كتبت: مها طـه

وارد تنام بالليل زعلان شوية، فتصحى الصبح تعبان ومصدع وجسمك بيوجعك كل ده عادي وطبيعي وله تفسير، ممكن تكون مانمتش كويس عيطت كتير قبل النوم أو أيًا كان، لكن إنك تصحى الصبح تلاقي جسمك فيه بقع زرقاء وكأن حد ضربك أو كدمات كإنك وقعت فده غريب!

الحزن الأزرق وأخواته

البقع الزرقاء دي الأشبه بكدمات كان السبب وراها واللي تداولته كتير من الناس والصفحات على الفيسبوك هو الزعل! والحقيقة إنه بالبحث ورا الكلام ده، لقينا إن الزعل ممكن يسبب ده فعلًا! (هنشرح ده كمان شوية)، لكن خلينا نتكلم بشوية تفصيل عن عدد من الأسباب التانية اللي بتؤدي لظهور العلامات دي من غير ما تكون نتيجة خبطة أو إصابة ما. خلينا نتعرف مع بعض على الأسباب اللي ممكن تؤدي لظهور العلامات دي واللي من ضمنها الزعل.

• نقص فيتامينات:

بعض الفيتامينات بيبقى ليها دور في تصنيع الدم نفسه، وعملية تجلط الدم، وشفاء الجروح، لو حصل نقص في الفيتامينات دي بنسبة طفيفة، فغالبًا مش بيبقى له أعراض، لكن لو زادت النسبة، فممكن تؤدي لظهور الكدمات دي بالشكل ده. مثلًا فيتامين B12 مع حمض الفوليك هما المسئولين عن تخليق DNA كرات الدم الحمراء، وعشان كدة نقصه ممكن يؤدي لظهور العلامات دي، كنتيجة لخلل تصنيع كرات الدم الحمراء.

فيتامين K مهم جدًا في عملية تجلط الدم، ونقصه ممكن يؤدي لترشيح دم الأوعية الدموية، وبالتالي ظهور العلامات دي. كمان نقص فيتامين C المسئول عن تصنيع أو تخليق بروتين الكولاجين وغيره من البروتينات الموجودة في الجلد والأوعية الدموية، بيخلي الأوعية الدموية ضعيفة وأكثر عُرضة للقطع، وبالتالي تكوين الكدمات دي.

• التقدم في السن:

مع التقدم في العمر بيبدأ سُمك الجلد يبقى أقل، والجلد نفسه بيكون شفاف أكتر وشاحب أكتر، كل ده كنتيجة للتغيرات اللي بتحصل في الطبقة الخارجية من الجلد، أما الطبقة الأكثر عمقًا في الجلد واللي بتُسمى الأدمة، فالتغيرات اللي بتحصل فيها مع السن ممكن تؤدي لظهور الكدمات دي بشكل كبير. الأوعية الدموية الموجودة في الأدمة بتبقى أضعف مع التقدم في السن، وده اللي ممكن يؤدي لإنها تتقطع بسهولة أكبر، وبالتالي تنزف بالشكل اللي يخليها تظهر وكأنها كدمة.

• مرض فون ويلبراند:

المرض ده بيُعتبر منتشر إلى حدٍ ما، وبيتميز بظهور الكدمات دي بمنتهى السهولة على الشخص المُصاب بالإضافة لمشاكل تانية متعلقة بالدم، زي مثلًا النزيف الشديد في حالات العمليات الجراحية او في فترات الطمث. الحالة دي بتُصيب حوالي 200 ألف أمريكي في السنة، وهي أشهر حالات  الخلل الوراثي في البشر، والمُتعلقة بتجلُط الدم.

السبب في الحالة دي هو نقص في بروتين ”عامل ويلبراند“، واللي بيُعتبر عنصر مهم في عملية تجلط الدم، وعشان كدة النقص بيكون له التوابع دي.

• رفع الأثقال:

طبعًا رفع الأثقال ممكن يكون حاجة كويسة جدًا، والصيف بقى وفورمة الساحل وكده، لكن زيها زي أي حاجة لو اتعملت بشكل غلط أو بشكل مُفرط، هيكون ليها عواقب. الممارسة المُفرطة لرفع الأثقال ممكن تكون السبب في الكدمات غير المُبررة، لأنه ببساطة ده ممكن يؤدي لإجهاد الأوعية الدموية في الجسم، وتمزقها بسهولة.

• التوتر فيه سم قاتل:

فعليًا التوتر والإرهاق والحزن، بيُعتبروا حالة هرمونية واحدة أو بمعنى أدق متشابهة جدًا، وده لأن الهرومونات اللي بيفرزها الجسم وقت الزعل هي هي اللي بيفزرها كنتيجة للتوتر. التوتر ممكن يؤدي لإجهاد في الأوعية الدموية وبالتالي ده يخليها سهل جدًا إنها تتمزق والدم ينزف منها، وده اللي بيفسر إن في بعض الناس ممكن لما تزعل يظهر عندها العلامات دي تحت الجلد، أو إنهم بيعانوا من نزيف الأنف كنتيجة للانفعال والتوتر.

• مرض السكري:

طبعًا من المعروف إن مرض السكر بيؤثر على مستويات السكر في الدم، عدم الانضباط  في سكر الدم كفيل إنه يؤثر على الدورة الدموية نفسها في الجسم، وبالتالي بيبقى سهل جدًا إن الجلد تظهر عليه علامات الكدمات دي. ارتفاع نسبة السكر في الدم بتؤدي لتلف الأوعية الدموية نفسها، وبالتالي بيبقى سهل إن الدم يخرج منها.

كل الحالات دي وغيرها كمان ممكن تكون سبب في ظهور الكدمات على الجلد بدون مُبرر، فلو حضرتك بتتفاجئ بالكدمات دي، لازم تستشير دكتور لأن ممكن تكون عندك حالة من اللي قولنا عليهم دول، أو تكون بتتعاطى دواء معين بيسبب الكدمات دي، أما لو كان السبب هو بس التوتر الزيادة، فهنا لازم نقول إن التوتر بالفعل ممكن يبقى فيه سم قاتل، وإنه تقريبًا مش بيسيب حاجة في الجسم غير لما ممكن يبوظها. التوتر حصان جامح لازم تتعود تسيطر عليه عشان صحتك.

المصادر: thehealthsite  medicaldaily  dailymail  edition.cnn