.
نوّرها

الإبر الصينية: إحنا ناقصين شكشكة!

كتبت: يارا كمال

ده أنا بخاف من الحقن، تدولي إبر صينية؟ طب وعلى الشكشكة دي كلها هتجيب نتيجة؟!

فيه أدلة بتقول إنها بالنسبة لبعض الحالات خصوصًا الألم بتجيب نتيجة، بس بالنسبة للطريقة اللي بتجيب بيها النتيجة دي، فإحنا لسه مانعرفهاش.

لما تروح لأخصائي علاج بالوخز ممكن يبدأ بفحص لسانك وقياس نبضك من كذا نقطة في كل رسغ أو معصم وفحص بطنك.

”ستيفاني تيسكا“، ودي ممارسة ومدرسة علاج بالوخز في فلادليفيا، كانت بتقول إن أخصائيين العلاج بالوخز مكانوش بيستخدموا التصوير بالرنين المغناطيسي أو أشعة إكس من 2500 سنة، وعشان كده كانوا بيستخدموا طرق تانية عشان يقيموا اللي بيحصل جواك.

أهي الإجراءات التشخيصية دي هي اللي بتعرّفهم يحطوا الإبر فين. ممكن كمان أخصائي العلاج بالوخز يتكلم معاك في نظامك الغذائي وعاداتك الشخصية، وينصحك بإنك تبطّل أكل معين أو تاخد مكملات عشبية وممكن يعمل لك شوية علاجات إضافية في المكتب بتاعه أو العيادة زي تنظيف الجلد بالفرشة أو الحجامة، وكلها تحت مظلة العلاج الصيني التقليدي.

طيب موضوع العلاج بالوخز ده حقيقي ولا هجص؟

بصوا فكرة إننا نقول إذا كانت العلاجات دي كلها بتجيب نتيجة ولا لأ صعبة، أما تحديد إزاي بقى بتجيب نتيجة مع بعض فده إلى حد كبير مستحيل. فيه ناس بتعتبر طريقة العلاج دي كلام فارغ، يمكن كمان عشان كلام أخصائيين العلاج بالوخز عن مسار الطاقة والمش عارف إيه، فتحس إن الموضوع شعوذة شوية، بس العلماء بيقولوا غير كده.

فيه تحليل تلوي، وده اللي بيفحص الأبحاث الموجودة عن موضوع معين، اتعمل مؤخرًا، قارن بين العلاج بالوخز والعلاج الطبي العادي (اللي هو العلاج اللي بيتضمن فحص الدكتور والأدوية) في حالات ألم العظام والعضلات والصداع المزمن وهشاشة العظام. وقارن كمان بين العلاج بالوخز الحقيقي والمزيف (المزيف عبارة عن إجراء بتتحط فيه الإبر بشكل عشوائي عشان يخلوا المرضى يفتكروا إنهم بيتعالجوا بالوخز ومابيبقاش ده اللي بيحصل).

”أندرو فيكرز“، وده إحصائي حيوي في مركز ميموريال سلون كيترينج للسرطان اللي شارك في كتابة التحليل التلوي، بيقول إن فيه دراسات كتير عن العلاج بالوخز سيئة التصميم عشان كده حاولنا ناخد أحسن التجارب بس.

لما جم يقارنوا بين العلاج بالوخز الشرعي والعلاج العادي، لقوا إن العلاج بالوخز إحصائيًا ليه فايدة كبيرة. أندرو فيكرز قال إنهم لقوا إن ليه تأثير يمكن قياسه وإن لو العلاج بالوخز دوا، كنا قلنا إن الدوا ده جاب نتيجة.

لما فريق فيكرز بقى قارن بين العلاج بالوخز الشرعي والعلاج المزيف، لقوا إن الفايدة لسه موجودة بس بتتقلص. فيكرز كان بيقول إن فيه طرق كتير لتفسير ده، فيمكن يكون ده ليه تأثير العلاج الوهمي أو يمكن لإن نقاط الضغط، اللي هي المواضع الدقيقة اللي بتتحط فيها الإبر، مش مهمة أوي زي ما أخصائيين العلاج بالوخز بيقولوا.

اعرف أكتر| العلاج الوهمي: هو عايزك تخدعه

فيه ناس كتير بيعتبروا إن العلاج الوهمي (placebo) ده احتيال. ”فيتالي نابادو“، وده مدير مركز التصوير العصبي المتكامل للألم في مدرسة طب هافارد، بيقول إن مصطلح العلاج الوهمي ليه دايمًا دلالة سلبية جدًا، وإن رأينا الضعيف في فكرة العلاج الوهمي محتاج مراجعة.  فيه أنظمة مدمجة في جسم الإنسان لزيادة أو تهدئة الألم والأحاسيس التانية. لو العلاج الوهمي بيقدر يستهدف الأنظمة الداخلية دي ويعدلها، فده هيبقى شيء كويس وحقيقي.

لكن العلاج بالوخز ممكن يكون ليه تأثيرات أبعد بكتير من العلاج الوهمي. نابادو عمل كتير من دراسات تصوير الدماغ على العلاج بالوخز في محاولة لمعرفة ازاي العلاج ده بيهدي الألم أو مابيهديهوش والحالات المشابهة كمان زي الصداع أو التهاب المفاصل. فيه طرق كتير للعلاج بالوخز بتنفع، واختلاف الآلية بيكون حسب الحالة اللي بنحاول نعالجها.

فيه احتمالية بتقول إن الوخز بالإبرة بيسبب إصابة بسيطة أوي، وده بيخلي جهازك المناعي يستجيب بإنه يبعت البروتينات الالتهابية وحاجات تانية لمحاربة الإصابة، وكيماويات التئام الجروح لمصدر الإصابة. الفكرة بقى إنه بتحفيز الإصابات البسيطة خالص دي، إحنا كده بنكثّف جهد الجهاز المناعي عشان لما ييجي يتعامل مع مشاكل أكبر.

ممكن كمان يكون تيار الدم المتزايد وكيماويات الجهاز المناعي لموقع الوخز ممكن يساعد في تنضيف المنتجات الثانوية المتراكمة للخلايا واللي ممكن تثير أو تزيد الحالة سوءً زي التهاب اللفافة الأخمصية والتهاب الأوتار، أو إن الإبر بتحفز المستقبلات العصبية في الجلد، واللي بتمرر المعلومات للحبل الشوكي والمخ. المعلومات ممكن تثير تغيير في وظيفة المخ زي إطلاق الإندروفين أو الأنواع دي من الناقلات العصبية وده ممكن يقلل الإحساس بالألم المرتبط بحاجة زي آلام العضلات الليفية.

الأبحاث بتاعة ”نابادو“ أثبتت صحة بعض الآليات المحتملة. واحدة من دراساته بتقول إن بعد العلاج بالوخز التقليدي، مستقبلات المخدرات بتكون متوفرة بشكل أكبر أو مستقبلة بشكل أكبر لكيماويات الجسم اللي بتهدي الألم. في حين إن التغيير ده مابيحصلش بعد الوخز المزيف.

نابادو بيقول إن مزيد من الأبحاث كانت بتشوف هل توقع نتيجة العلاج بالوخز بيفرق، يعني لو أنا مصدقة إني هتعالج هتعالج؟

الأدلة وصلت لإنه لأ، توقع النتيجة مابيفرقش في حاجة.

نقدر نقول إن العلاج بالوخز علاج تكلفته قليلة وآثاره الجانبية قليلة أوي، وبالتالي ممكن يكون حاجة مساعدة للعلاج العادي. نابادو بيقول إن العلاج بالوخز مابيعالجش من السرطان ولكنه فعال في السيطرة على الآثار الجانبية للإشعاع والعلاج الكيماوي، زي الألم والاعتلال العصبي والغثيان.


المصادر:  Time MedicineNet

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى