سحالي بتعيط بدل الدموع دم!
كتبت: مها طه
على مستوايا الشخصي عندي فضول تجاه الزواحف وعالمهم عمومًا، طبعًا كلنا نعرف السحالي كنوع من الزواحف، وبعيدًا عن إن فى كتير مننا بيخلطوا بينها وبين الحرباء أو الحرباية اللى بتغير لونها حسب البيئة اللي فيها، لكن السحلية شكلها مختلف شبه البرص إلى حد كبير بس حجمها أكبر شوية.
هنا هنتكلم عن نوع من السحالى مثير جدًا للاهتمام بيُسمى بـ”السحلية المُقرنة“. سحلية بس عندها على راسها بروز كده يشبه القرون، بتتميز بتقنيات دفاعية كتيرة تخليها تحمى نفسها ضد خطر أي مُفترِس، الحقيقة النوع ده من السحالى عنده 3 وسائل مثيرة للدهشة بيقدر من خلالهم يدافع عن نفسه.
أولهم وأكثرهم شيوعًا التمويه، لأن جسم السحلية بيشبه الصخور فى لونها، والبروز اللى فيها بيعطي إحياء للحيوانات الأرضية _اللى بتعتمد على حاسة البصر فى الصيد_ وكأنها جزء من الحصى والصخور الموجودة على الأرض.
الآلية التانية للدفاع الخداع، لو الحيوان اللى هيفترس السحلية من النوع اللى بيعتمد على حاسة الشم، التعابين كمثال، هيكون سهل إنه يكتشف وجودها. نظرًا لإن حجم السحلية صغير، فهي بتتعمد تنفخ جسمها بحيث تبان ضعف حجمها الحقيقى، وده بيحميها بعض الشئ لأنها بتوهم التعبان إنها فريسة حجمها مش صغيرة ولا سهل اصطيادها، كمان هي لما بتنفخ نفسها بيظهر البروز اللى على جسمها و كأنه أشواك، وبعد ما تنفخ السحلية جسمها، بتروح مقلوبة على ظهرها. الحركات العجيبة دي بتكون كفيلة إنها تخوف التعبان، وتخليه يمشى من المكان اللى هي فيه.
الثالثة والأغرب بخ الدم: دي بقى فى حالة لو الحيوان اللى هيفترسها حيوان كبير، أكبر من التعبان، فأكيد تكنيك الخداع مش هياكل معاه، ساعتها بتلجأ السحلية لوسيلة مختلفة فى الدفاع عن نفسها، لا مش هتهرب ولا هتجرى، دي هتثبت فى مكانها، وهتستخدم واحدة من أغرب وسائل الدفاع الموجودة فى الحيوانات، وهي بخ الدم من عينيها!
بخ الدم من عين السحلية بيتم عن طريق تقليل تدفق الدم فى دماغها، والاحتفاظ بالدم فى الأوعية الدموية اللى فى وشها، ضغط الدم الموجود فى الأوعية الدموية اللى فى العين، واللى بتكون ضعيفة، بيخليها تنفجر ويخرج الدم منها بشكل مندفع. اندفاع الدم ممكن يوصل لمتر ونص فى الهواء، الأغرب بقى إن السحلية مش بس بتعمل كده، لكنها كمان بتقدر تستخدم عضلات عينيها وتحركها، فتوجه الدم فى إتجاه معين! وطبعًا فى الحالة دى الحيوان اللى بيهاجمها غالبًا بيهرب بسبب تكنيك الدفاع الغريب من نوعه ده.
المصادر
