سلوك القطط: قطتي القطقوطة هارية البيت كسر وخرابيش!
كتبت: يارا كمال
من الصعب إنك تكون بتحب القطط والأنتيكات في نفس الوقت، لإن أكيد قطتك هتقضيها تمشية على كل الترابيزات والأرفف، وأكيد لما بتسمع صوت تكسير بتعرف مين الجاني.
القطط ليها شوية عادات غريبة كده: تحب تخربش الكنب والكراسي، تستخبي في أي مزنق في البيت، تتمشي على أي حاجة عالية، وأنت عليك تتحمل الخساير بقى. مش بتحب البوسي كاتس؟ استحمل بقى.
في الحقيقة، القطط برغم شقاوتها دي، إلا إنها مسلية، لدرجة إن فيه أكتر من 2 مليون فيديو للقطط على اليوتيوب، اتشافوا حوالي 26 مليار مرة.
السؤال هنا: هي ليه القطط بتعمل كده؟
الموضوع كله راجع لسلوك القطة الطبيعي. القطط بتاكل الحيوانات الأصغر، وفي نفس الوقت هي فريسة لآكلات اللحوم الأكبر منها حجمًا وعشان تتعايش في الحياة دي بتعتمد على السلوكيات الغريبة دي. طب دلوقتي أنا قطتي بجيب لها أكلها من السوبر ماركت، ليه محسساني إنها طالعة من فيديو لناشونال جيوجرافيك؟
الفكرة إن القطط مجبولة على السلوكيات دي من ملايين السنين، فطرتها كده يعني. يعني مثلًا القطط ليها بناء عضلي مميز وقدرة شديدة على التوازن، وده بيساعدها على التسلق لأماكن عالية عشان تتفقد المنطقة، وتلاقي فريستها. ومع إن قطتك عمرها ما هتصطاد، إلا إنها مجبولة على الفكرة نفسها، فممكن تطلع على المكتبة اللي في الصالة عندك وتوقع أي حاجة عليها، لإن التطور وصل بيها إنها بتتصرف كده خلاص، بس حق الله في منهم أحيانًا ما بيوقعوش.
القطط عشان تاكل، بتنتهز الفرص وبتصطاد الفريسة في أي وقت يسمح بده، وعشان أغلب فرايسها بتكون صغيرة، القطة بتحتاج عدد مرات كتير في اليوم. عشان القطط تصطاد بتلاحق الفريسة، وتنقض عليها وتقتلها وتاكلها، فعادي جدًا لو لقيت قطتك في البيت بتنقض على أي لعبة صغيرة مثلًا، وهتلاقيها كمان بتاكل وجبات صغيرة صبح وليل.
وعشان الفرايس بتستخبى دايمًا في الأماكن الضيقة في البيئة الطبيعية للقطط، هتلاقي الفضول الطبيعي بيدفع قطتك تخش في أي فتحة أو صندوق، لإنها في البيئة الطبيعية بتلاقي فريستها في الفتحات الضيقة دي.
كمان في البيئة البرية، القطط بتحتاج مخالبها تكون حادة عشان تدافع عن نفسها وعشان تتسلّق وتصطاد، عشان كده هي بتحتاج تسن مخالبها في الأسطح المقاربة ليها عشان يبقوا مستعدين في أي وقت، وعشان ده كمان بيساعدهم يمطوا عضلات ضهرهم ورجليهم، ويتخلّصوا من بعض التوتر، عشان كده القطة بتاعتك بتخرب الكنب والمراتب والمخدات وبتبهدل لك الشقة.
وعشان تحمي نفسها من الحيوانات اللي ممكن تفترسها، القطط بتستخبي في أي حتة، وبالتالي عادي تفتح الدرج تلاقي القطة، أو تلاقيها مستخبية في جزمتك أو في حلة مثلًا، أنت وحظك بقى.
لو لسه بتحب قطتك، تعايش مع فكرة إنها بتتعامل مع بيتك على إنه الغابة، وتخربش بقى وتستخبي وتنقض براحتها خالص، إشطة.
المصدر:
