ليه  ”الديتوكس“ ما الفنيك موجود؟!

كتبت: يارا كمال 

جسمك تعبان وعندك مشاكل صحية كتير؟ الديتوكس هو الحل. يا ترى الكلام ده مظبوط؟ أول مرة أسمع عن الموضوع ده كان من فترة، لما لاحظت إن واحدة صاحبتي بتشرب حاجات عجيبة: خيار ونعناع مع بعض، سبانخ وجرجير، ليمون وبرتقان، اللي هي حاجات أنا ماقدرش أتخيّل طعمها مع بعضها أساسًا. ولما سألتها قالت لي إن ده الديتوكس، وهو عبارة عن نظام غذائي بيخرّج السموم من الجسم.

الديتوكس هو الحل فعلًا؟

أنظمة الديتوكس بتختلف، لكن عادةً بتعتمد على فترة صيام بييجي وراها دايت قاسي بيعتمد على خضار طازة (ني مش مطبوخ) والفاكهة والعصاير والميه. وفيه بعض أنظمة الديتوكس بتعتمد على الأعشاب والمكملات الغذائية مع الحقن الشرجية عشان الأمعاء تفضى.

بصوا فعليًا مفيش أي أرضية علمية صلبة واقف عليها موضوع الديتوكس ده، لا بالنسبة لفقدان الوزن أو بالنسبة للصحة. المفروض إن الديتوكس بيغسل الجسم من السموم. أولًا، الجسم فيه آليات لإزالة السموم من جواه بنفسه، من خلال الكبد والكلى والجهاز الهضمي. مفيش حاجة بتقول إن شرب العصاير دي بيحسّن أداء الأعضاء دي لإزالة السموم، فالفكرة العامة مش دقيقة أصلَا. ثانيًا بقى، اللي بيقدّم النظام ده عمره ما بيقول سموم إيه اللي هينضّف الجسم منها، ففكرة إنه يقول لك السموم بشكل عام وغامض كده بتبقى جذّابة أكتر!

يعني لو أنت بتاكل أكل صحي ومتوازن فيه فاكهة وخضار وحبوب كاملة وبروتين خالي من الدهون، فنظام الأكل ده هيقلل وزنك وهيقلل خطر إصابتك بأمراض كتيرة، وجسمك مش هيبقى محتاج جو الديتوكس ده. أما لو نظامك الغذائي أصلًا أي كلام، فشرب عصاير الديتوكس لمده أسبوع مش هيعمل لك حاجة، لو أنت معتمد على الديتوكس بس، جزء من وزن الميه في جسمك هينزل لإنك مابتتناولش سعرات حرارية كتيرة، لكن مجرد ما ترجع تاكل عادي، وزنك هيزيد تاني. زائد إن تقليل السعرات الحرارية بشكل كبير في أنظمة الديتوكس بيسبب انهيار العضلات والتعب الشديد والصداع والتهيّج والتشنج والإسهال.

طب ليه بعد الديتوكس بنحس إن صحتنا اتحسنت؟

نظام الديتوكس مابيبقاش فيه الأكل الجاهز اللي بيحتوي على دهون صلبة وسكر مضاف. كون أصلًا إن الواحد يبطّل الأكل اللي فيه سعرات حرارية ومش مغذي كذا يوم ده هيحسسه إنه أحسنk زائد إن الإيحاء ليه دور وبيأثّر على الجسم.

يعني مرة جامعة ييل عملت دراسة، والباحثين أدّوا الناس ميلك شيك وقالوا لناس منهم إن اللي بيشربوه ده فيه 620 سعر حراري، ولناس تانية إن اللي بيشربوه فيه 140 سعر حراري، برغم إن كل الميلك شيك كان نفسه للاتنين، الناس اللي شربوا الميلك شيك على إن سعراته كتير، الهرمونات المحفّزة للجوع عندهم قلت، لكن الناس اللي شبروه على إن سعراته قليلة، فضل مستوى هرمونات الجوع عندهم عالي.

وده نقدر نقيسه على موضوع الديتوكس، كمان فيه ناس لازم تعمل حاجة قوية أوي عشان تغيّر طريقة أكلها وتبدأ نظام غذائي جديد، زي ما تقرر تغيّر حياتك يوم راس السنة، مع إنه ممكن تغيّرها في أي يوم يعني. يعني الموضوع نفسي أكتر، وهو على العموم مفيد لو داخل في نظام أكل متوازن مفيهوش عناصر ناقصة.

من الآخر، لو عايزين تعملوا ديتوكس، وروا نظام الأكل ده للدكتور بتاعكم واتأكدوا إنه مش مضر ومش ناقص ومش هيتسبب في أي آثار جانبية. فيه أنظمة ديتوكس بتقلل البروتين أوي أو بتتطلب الصيام وده ممكن يسبب التعب، كمان الصيام على المدى الطويل ممكن يسبب نقص في الفيتامينات والمعادن (الصيام اللي في أنظمة الأكل دي).، وتطهير القولون اللي هو جزء من أنظمة الديتوكس ممكن يسبب التشنج والانتفاخ والقيء والغثيان، وممكن كمان يسبب الجفاف.

المصدر:
mayo clinic  time.com