لو أكلت موز كتير.. قول على نفسك يا رحمن يا رحيم!

كتب: أحمد حسين

مرة كنت بتكلم مع صديقي، وقال لي إن في ناس بتقول إنك لو أكلت موز كتير ممكن تموت، ولما دوّرت على المعلومة لقيت إن الشائع قصة لو أكلت أكتر من 6 موزات في اليوم هتموت، فهل ده حقيقي؟

في البداية خلينا نقول كلام الديباجة المحفوظ والحقيقي في نفس الوقت، إن الموز من أكثر الفواكة شهرة في العالم، وفاكهة غنية بالفيتامينات والمعادِن، وناس كتير بتحبها وطعمها لذيذ، يعني تُعتبر مفيدة أهيه، أمال إيه اللي يخلي الناس يقولوا عليها مؤذية؟

بحسب البي بي سي الموضوع بدأ من الكاتب ومقدم البرامج الكوميدي (كارل بيلكندون)، اللي نشر الإشاعة دي، والموضوع كبر بقى وانتشر وفي ناس صدقته، لأنه قال إن الموز فيه بوتاسيوم ولو نسبة البوتاسيوم زادت في الجسم بتؤدي للموت، والنسبة بتزيد لما بناكل أكتر من 6 موزات في اليوم.

وطلع الكلام ده كله هجص. أخصائية غذائية اسمها (كاثرين كولينز) في مستشفى “سانت جورج” في لندن ردت عليه، بإن البوتاسيوم -في المطلق- مش ضار ولا حاجة، وفي الحقيقة يعتبر جزء مهم للحياة وبيتواجد في كل خلية في الجسم، وأضافت كمان إنهم بيستخدموه -البوتاسيوم- علشان ينتجوا الشحنات الكهربائية اللي بين الخلايا اللي مابتشتغلش بصورة مُنتظمة.

أوضحت كولينز كمان إنه بيحافظ على بقاء معدل ضربات القلب طبيعي، وبيساعد على توليد الإنسولين من البنكرياس بصورة طبيعية علشان يحافظ على مُعدّلات السكر، وكمان بيخلي ضغط الدم مظبوط. لذلك، لو البوتاسيوم زاد في الجسم بصورة كبيرة أو نقص، ده بيؤدي إلى اضطراب في ضربات القلب، وألم في المعدة، وشعور بالغثيان، ده غير إنه بيُستخدم ساعات الحَقن المميت، لأن الجرعات الزائدة منه ممكن تسبب سكتة قلبية، لكن ده -زي ما أوضحت كولينز- في حالة الزيادة الكبيرة.

لذلك، موضوع الموز الكتير ده صعب ينطبق على الشخص اللي معدلاته الصحية طبيعية، أو بحسب تعبير كولينز مُستحيل، لأنه علشان يحصل محتاج الشخص الطبيعي ياكل حوالي 400 موزة في اليوم، ساعتها بقى معدلات البوتاسيوم هتبقى خطر، وطبعًا صعب على أي شخص طبيعي ياكل 400 موزة في اليوم.

كولينز قالت كمان إن الموز مفيد جدًا للجسم، وإن البالغين يُفضّل إنهم يستهلكوا حوالي 3.5 جرام بوتاسيوم في اليوم (3500 ملّيجرام)، والموزة الواحدة بيكون فيها حوالي 450 ملّيجرام بحسب هيئة الخدمات الصحية الوطنية الإنجليزية، معنى ده يعني إن الشخص الطبيعي ممكن يحتاج ياكل 7 موزات ونص في اليوم، علشان يوصل للنسبة الطبيعية من البوتاسيوم اللي الجسم بيحتاجها.

في النهاية، حذّرت كولينز من حاجتين، الأولى: يُفضّل الناس المصابين بأمراض في الكلية إنهم يبتعدوا عن الأطعمة اللي فيه بوتاسيوم (زي الموز والطماطم مثلًا)، لأن ده ممكن يسبب ارتفاع في ضغط الدم، نتيجة لارتفاع نسبة البوتاسيوم في الجسم. والتانية: إن الموز ممكن يكون مُصاب بأشعاعات في بعض الدول، واللي المزارع فيها بتكون قريبة من مناطق نووية. لكن غير كده الموز مفيد جدًا ومش مضر ولا هتموت لما تاكله ولا حاجة.