لماذا يجب أن نبتعد عن الدندو؟!
كتب: أحمد حسين
من ضمن الإعلانات اللي أثارت الجدل السنة دي، كان إعلان جهينة ”الدندو“. الإعلان قسّم الناس لتلات فرق، ناس شايفة إنه لا بأس به يعني عادي، وناس شايفة إنه مبتذل وبيحرّض على التحرّش وقلة الأدب، وناس شافت إنه إعلان ذكي ومبتكر. بس هنا هنسيبنا من كل ده بقى، وهنركز في الفكرة الأساسية اللي كان بيدور حواليها الإعلان وهو ”الفطام“.
إيه هو الفطام؟
الفطام هو عملية توقف الأم عن رضاعة الطفل، بهدف إنه يتعود على الطعام العادي، والموضوع ده مش عافية يعني، هو بس بييجي بتشجيع الطفل على إنه يسيب حاجة ومحاولة إنه يستقبل حاجة جديدة عليه. موضوع الفطام ده بيبدأ بعد ما الطفل يوصل ست شهور وهنا الفطام مش معناه توقف الأم عن الرضاعة ولكن بيكون بإدخال عناصر غذائية طبيعية مع لبن الأم، لأن في الفترة دي الطفل بيكون محتاج لكل العناصر والفيتامينات اللي موجودة في لبن الأم، زائد إنه بيقدر يهضمه بسهولة يعني.
فلما الطفل يوصل عمره لست شهور، تبدأ تنتقل بيه لنظام أكل مختلف زي ما قلنا، فيبدأ يتغذى على أكل غير لبن الأم. بس الطفل ماينفعش ياكل شيء غير لبن الأم غير لما يقدر يعمل تلات حاجات، أولهم إنه يقدر يقعد، يعني يفرد ضهره ويثبّت رقبته، تاني حاجة إنه يقدر يمضغ، والمضغ هنا بمعنى إن يلوك الأكل بلسانه يستطعمه ويقدر ياكله زي التفاح المسلوق الطري لأنه في الوقت ده هتكون أسنان الطفل لسه ماطلعتش، والحاجة التالتة إن الطفل يقدر يمسك الأشياء بإيده ويركّز معاها بعينه.
طيب إزاي تبدأ في إعطاء طفلك أكل إلى جانب لبن الأم؟
مبدئيًا الأكل لازم يكون دافي، والأم تدوقه، أو تاكل منه شوية صغيرين علشان تتأكد إنه مش هيؤذي الطفل بأي شكل مثلًا كان سخن بزيادة. تبدأ الأم في إعطاء الطفل معلقة صغيرة جدًا من الأكل لمرة واحدة بس في اليوم، ويُفضّل المعلقة تكون بلاستيك خفيف. برضه مزج الأكل ده بلبن الأم، أو لبن مصنوع للأطفال والرُضّع خصيصًا، ده هيكون ألطف للطفل علشان يتقبله.
الأفضل كمان إن الموضوع مايكونش عافية، يعني لو الطفل مش متقبل الأكل، فبلاش يعني، ممكن ينتظر الأب والأم فترة لحد ما الطفل يكون مُتقبل الأكل ده. زائد إن الطفل بيحب عمومًا يعني يلعب في طبق الأكل، فلما يجي يعمل كده بلاش كِخ يا حبيبي والكلام ده، لأنه بكل بساطة هيكره الأكل، اللي هو الشيء اللي إنت بتحاول تعوده عليه. كمان حاول تعتبر طفلك فرد أساسي من العيلة، يعنى هات كرسي عالي كده، وخليه يشارك العيلة على الطرابيزة، وشاركوه أكله وألعابه وشجعوه على تقبّل الأكل الجديد ده.
لما تيجي تبدأ في الخطوة دي، ابدأ بالأكل البسيط اللي يقدر الطفل يمضغه، زي الرز المخلوط باللبن، والأكل المهروس، سواء كانت بطاطس أو بطاطا أو جزر، الأفضل يعني يكون مهروس ومطحون تمامًا، كمان الفاكهة الناعمة ماتضرّش، زي الموز مثلًا. لما طفلك بقى يوصل لسن 8 شهور، ممكن يبدأ ياكل فاكهة بقى وخُضار مش مطحون، بس برضه يبقى متقطّع قطع صغيرة علشان يقدر يمضغه.
كمان لازم الطفل ساعتها يتعوّد على مسك الكوبايات ويشرب بنفسه، الكوباية طبعًا مستحيل تكون إزاز، لازم تكون من البلاستيك البسيط اللي يقدر الطفل يمسكه ويشرب منه، من غير ما يكون مؤذي له يعني. الكوبايات دي طبعًا يُفضل تكون بأشكال كارتونية علشان تشجّع الطفل إنه يشرب منها.
إمتى الطفل يقدر ياكل لحمة وفراخ وسمك مثلًا؟ لما يوصل لسن 12 شهر، ولازم اللحمة والفراخ يكونوا مستويين وناعمين جدًا علشان الطفل يقدر يمضغهم ويبلعهم. وطبعًا يعني بيتقطّعوا قطع صغيرة، ومش لحمة وفراخ بس، ده ساعتها بيكون قادر يشرب اللبن الجاموسي بكل مشتقاته بقى (البيض والجبنة وغيره). والطفل عمومًا هو اللي بيحدد المقدار اللي يقدر ياكله، يعني الطفل هو اللي هيقول للأب أو الأم إذا كان لسه جعان ولا خلاص شبع، وهما هيفهموا ده من حركاته.
طيب ليه الطفل لازم يتوقف عن الرضاعة؟
ليه لازم خطوة الفطام دي؟
ببساطة خلينا نقول إن جسم الطفل ليه سعة معينة تقدر تتملي بالأكل واللبن والمية إلخ، ودي حاجة متوارثة عرفتها الأمهات بالتجربة، لمابيوصل الطفل لسن الفطام، لما بيتم سنتين، بيكون ضروري والأولى إنه الولد يتفطم ويبدأ يعتمد على الأكل الطبيعي علشان جسمه هيكون محتاجات فيتامينات زي فيتامين D، واللي بيكون موجود في أنواع معينة من الأكل زي البيض والسمك، وطبعًا بيكون مفيد وأساسي للجسم، لذلك لازم الطفل يبطّل رضاعة، علشان يقدر يستهلك الأكل ده، أو حتى يقدر يستهلك نقط الفيتامينات المختلفة (A – C – D).
في حاجتين بقى لازم تخلي بالك منهم، الحساسية: ودي لازم تركز مع الطفل فيها جدًا، يعني لو لقيته بيطوّر حساسية من أي نوع من الأكل، لازم تبطّلها، وتوديه لدكتور يشوف الموضوع ده ممكن يتعالج إزاي. الحاجة التانية بقى إنك تبعد عن الملح لأنه الطفل مابيتقبلوش أساسًا، ابعد كمان عن السُكّر وعوّضه بالفاكهة المسكرة زي ما قولنا الموز مثلًا. ابعد كمان عن العسل والمكسرات، لأن العسل بيحتوي على نوع من البكتيريا، فالأطفال مابيقدروش يهضموه، والمكسرات بتخنقهم وبتخليهم يشرقوا يعني.
فأيوه البعد عن الدندو شيء أساسي في الحياة لأي طفل ولد أو بنت عشان يكبروا، أي نعم مش بيكون بسهولة عند بعض الأطفال خاصةً لإنه غير كون الرضاعة الطبيعية من صدر الأم مصدر التغذية الأول للطفل، فهي بتخلق رابطة عاطفية قوية جدا بين الأم وابنها أو بنتها واللي لازم تتوقف في مرحلة ما مع أخد شكل جديد من استقلالية الولد أو البنت واللي بتبدأ من التغذية والأكل.
المصادر:
