عن الرقص: ترقص؟! غصب عني أرقص .. دي جينات حضرتك!
كتبت: مها طـه
على مر العصور وفي مختلف الثقافات بيكون الرقص بمختلف أشكاله حاضر، كنوع من أنواع الفنون اللي بتعبر عن الحياة والبيئة وكمان بتمثل طرق مختلفة للتعبير عن المشاعر وأهمها الفرح. معظم البشر بيرقصوا بشكل يكاد يكون لا إرادي، من أول اللي بيسمع المزيكا ويهز إيديه أو رجليه، لحد اللي بيرقص باليه أو بريك دانس حتى.
الرقص .. صفة تطورية
كل البشر تقريبًا بيحبوا الحركة بشكل عام، إحنا في النهاية من الكائنات المتحركة، اللي الحركة عندهم بتُمثل تحفيز لإنتاج هرمونات الراحة والسعادة، لكن الرقص بالتحديد كان دايمًا بيطرح تساؤل في دماغ العلماء، يا ترى هو مجرد سلوك فردي؟ ولا موجود في الجينات البشرية عمومًا؟
من وجهة النظر التطورية، كتير من الحيوانات بتقوم بحركات راقصة، في الأغلب بيكون الهدف من الحركات دي هي الحصول على شريك، والحقيقة إن تشارلز داروين قال إن البشر كمان كده لأنه الرقص من الناحية التطورية ارتبط بالحصول على شريك، وبالتالي بالقدرة على البقاء.
اتضح بالبحث إن الإنسان البدائي كان بيعتمد على الحركة المنتظمة والإيقاعية للحصول على شريك، وده لأن القدرة على الحركة بالشكل ده ارتبطت بالقدرة الجسدية، لأن اللي قادر يتحرك بالشكل ده بيقدر يجري أسرع ويدافع عن نفسه وعن عائلته من المخاطر بشكل أكبر، وبكدة يضمن البقاء بصورة أكبر.
الرقص عند الإنسان البدائي كان عبارة عن استعراض للقوة والقدرة الجسدية أكتر منه ممارسة للرقص اللي نعرفه النهاردة. أحد أهم الأدلة اللي بتثبت إن الرقص شئ موجود في جيناتنا كبشر، إن الأطفال من عمر 5 شهور تقريبًا، ممكن أول ما يسمعوا مزيكا أو إيقاع تلاقيهم بيتحركوا وفقًا ليه، زي إنهم يحركوا دماغهم او إيديهم ورجليهم.
الفرق بين الحيوانات الراقصة زي العناكب والطيور اللي بيستخدموا الحركات الراقصة لجذب شريك أو النحل اللي بيستخدمه لتوصيل رسائل معينة بين أفراده، وبين البشر هو إننا ربطنا بين الرقص ووجود الموسيقى. طب يا ترىالربط ده حصل ليه؟
فوائد الرقص والموسيقى
كتير من الدراسات اللي اتعملت على الموسيقى أثبتت إنها بترتبط في المخ بحالة من السعادة والنشوة لأن الموسيقى بتحفز مناطق معينة في المخ، زي منطقة القشرة الأمامية المدارية، اللي بتقع خلف العينين، والمنطقة دي مسئولة عن الإحساس بالمتعة والمكافآة، الموسيقى كمان بتحفز منطقة (ventral striatum)، ودي المسئولة عن مدى استمتاعنا بالنغمات نفسها، أخيرًا الموسيقى كمان بتحفز النشاط في منطقة المخيخ، في قاع المخ، ودي المنطقة المسئولة عن التناسق العصبي العضلي.
اعرف أكتر| تأثير الموسيقى على الرياضة: “اتقدم تارارا اتقدم”
ربط الموسيقى بالرقص خلى للرقص متعة أكبر، لأنها بتحسن من التناسق الحركي وبتحفز معاه الإحساس بالنشوة والمكافآة، وبتزيد متعة الرقص لو كمان شفت حد بيرقص قدامك وتحس إنك عاوز تشاركه الرقص، لأن المخ بيحب يحاكي البيئة اللي هو فيها، بمعنى تاني، مخ الإنسان بطبيعته بيحب يُظهر التعاطف والتماهي مع ما حوله، وعشان كده لما بترقص مع أصحابك في فرح بتحسوا بسعادة اكتر من لو كل واحد رقص لوحده قدام مرايته في البيت.
مؤشر جيد للصحة
الرقص بيُعتبر وسيلة للتعبير عن النفس بشكل جيد، لأن الشخص من خلال الرقص بيعزز ثقته في نفسه وفي جسمه. الغريب بقى إننا كبشر ومن غير ما نُدرك بنعتبر الرقص الجيد دليل على الصحة الجيدة ومستوى الخصوبة كمان! أيوه زي ما قريتوا كده 😀 معظم الشباب ممكن يشوفوا الممثلة الفلانية أو الراقصة العلانية قمة في الأنوثة والإثارة لمجرد إنها بتعرف ترقص حلو، وعلى الناحية التانية كمان لما بيكون في ممثل أو راقص، فالبنات بتنجذب ليه بشكل كبير.
بالحديث عن الرجالة فكتير منهم بيشوف إن الرقص فعل “حريمي” وإنهم من المؤكد مش بيعرفوا يرقصوا، لكن الحقيقة إن ده ما هو إلا تعود مش أكتر، لأنه ومن المعروف إن في كل الحيوانات تقريبًا اللي بتتبع الرقص كطريقة لجذب الشريك، الذكر فيها هو اللي بيقوم بالمهمة دي بهدف جذب الأنثى له.
وده اللي دفع العلماء لمعرفة هل فعلًا الإناث بتنجذب للراجل اللي بيعرف يرقص؟ والحقيقة إن الإجابة كانت أه، الستات زي الرجالة بيحبوا إن شريكهم يرقص، ده بيحفزهم للتقرب منه، مين ينكر جمال جين كيلي ولا جون ترافولتا؟ والأهم إن العلماء توصلوا للحركات اللي بتجذب الأنثى في الرقص.
الأنثى بتنجذب للراجل اللي بيعرف يرقص بمنطقة الصدر والرقبة والدماغ، بمعنى أصح الانثى بتهتم بالجزء العلوي من الجسم، لأن تحريك المناطق دي بيرتبط عند الست بالمرونة والقدرة على الإبداع، في حين إن الرقص بالإيدين وبحركات متكررة وثابتة زي “الحاج عبدالغفور البرعي” بتُعتبر في نظر الستات هي الأسوء، أصله تحسها رقصة بابا أوي يعني..وهو فعلا كان بابا بس إحنا مش عاوزين بابا 😀
وعلى ذِكر بابا فغالبًا الناس لما بتكبر ومهما كانت بتعرف ترقص وهي صغيرة، بتبدأ المهارة في الرقص تتغير، والإيقاع بيبقى أبطئ والمرونة أقل، وده طبيعي جدًا، حضرتك لا سني ولا لياقتي يسمحوا لي بالكلام ده.
أخيرًا، الرقص حاليًا بيُعتبر من الأمور اللي بتشغل العلماء بشكل كبير، وبيُنصح بيه كتير من مرضى الاكتئاب والأرق وغيرهم، عشان يقدروا يسترخوا ويتبسطوا ويطلعوا طاقة سلبية كبيرة، ده غير قدرته على تحريك العضلات وتنشيط الدورة الدموية وبالتالي لو مش عارف تمارس رياضة بشكل منتظم ع الأقل Hرقص بشكل منتظم.
اعرف أكثر| فيزياء الرقص: ودي يبقى اسمها فيزيا برضه يا راجل؟
وبمناسبة اهتمام العلماء بالرقص، ونظرًا لفوائده الكبيرة، دورية “Science” للعلوم عملت مسابقة في 2015، تحت عنوان “Dance Your Ph.D”، واللي بيتنافس فيها طلبة الدكتوراه في المجالات العلمية المختلفة، عن طريق إنهم يبعتوا فيديو راقص _أيًا كان نوعه_ للتعبير عن رسالة الدكتوراه بتاعتهم، وفي النهاية بيتم اختيار الفيديو الأفضل، وبيحصل على جايزة تُقدر بـ2500 دولار. أسيبكم مع الفيديو اللي فاز في مجال الفيزياء.. وماتنسوش ترقصوا 😉
المصادر: myscienceacademy science20 scientificamerican sciencemag
