوري، ومعناه إن الحيتان اللي نعرفها، بدأت في الأصل كحيوانات برية.
وعشان نفهم أكتر أهمية الحفريات في العموم، لازم نقول إن سلم التطور حقيقي كبير، وإن الكائنات الحية الموجودة حاليًا على الأرض، في منهم كتير قرايب، بتجمعهم أسلاف مشتركة، وكتير من الأسلاف دي حاليًا منقرضة.
اعرف أكتر| مفاهيم خاطئة عن التطور: ”إحنا ماكناش قرود!“
قبل اكتشاف أسلاف الحيتان في وادي الحيتان، كان الاعتقاد الراسخ إن الحيتان مرتبطة بآكلات اللحوم شبه الذئاب، نظرًا لوجود تشابه في شكل الأسنان، وكمان وجود أسلاف مشتركة ما بينهم اسمها “Mesonychid”. ولسنين استمر الاعتقاد ده، لحد سنة 2005، لما اكتشف فريق أمريكي – فرنسي من الباحثين الحلقة المفقودة في تاريخ تطور الحيتان، باكتشافهم للسلف المشترك ما بين الحيتان وأقرب أقاربهم اللي عايشين على الأرض حاليًا وهي أفراس النهر.
وادي الحيتان .. الشاهد على تاريخ الأرض
السلف الجديد الموجود في وادي الحيتان، وضع الحيتان في مجموعة تصنيفية مختلفة وبتضم أقارب غير متوقعة إطلاقًا، زي الجمال والخنازير والزرافات. صحيح الكلام ده يبدو غريب لكن دراسة الأحافير بتتم بشكل يسمح بدراسة الحمض النووي الخاص بيها وشكلها التشريحي وصفاتها، اللي بتتنقل من الأسلاف دي، وبالتالي يمكن اثبات وجود رابط ما بين سلف معين ومجموعة من الحيوانات اللي تطورت عنه حتى بعد انقراضه كنوع.
اعرف أكتر| الطفرة الوراثية وحكاية الحصان أبو 5 صوابع!
وعلى الرغم من إن حفريات وادي الحيتان مش الأقدم على الإطلاق في العالم، إلا إن عددها الهائل الموجود في نفس الموقع، والطريقة اللي تم بيها حفظ العظام والهياكل دي بشكل جيد، لدرجة إن بعض محتويات المعدة في بعض الأحافير دي كانت سليمة لحد وقت الكشف عنها، وده سمح لكتير من العلماء بالدراسة والفحص بشكل جيد جدًا، وعشان كدة كان تصنيف اليونسكو لوادي الحيتان كمنطقة للتراث العالمي، نابع من الأهمية الكبيرة للمكان بالنسبة لعلم الحفريات والتطور.
لكن أهمية وادي الحيتان كموقع للتراث العالمي جه كمان بسبب تنوع الحفريات في المكان، واللي منها بيوصل طوله لحوالي 21 متر، ومش بس حفريات الحيتان، لكن كمان لحيوانات مختلفة في مراحل مبكرة من التطور، زي أسماك القرش والتماسيح والسلاحف وحورية البحر (sea cow).
وادي الحيتان من أجمل المناطق اللي ممكن نزروها في بلدنا، لو حابب تستمتع بمناظر طبيعية جميلة، وتتفرج على جمال وسحر خفي وبعيد عن زحمة وتلوث القاهرة والمدن الكبيرة، وبالمرة كمان تشوف محمية وادي الريان بكل ما فيها من جمال ومناظر خلابة، صحيح الوصول لوادي الحيتان ممكن يكون صعب شوية، لكنه حقيقي يستاهل التجربة.
عدد زوار وادي الحيتان سنويًا بيوصل تقريبًا لألف زائر، لكن الزوار دول بيكون في انتظارهم مغامرة رائعة، ومنطقة بتحكي تاريخ بيمتد لملايين السنين، وكفاية بس إنك تقف وتتخيل إن المكان ده يومًا ما كان بحر واسع عميق مليان بوحوش بحرية وكائنات برية انقرضت، وسابت وراها هياكلها العظمية عشان تحكيلك تاريخها اللي فات.
المصادر: unesco atlasobscura worldheritagesite nationalgeographic paleocene
