حيوانات مش فوتوشوب.. 10 من أغرب الحيوانات في الطبيعة!
كتبت: يارا كمال
خيال الإنسان عمره ما هيعدي الحقيقة حد معين. هتفضل دايما الطبيعة البطل أولًا وأخيرًا. المرة دي عندنا مجموعة من الحيوانات اللي لما تشوفها هتفتكرها معمولة فوتوشوب من كذا حيوان، بس في الحقيقة، الحيوانات دي حقيقة مش خيال.
10 من أغرب الحيوانات في الطبيعة
1. التنين الشائك:
ده نوع من السحالي اللي بتعيش في أستراليا وبس. بالإضافة لإنك تحس إنه طالع من فيديو جيم، النوع ده من السحالي بيتغذى على النمل بس، ممكن في اليوم الواحد يتغذى على المئات من النمل. طول التنين الشائك حوالي 20 سم، وبيعيش لمدة تصل لـ20 سنة.
2. فراشة الصقر الطنان:
ماتبقاش فاهم دي فراشة ولا طائر، لكنها نوع من الحشرات بيحمل صفة من الطيور الطنانة، شكلها يوحي بإنها طائر راكب على جسم عثة أو العكس. النوع ده يعتبر من الحشرات المهاجرة صيفًا، ممكن تلاقيها في أي مكان في نصف الكرة الأرضية الشمالي، بالذات في المناطق الدافئة.
3. نملة الباندا:
طبعًا سبب التسمية واضح من الصورة، لكن الحقيقة نملة الباندا مش نملة اصلًا، وبالرغم من شكلها اللي يشبه النمل، إلا إنها تعتبر نوع من الدبابير، صحيح لسعته مش قوية أوي لكنها برضة مؤلمة.
4. جمبري المانتيس:
ده كمان زي نملة الباندا، اسمه جمبري وهو مش جمبري، لكنه بينتمي لعائلة المفصليات القشرية، فهو قريب من الجمبري والكابوريا وجراد البحر. جمبري المانتس من أكتر أنواع الحيوانات المثيرة لاهتمام العلماء، سواء من حيث قوته أو سرعته أو قدراته البصرية. ويكفي نقول إنه بيتمتع بأكثر العيون تعقيدًا في مملكة الحيوان كلها، وعينه بتحتوي على 16 نوع من مستقبلات الضوء القادرة على تمييز الألوان، في حين إن الانسان عنده 3 بس.
5. السمكة الخفاش ذات الشفاه الحمراء:
شفايفها لونها أحمر عشان شكلها يختلف عن بقية أنواع السمك الخفاش عشان وقت التكاثر يميزوا بعض. تعتبر من أنواع الأسماك الغريبة، اللي بيظهر فيها عدد من التحورات اللي تخليها تتصرف بشكل يمكن ميشبهش تصرف الأسماك، زي مثلًا تحوّر الزعانف فيها بشكل يجعلها أقرب للأرجل، تقدر كمان تمشي عليها زي ما هو واضح في الصورة.
6. خنزير البحر الشبيه بالبالون:
لونه والأجزاء الزايدة اللي فيه كفاية إنه يطبق عليه اللقب عن جدارة. ده واحد من المخلوقات البحرية الغريبة اللي بتسكن قاع المحيط، الكائن ده من أنواع خيار البحر، لكن بالطبع شكله والزوائد بتاعته هي السبب في حصوله على لقب خنزير البحر.
7. سمكة الببغاء الزرقاء:
لونها الأزرق الفاقع ده هو أكتر ما يميزها، وبيخليها ما تبانش في البحر. السمكة دي بتعيش على الشعاب المرجانية في المياه الضحلة في المناطق الاستوائية من غرب المحيط الأطلنطي والبحر الكاريبي. طول السمكة بتراوح ما بين 30 – 75 سم وأقصى طول مُسجل ليها 1.2 متر.
8. فراشة بودل الفنزويلية:
تحس إن فيها فرو. شبه الكلاب مثلًا، إنت شايف إيه؟ طبعًا دي بالذات ممكن تفتكر إنها فوتوشوب، وعاملة كأنها ست شيك لابسة فرو، لكنها حقيقية جدًا. وعلى الرغم من إنها بتنتشر في المناطق ما بين شمال أمريكا ولحد الأرجنتين، إلا إن سبب تسميتها بالعثة الفنزويلية راجع لاكتشافها في فنزويلا لأول مرة عام 2009
9. سمكة الباكو:
بالرغم من إن شكلها يبدو كسمكة عادية خالص، إلا إن المبهر فيها هو أسنانها. السمكة دي بتتغذى على النباتات والطحالب والمكسرات والفواكه، وأحيانًا الأسماك الصغيرة لكن ده بس لما يقل الغذاء في البيئة. سمكة الباكو أسنانها بتشبه أسنان الإنسان بشكل كبير وده اللي بيخليها تقدر تطحن وتمضغ المكسرات اللي بتقع في النهر.
10. ظبي السايجا:
على الرغم من الاسم الشائع، إلا إنه من حيث التصنيف، بيُعتبر ظبي السايجا مرحلة وسطية بين الظباء والأغنام. طبعًا أهم ما يميزه هو الأنف اللي بتشبه الخرطوم إلى حدٍ ما، وبتوصل لحد الشفاه بشكل يخليها قريبة من حيوان المُدرع.
المصادر: wired rspb boredpanda fishbase thedodo planetsave wwf aquarium
