أسمن فتاة في العالم: الخطوة الأولى لانتهاء مأساة استمرت لـ25 عامًا
كتبت: مها طــه
من حوالي 5 شهور كده، انتشرت صور لبنت بتعاني من بدانة مفرطة، اسمها إيمان أحمد عبدالعاطي، وعمرها حوالي 37 سنة. الكلام اللي انتشر عن إيمان كان محتواه عبارة عن مناشدة من أهلها عشان تحصل على العلاج المناسب لحالتها النادرة والصعبة. ومعاه انتشر الكلام عن إن إيمان هي أسمن فتاة في العالم!
أسمن فتاة في العالم .. معاناة استمرت 25 عامًا
إيمان وزنها حوالي 500 كيلوجرام، وده تسبب في إصابتها بجلطة أدت لصعوبة النطق ده غير إصابتها بصدمة تسممية في الجسم وده اللي منعها من الحركة تمامًا في خلال السنتين اللي فاتوا ، ده غير 25 سنة ماخرجتش من نطاق بيتها في إسكندرية وتحديدًا في منطقة سموحة.
إيمان بتعاني من خلل في الهرمونات نتيجة لاضطراب في الغدد وتم تشخيص مرضها بإنها مصابة بحالة «داء الفيل»، واللي بيُعتبر حالة مرتبطة بعدد من الأمراض المختلفة، واللي بتتسبب في انتفاخ في مناطق مختلفة من الجسم بشكل رهيب، زي حالة إيمان كده.
بدأت معاناة إيمان من الطفولة، حيث إنها عانت من بدانة مفرطة نتيجة لحالتها الطبية النادرة. وفقًا لأختها «شيماء»، إيمان خضعت لعملية جراحية في التمنينات في اليونان، لكن للأسف إيمان خرجت من العملية حالتها أسوأ، ومن وقتها تقريبًا اعتزلت الناس وفضلت في بيتها، والوضع ده استمر حوالي 25 سنة، لحد ما قرر أهلها مناشدة رئيس الجمهورية للتدخل لإنقاذ إيمان.
أسرة إيمان حاولوا مرارًا التواصل مع مستشفيات في اسكندرية عشان حالة إيمان، لكن للأسف كان دايمًا بيتم رفض الحالة نظرًا لوزنها الزايد، لإن المستشفيات غير مجهزة بمعدات وأجهزة طبية تقدر تتعامل مع حالة إيمان، لدرجة إنه حتى مفيش سرير ممكن يستوعب وزنها اللي بلغ مؤخرًا 500 كيلوجرام وبسببه حصلت على لقب أسمن فتاة في العالم.
بعد الدعوة اللي قامت بيها أسرة إيمان على الإنترنت وتوجهوا فيها بمناشدة للرئيس لإصدار قرار بنقل إيمان لمستشفى المعادي العسكري، استجاب طبيب هندي للدعوة وتواصل مع أخوها عبر الإنترنت ومن هنا كانت نقطة التحول في قصة إيمان.
رحلة أسمن فتاة في العالم من الاسكندرية إلى الهند
لفتت حالة إيمان نظر الطبيب الهندي «موفي لاكدوالا» جرّاح أمراض السمنة والمناظير، واللي تواصل مع أخوها لإحساسه بإنه يقدر يساعد إيمان على التغلب على مرضها النادر. وهنا بدأت مجموعة من المشاكل كانت أولها، إن الدكتور كان عاوزها تسافر الهند عشان يقدر يقوم بالعملية هناك وده بيحتاج لحصول إيمان على تأشيرة طبية، وده اللي تم رفضه.
«لاكدوالا» لم يتخلى عن إيمان وبالعكس قرر الاتصال بوزيرة الهند للشؤون الخارجية عبر تويتر، والحقيقة إن استجابة الوزيرة لمناشدة الطبيب كانت سريعة جدًا وعلى الفور أكدت على مساعدتها لإيمان وتم استخراج الفيزا الطبية اللازمة ليها وتسهيل الإجراءات.
بعد الحصول على الفيزا، كانت المشكلة التانية وهي نقل إيمان أصلًا من بيتها في اسكندرية لحد المطار، بالإضافة لمشكلة وجود طائرة مجهزة تسمح بحمل إيمان في وضعها ده – إيمان ماتقدرش تتحرك ولا تقعد ولازم تكون في وضع الاستلقاء على ظهرها- ولذلك توجهت قوات الحماية المدنية لشقة إيمان وقاموا بكسر حائط غرفتها وإخراجها من الشقة عن طريق رافعة (ونش)، ومنها إلى مطار برج العرب، حيث استقلت طائرة شحن مصرية متوجهة للهند.
في نفس الوقت اللي كانت فيه إيمان بتستعد لمغادرة مصر، كان الطبيب الهندي بيجهز المكان المخصص لاستقبال إيمان هناك في الهند، لكن المشاكل لم تنتهي بعد، حيث إن بعد وصول إيمان إلى الهند، وجد الطبيب وفريقه المعاون صعوبة في إجراء العملية لإيمان وهي بوزنها ده، ولذلك كان لازم تخس الأول لوزن معين.
بدأت إيمان رحلة العلاج في الهند من يوم 11 فبراير الماضي، وفي خلال أسبوعين بس تحقق إنجاز كبير في مشوارها، وهو إنها وللمرة الأولى من سنتين قدرت تقعد على السرير بدلًا من الاستلقاء، وده تحقق بعد ما فقدت حوالي 50 كيلو جرام من وزنها في خلال الفترة دي من خلال خضوعها لنظام غذائي معين أعده ليها الطبيب الهندي وفريقه معتمد على البروتين والألياف.
صرّح دكتور «سواتي سانجافي»، رئيس قسم إعادة التأهيل والعلاج الطبيعي في المستشفى الهندي لصحيفة «Indian Express» إنها في الأول كانت قادرة على تحريك إيديها ثم الذراعين، وبعدها بدأت في عملية التحكم في إيديها ثم الاعتماد على شخص ما عشان يساعدها تقوم تقعد، وأخيرًا بقت تقدر هي لوحدها تقوم تقعد بمجرد الارتكاز على شئ ما.
لأول مرة كمان منذ سنوات، إيمان تقدر تنام لمدة 8 ساعات متواصلة، لأنه بالطبع مع الوزن الزايد ده كله، كان النوم المتصل بيعتبر حلم بالنسبة لها. من المقرر إن أول عملية جراحية تخضع ليها إيمان هتكون بعد أسبوعين من دلوقتي، وفي سبيل الوصول لكده، بيعتمد الأطباء على نظام غذائي بيعتمد على نسبة عالية من البروتين والألياف لضمان النزول الممنهج في وزن إيمان، وبكده تقدر تدخل غرفة العمليات.
في خلال الفترة الجاية هنتابع معاكم تطورات حالة إيمان الصحية، مع رجاء خاص بالدعوة ليها ولكل الحالات المرضية المشابهة لحالتها.
