اضطراب فرط الحركة ونقص الانتباه .. بين المرض والميزة التطورية!
كتبت: مها طـه
تهل المدارس من هنا وتبدأ الشكوى المتكررة من الأمهات، ابني/بنتي مش قاعدين على بعضهم، لو كمل نص ساعة على الكتاب يبقى خير وبركة، طول الوقت حركة وتنطيط، تقوله ذاكر ميقدرش يركز عشان كل مخه في اللعب، وأول ما يلعب يبقى «هايبر» وكأن اللعب هيخلص! فللأسف وغالبًا كده طفلك هيقى بيعاني من مرض فرط الحركة ونقص الانتباه.
اضطراب فرط الحركة ونقص الانتباه ADHD
فرط الحركة ونقص الانتباه أحد أكثر الأمراض النفسية شيوعًا بين الأطفال والمراهقين، وعلى الرغم من وجود عوامل خارجية كتير ممكن تتسبب في الاضطراب ده، زي تعاطي الأم للكحوليات أو التدخين في أثناء الحمل أو حدوث إصابة في رأس الطفل، لكن على الأغلب بيكون السبب فيه الجينات.
اضطراب فرط الحركة ونقص الانتباه مرتبط بشكل كبير بجينات الطفل، ومعظم الجينات دي بتكون مرتبطة في الأساس بمراكز المكافأت في المخ، ودي اللي بتكون فيها مُستقبلات الدوبامين _هرمون النشوة_، واللي بيُعتبر مكافآة من المخ لما نعمل حاجة كويسة أو نقوم بمهمة ما.
في حالة اصطراب فرط الحركة ونقص الانتباه بيكون في خلل في نسب مُستقبلات الدوبامين، بتكون أقل من الطبيعي، وبالتالي الإحساس بالسعادة أو النشوة بيقل، وده اللي بيخليهم يزهقوا بسرعة من أي حاجة بيعملوها، مهما كانت مهمة أو ليها وقع جيد على الحالة النفسية.
بمقارنة مخ الطفل العادي بالطفل المصاب بمرض فرط الحركة ونقص الانتباه، عن طريق الرنين المغناطيسي، في العادي المخ في وقت الراحة بيكون شغال في الوضع الافتراضي (Default mode network)، وبيتحول في حالة وجود ما يتطلب التركيز لحالة إيجابية للقيام بالمهمة (task positive network).
أما في حالات المصابين بفرط الحركة نقص الانتباه بيكون الوضعين شغالين مع بعض في نفس الوقت، وده اللي بيخلي قدرتهم على التركيز أضعف من غيرهم. العلماء كمان لاحظوا إن القشرة الجبهية عند المصابين بالحالة دي بتكون أقل سُمكًا من الطبيعي، ودي المنطقة المسئولة عن الانتباه وتنظيم المشاعر وتقليل ردود الأفعال.
كنتيجة لحالة المخ دي، بيتم وصف دواء «ريتالين» عشان يساعد في زيادة تركيزات الدوبامين في الدم، وبالتالي زيادة رغبة المُستقبلات القليلة الموجودة في المخ للارتباط بالدوبامين، لكن الحقيقة الآثار الجانبية على المدى الطويل لتعاطي الدواء ده مش معروفة أوي. وخصوصًا إن ناس كتير من الطبيعين فكروا يتعاطوا الدواء ده من باب زيادة التركيز والنشاط والإحساس بالسعادة، على الأغلب هتكون إنت نفسك فكرت في كدة 😀
المثير في الموضوع إن عدد الحالات اللي تم تسجيلها بالاضطراب ده بيتزايد في السنين اللي فاتت بشكل ملحوظ، يعني مثلًا النسبة كانت بتزيد 5% كل سنة من 2003 لـ2011 في الولايات المتحدة بس، أما عندنا فللأسف مفيش إحصاء دقيق للأرقام، لكنه ببساطة بقى ملحوظ جدًا من شكوى كتير من الأمهات تزايد أعداد الأطفال اللي بيعانوا من الحالة دي.
اضطراب فرط الحركة ونقص الانتباه .. ميزة تطورية
من الناحية التطورية، التمتُع بفرط الحركة بالنسبة للصياد في المجتمع البدائي، كان معناه توفر فرص أكبر للبقاء على قيد الحياة، كل ما كانت الحركة أكتر كل ما كان الحصول على الطعام أكتر وكمان ده بيوفر حماية كبيرة للفرد وللصغار كمان.
اضطراب فرط الحركة وقلة الانتباه اتنقل من جيل لجيل كميزة تطورية بتساعد على البقاء، وفضل يتنقل مع الجينات بين الأفراد لحد دلوقتي، يعني مثلًا حاليًا اتعملت دراسة على مجموعة من القبائل في كينيا، وكانت فيها المقارنة بين الأشخاص اللي جيناتهم بتحمل الاضطراب ده بصورة ما، وبين الأشخاص العاديين، وكانت النتيجة إن حاملي الجينات دي بيقدروا يحصلوا على الطعام بشكل أفضل.
على الصعيد الدراسي بقى، فالدراسات اللي اتعملت على الطلبة اللي عندهم الاضطراب ده، لقوا إنهم بيكونوا مبدعين أكتر، لأنهم ببساطة بيكرهوا الروتين والعادي، دايمًأ بيدوروا على حاجة جديدة، بالفعل بيكون تفكيرهم برة الصندوق.
الفكرة الأساسية بقى اللي بتخلي الطلبة المصابين بالمتلازمة دي درجاتهم الدراسية أقل من العاديين، هي إن المدارس والتعليم النظامي نفسه مابيقدرش يحتوي رغباتهم واختلافهم عن أقرانهم، لأنهم بالفعل بيكونوا محتاجين نظام تعليم مختلف، وطبعًأ عندنا بالذات مفيش الكلام ده خالص، المدرس في المدرسة بالخرزانة والأم في البيت بالشبشب، وتقوله كسره وأنا اجبس ملكش دعوة!!
الدراسات أوضحت إن الاطفال أصحاب الاضطراب ده لما بيكبروا لو قدروا يشتغلوا في حاجة بيحبوها بينجحوا جدًا بالذات في العمل الإبداعي، أما بقى لو تم الالتفات لمهارتهم المختلفة من الصغر، فغالبًا بيحققوا النجاح والتفوق بشكل أكبر كمان، خصوصًا في المجالات اللي لا تتطلب روتين عمل مُعين ثابت.
اتعرفوا على رغبات أولادكم وافهموا طبيعتهم كويس، مش كلنا مخلوقين لنفس النظام، ولا ينفع معانا نفس طرق التعليم والتربية، شجعوا مهارات ولادكم المختلفة، شجعوهم يكتشفوا نفسهم، واياكم والشبشب كفاية الأجيال اللي خرجت من تحت إيديه.
المصادر: nhs webmd kidshealth cdc nimh
