![](https://neonsciences.com/wp-content/uploads/2019/02/الخوف-من-الكلاب.jpg)
“ابعد عنه هيعضك” الخوف من الكلاب فوبيا حقيقية وليها علاج
كتب: أحمد حسين
مرة كنت مع صحابي وإحنا صغيرين في مكان ما لا داعي لذِكر اسمه. المهم كنا ماشيين وبعدين بدأنا نجري ونستخبى من بعض ونلعب يعني. فجأة لقينا نفسنا في مكان كله ناس ماسكين كلاب وبيمشّوهم، شوية وبنبص ورانا لقينا كلب بيجري تجاهنا، طبعًا كل واحد فينا جري في اتجاه، وواحد من أصحابي وقع على الأرض وحط إيده فوق راسه واستسلم لمصيره، لكن اللي حصل إن الكلب لعب معاه، ومع ذلك الموقف ده كان كفيل إنه يُصاب بـ الخوف من الكلاب أو الـ Cynophobia.
الخوف من الكلاب
الـ Cynophobia كلمة مكوّنة من كلمتين “Cyno” بمعنى كلب، و”Phobia” بمعنى رُهاب أو خوف، فيبقوا مع بعض الخوف من الكلاب. وقبل ما نتكلم عن أعراض الفوبيا وأسبابها وكيفية العلاج منها، خلونا نتكلم شوية عن الكلاب نفسها. الكلاب حيوانات آكلة للحوم، بتنتمي لفصيلة الكلبيات اللي منها الذئاب والقيوط (المعروف بذئب البراري)، ودي حيوانات مفترسة الخوف بينها وبين الإنسان متبادل.
![](http://neonsciences.com/wp-content/uploads/2019/02/National-Park-Service-300x250.jpg)
طبعًا الكلاب تاريخيًا تُعتبر أحد الحيوانات الصديقة للإنسان، إن ماكانش الكلب بيُعتبر الصديق الوفي للإنسان. لذلك الكلاب من أكتر الحيوانات انتشارًا في العالم، وموجودين في كل البلاد. وزيّهم زي القطط فيهم كتير من اللي بنطلق عليهم كلاب شارع (Stray Dogs)، ودول أحد أسباب زيادة الخوف من الكلاب، كونهم مابيلاقوش الرعاية الطبية الكاملة فممكن بسهولة يُصابوا بالسُعار وينقلوه للبشر.
اعرف أكتر| السعار: بين فيروس فائق الذكاء وكائن فائق التعقيد
بس برضه مش عايز أقول إنهم كائنات شريرة، الحقيقة إنهم كائنات طيبة فعلًا بعيدًا عن إصابتها بالسُعار، واللي شوفته بنفسي إن فيه ناس كتير بيتعاملوا معاهم بقسوة شديدة، زي إنهم يرموا عليهم طوب أو يضربوهم بعصيان خشب وحديد وغيره، وده بيحوّلهم لكائنات مرتابة خايفة من البشر، فيعني منطقي إنهم لما يبقوا خايفين يا إما يهربوا منك أو يهجموا عليك، والهجوم ده أحد أسباب الخوف من الكلاب اللي محتاجين نتكلم عنه بشكل عام علشان نعرفه أكتر.
أعراض وأسباب الخوف من الكلاب
عدد الكلاب حول العالم يُقدّر بالملايين، وعلشان كده هتلاقي عدد كبير من الناس بتخاف منهم بشكل مَرَضي، فخلونا نقول إيه هي أعراض الخوف من الكلاب، علشان لو كنا مصابين بيها نعرف:
- صعوبة التنفس.
- تسارع ضربات القلب.
- ألم في الصدر
- الارتجاف.
- الدوخة.
- قلبة البطن.
- العرق.
- هجمات الرعب والقلق.
- فقدان التحكم في نفسك.
- الإحساس بإنه ممكن يغمى عليك.
وقبل ما الطبيب يشخّص الحالة بإنها فوبيا من الكلاب، لازم الأعراض دي تكون عند المُصاب لمدة 6 شهور أو أكتر. والتشخيص بيدور حوالين هل الخوف ده بيحصل بشكل مباشر أول ما بيشوف كلب أو بيفكر في وجود كلب في المكان، أو مثلًا بتجنب إنه يروح أماكن فيها كلاب، يعني لو عارف إن واحد صاحبه عنده كلب، ممكن يروح عنده ويستحمل ولا مش هيقدر يزوره في بيته أساسًا.
والأسباب اللي ممكن تخلي شخص يخاف من الكلاب كتير، منها السن والمعرفة المسبقة اللي ممكن تكون سيئة أو حتى كونك ساكن في مكان مليان كلاب وفيه حوادث عض وسُعار كتير. لكن أهم أسباب الإصابة بالفوبيا أو الخوف من الكلاب هي التجربة، لو حصلت لك تجربة مؤلمة سواء وإنت صغير أو كبير مع كلب، فغالبًا ده هيخليك تبقى خايف من أي كلب تقابله، سواء في بيت أو في الشارع.
![](http://neonsciences.com/wp-content/uploads/2019/02/6-Pixabay-300x198.jpg)
وبرضه ساعات بيكون السبب في الخوف مش التجربة بشكل أساسي، وإنما حاجة تانية تخلينا نخاف من الكلاب من غير ما نمر بتجربة سيئة معاهم. كيسي براون، مُعالج في مركز جورجيا في أمريكا لعلاج الوسواس القهري والقلق، بيقول إن بعض الناس ممكن يخافوا من الكلاب من غير تجربة سيئة مسبقة، بسبب عدم التوازن الكيميائي في المخ، واللي ممكن يكون سبب في اضطرابات القلق أو اضطراب الوسواس القهري (OCD)، يعني في الحالة دي الخوف من الكلاب بيكون عَرَض مش مرض.
وبعيدًا عن السبب الأساسي للإصابة بالخوف من الكلاب أو الـCynophobia، فعلاجه بيتشابه مع علاج جميع أنواع الرُهاب، والحل في المواجهة. تجنب الحاجة اللي بتخاف منها مش هو الحل ولا العلاج، والتعرّض ليها بشكل دوري بيخليك تخاف منها أقل، مثلًا الناس اللي بتتربي في بيوت فيها كلاب، مابيكونوش بيخافوا زي اللي مابيشوفوش كلاب كتير في أيامهم. بس ده مش معناه إنك تنزل ترمي نفسك وسط مجموعة من الكلاب وتقول بعالج نفسي، الموضوع مش كده بالظبط.
اعرف أكتر| الكلب بيشم ريحة الخوف!
إدارة الخوف من الكلاب
من زمان، أظهرت الأبحاث إن العلاج السلوكي المعرفي (CBT) ناجح جدًا في علاج اضطرابات القلق زي الرُهاب كده، وخصوصًا تقنية اسمها التعرّض ومنع الاستجابة (ERP). العلاج السلوكي المعرفي بيعالج كل الأفكار والسلوكيات اللي بتكرّس وبتغرس الخوف والقلق من أشياء مختلفة ضمن نشاطاتنا اليومية، وكل خوف وقلق من دول وراه احتمالية خطورة بنشوفها لما بتيجي قدامنا الحاجة اللي بنخاف منها، وده اللي العلاج السلوكي المعرفي بيحاول يخلّصنا منه.
والعلاج السلوكي المعرفي، وتحديدًا تقنية التعرّض ومنع الاستجابة، أساسها إدارة الخوف والتحكّم في رد الفعل عليه، وده ينطبق على أي رُهاب أو خوف. بحسب كيسي براون، كمُعالج لاضطرابات القلق، بيقول إنه مايقدرش يقول لمريض إن قلقه ده هيتعالج، لأنه مش دي الطريقة اللي بيمشي بيها العلاج، الموضوع محتاج خطوات كتير علشان يوصل المُصاب للنقطة اللي يقدر عندها يتعايش مع خوفه ده ويديره بسهولة.
![](http://neonsciences.com/wp-content/uploads/2019/02/9-Pixabay-300x200.jpg)
الخطوات تجاه العلاج تبدأ بتحديد درجة الخوف من الكلاب على مقياس من 0 إلى 10. ومهم إنه المُصاب يعرف إنه لو حتى خوفه على المقياس ده واخد 10 مثلًا، فهو قادر على إدارة الخوف وتقليله إلى 1 أو 2. بعض المُعالجين بيقولوا إنه كويس إننا نعلّم المُصابين إن الكلاب مش كائنات خطيرة ولا شريرة، عن طريق المحاضرات والدروس وغيره، لكن الأفضل على الإطلاق إنه يواجهوا أو يقضوا وقت مع كلب لطيف حقيقي لمدة من الزمن، ده العلاج اللي احتمال ينجح بالفعل.
طريق العلاج والتخلص من الخوف من الكلاب طويل، بيبدأ بتحديد درجة الخوف، من أول الخوف من مواجهة كلب أو سماع نباحة، لحد الخوف من رؤيته في التليفزيون أو مجرد سماع قصة عنه. والموضوع بيمشي بشكل بطيء وبسيط، وبينتقل المعالج والمصاب مع بعض من خطوة إلى خطوة بهدوء، وده بيتم حسب إحساس المصاب بالراحة للعلاج. نتمنى الشفاء لكل اللي بيحاول يتخلص من خوفه، أيًا كان نوع الخوف ده.
اعرف أكتر| أغرب أنواع الفوبيا: اللي تخاف منه ابعد عنه!
المصادر: healthline howstuffworks