إزاي تتعامل مع المريض بالاكتئاب؟
كتبت: ريهام نجيب
_أخصائي أمراض نفسية وعصبية مستشفى المعمورة
أسرة كاملة حياتها بتتأثر لما يكون في حد فيهم عنده أعراض اكتئابية. كل واحد فينا بيقف قدام الشخص المكتئب ويحس بعجز شديد و إنه مش عارف يعمل إيه. يمكن أول نقطة حقيقية هتبدأ من كونك “موجود” جنبه. قادر بالفعل تشوف أعراض الاكتئاب وتميزها.
اعرف أكتر عن مرض الاكتئاب من هنا
إيه هي أعراض الاكتئاب اللي ممكن تشوفها في حد قريب منك؟
ممكن تبدأ بحزن (ده ممكن مانقدرش نشوفه أوي)، لكن اللي نقدر نشوفه هو انعزال الشخص ده، و انسحابه من المقابلات أو من الشغل، وفقدانه الرغبة في فعل أي شيء أو الاستمتاع بأي شيء، وممكن يكون كلامه بيدل على يأس شديد أو نظرة يائسة للحياة.
الأمور دي ممكن تمييزها في شخص قريب بالفعل. لو لقيت شيء من لأمور دي ابتدي حاول مساعدة الشخص ده.
لكن قبلها لازم تحط في بالك كذا حاجة:
أولها إنها أعراض حقيقية، والشخص صعب عليه تخطيها لوحده، فمش هتنتهي بكلمات زي (في غيرك عنده أكتر من كده وعادي أو انت اللي كائب نفسك و كلام مشابه).
شيء مهم إن يكون عندك قدر من الصبر على الشخص ده، وماتاخدش الأمور بشكل شخصي إنه مش قادر يتفاعل أو يتواصل وحاول تتفهم إن ده بيكون خارج إرادته.
اعرف أكتر| هل الاكتئاب مرض نفسي أم عضوي؟
ممكن تعمل ايه؟
-إنك تكون “موجود” وتكون مستمع جيد و متعاطف مع الشخص المكتئب اللي بيكون منعزل ووحيد.
-ساعده وشجعه بدون ضغط إنه يتكلم عن أفكاره ومشاعره، الغرض هنا مش إنك تنصحه، الغرض إنك تسمعه.
-من الحاجات المهمة إنك تسأله سؤال مباشر “إزاي ممكن أساعدك في اللي إنت حاسس بيه؟”
-مهم تساعده إنه يبحث عن مساعدة، إنه يروح لطبيب نفسي وتحاول تشجعه على كده.
عشان كل ده يحصل مهم إن إنت نفسك تكون فاهم إن الاكتئاب مش مجرد حزن لكن هو نظارة سوداء بتخلي الشخص يشوف كل شيء عديم القيمة و عديم المتعة و بلا أمل بما فيهم نفسه إلى جانب الشعور المستمر بالذنب.
لو الشخص القريب منك ده رفض إنه يطلب مساعدة من طبيب؟
ممكن تقوله إنه يعمل مجرد فحص عادي عند الطبيب وممكن تساعده وتروح معاه.
الموضوع مش سهل..ومش بيكون محبب في أوقات كتير، وبتحس انت كمان بالعجز…لكن لازم تفتكر إن محدش” بيصلح” حد لكن وجودك وصبرك مع الشخص المكتئب هيفرق جدا معاه.
مقالات أخرى للكاتبة:
