فنجان القهوة: حيث تكمُن نصف سعادة المخ والجسم!
كتبت: مها طـه
لو حضرتك من مدمني القهوة وماتقدرش تعيش من غير فنجان القهوة الصباحي والمسائي، فالمقال ده موجه ليك بالخصوص. أما لو كنت من مدمني النسكافية والكابوتشينو وباقي ولاد العم، فأحب أقولك إن المقال ده برضه ليك، لأنه سواء كنت بتحب القهوة سادة أو فرنساوي أو سريعة التحضير، فحضرتك ببساطة بتساهم في حركة تجارة كبيرة تكاد تحتل المركز التاني بعد البترول، كفاية إنها سبيلنا لمواجهة الحياة ومشاغلها. بس يا ترى بقى القهوة بتعمل في مخنا إيه؟ وليه بتخلق حالة من السعادة للمخ.
فنجان القهوة ..سعادة المخ تبدأ من هنا
طول ما إنت صاحي المخ بيفرز مادة كيميائية اسمها الأدينوسين، المادة دي بتتراكم في المخ طول ما إنت صاحي عن طريق ارتباطها بمُستقبلات معينة. ارتباط الأدينوسين بالمُستقبلات دي بيقلل من نشاط المخ ببطئ.
كل ما كان في أدينوسين أكتر متراكم في المخ، كل ما كانت حالة المخ أسوء من حيث الشعور بالارهاق. بالتالي كل ما تفضل صاحي مدة أطول، كل ما حسيت بالتعب أكتر. لما تنام بيبدأ تركيز الأدينوسين يقل، والمُستقبلات ترجع تاني فاضية ومستنية تاني يوم ومستعدة ليه.
مادة الكافيين بقى والموجودة في القهوة بكثرة تُعتبر مادة مشابهة في تركيبها للأدينوسين، لكن تأثيرها مختلف على المخ، لما حضرتك بتشرب فنجان القهوة الصباحي بيبدأ الكافيين يندفع في مجرى دمك ومنه صعودًا إلى المخ. هناك بقى بتبدأ المعركة بينه الكافيين والأدينوسين، لأن المُستقبلات مش بتعرف تفرق بينهم أوي، وبالتالي بترتبط باللي تلاقيه.
فلو مثلًا عندك 100 مُستقبل في المخ، وشربت 70 جزئ من الكافيين وجسمك أفرز 60 جزئ من الأدينوسين، وبكده مجموعهم على بعض يبقى 130 جزئ متشابه والمفروض يملوا مساحة 100 بس. الأدينوسين بيتراكم ببطئ في حين إن الكافيين بينطلق بسرعة في مجرى الدم.
النتيجة الحتمية لاحتلال جزيئات الكافيين مكان الأدينوسين هي الإحساس بالفوقان وزوال الإحساس بالإجهاد، المشكلة بقى إنه مع استخدامه لفترة طويلة بيبدأ المخ يتعامل مع الحيلة دي بإنه يزود عدد مُستقبلات الأدينوسين، وبكدة فإنت لازم تزود استهلاكك من الكافيين عشان تعادل الموضوع تاني، وهو ده السبب في إنك لو فوتت فنجان القهوة بتاعك أو حاولت تُقلع عن شرب القهوة هتبدأ تحس بالإجهاد بسرعة أكتر.
الأدرينالين وعلاقته بالكافيين
دور الكافيين العظيم في حياتنا لا يتوقف عند فكرة الفوقان وتقليل الشعور بالإرهاق ده كمان بيحفز إفراز هرمون الادرينالين أو هرمون الهروب أو المواجهة، وده اللي بيفرزه الجسم في حالة احتياجه لزيادة نشاطه عشان يواجهه خطر أو توتر ما.
الهرمون ده بيزود من معدل ضربات القلب وبالتالي معدل سريان الدم في الشرايين والأوردة وزيادة معدل التنفس، وبالتالي بيديك طاقة أكبر عشان تؤدي مهام يومك وتخلق حالة سعادة المخ.
الكافيين كمان بيؤثر على هرمون الدوبامين (هرمون السعادة)، لأنه بيقلل من إعادة امتصاصه في المخ وبالتالي تفضل حاسس بالسعادة لفترة أطول، ببساطة هو ده نفس اللي بيعملوا الكوكايين بالظبط، لكن طبعًا الكافيين بتكون قدرته أقل، وغالبًا هو ده السبب اللي بيخلي محبي القهوة يبقوا بعد فترة مدمنين ليها ووجودها مؤثر أوي في يومهم.
مع كل الحاجات الحلوة والمميزات دي لازم كمان نقول إن مادة الكافيين زيها زي أي مادة في الدنيا، عند حد مُعين ممكن تكون مؤذية بل ومميتة كمان، تعاطي الكافيين بنسبة 150 ملليجرام لكل كيلوجرام من وزن الجسم تُعتبر هي الجرعة القاتلة.
بمعنى تاني لو حضرتك وزنك 70 كيلوجرام فغالبًا الجرعة المميتة هي 14000 ملليجرام كافيين، وللتوضيح أكتر، في المتوسط بيحتوي فنجان القهوة على 150 ملليجرام كافيين، وده معناه إن شرب 70 فنجان قهوة في اليوم بالنسبة لشخص وزنه 70 كيلو جرام هي دي الجرعة القاتلة.
اعرف اكتر عن: هذه الكمية من المواد الطبيعية كفيلة بقتلك
طبعًا ولله الحمد محدش يقدر يعمل كده مرة واحدة لأنه غالبًا معدته مش هتقدر تستحمل وهتبدأ تحس باللي بيحصل وبالتالي هتخليه ميقدرش يكمل بالشكل ده، ده غير إنه وعند مرحلة معينة الشخص هيبدأ يحس بهلاوس سمعية وبصرية ويفقد الوعي أصلًا.
الكافيين كمان من المواد اللي فترة بقائها في الجسم مش بتُعتبر كبيرة أوي، يعني مثلًا فترة نصف العمر ليه حوالي 6 ساعات، فلو شربت فنجان قهوة محتوي على 150 ملليجرام كافيين، بعد 6 ساعات مش هيتبقى منهم في الجسم غير حوالي النص (75ملليجرام) بس وبالتالي تأثيرهم ينزل للنص كمان، بعد 6 ساعات تانيين هيبقوا الربع (37.5ملليجرام)، وفي الحالة دي غالبًا هتكون محتاج فنجان تاني عشان خلاص مش هتبقى تقريبًا حاسس بتأثير الكافيين.
المصادر: shape ineedcoffee coffeeandhealth ed.ted
