يا ترى تمثال رمسيس بالحجم الطبيعي؟

كتبت: يارا كمال

يا ترى الناس في العصور القديمة كانوا عمالقة بالنسبة لنا؟ أحيانًا نسمع كلام شبه إن التماثيل الفرعونية بالحجم الطبيعي، وتلاقي صورة لقبر عملاق جداً ويقول لك ده قبر هابيل، قال يعني إحنا هنقدر نوصل لقبر هابيل في زمننا ده! 😀

يا ترى تمثال رمسيس بالحجم الطبيعي؟

الكلام ده فيه شئ من الحقيقة، بس مش بالمبالغة دي. بالفعل إحنا أجسامنا طولها بقى أقل في العشر ألاف سنة اللي فاتوا وده حصل بشكل تدريجي وبطئ جدًا كمان.

يعني مثلاً لو قيسنا الكلام ده على أجسام الرجال الأوروبيين هنلاقي إنه من أربعين ألف سنة متوسط طول الرجل الأوروبي كان 183 سم، في حين إنه من عشر ألاف سنة بقى متوسط طوله 162 سم ونص.

فيه علماء كتير بيعتقدوا إن التغير المناخي والتعوّد على الزراعة هو اللي خلى حجمنا يقل. المجتمعات الزراعية عانت من سوء التغذية، في حالة مثلا لو المحصول قل أو باظ لأي سبب. كمان ف الوقت ده اعتمد الإنسان بشكل كبير على أكل لحوم الماشية من أبقار وجاموس، وده دخل أمراض جديدة على معرفة الإنسان. وماننساش احتمالية إن العصر الجليدي خلص، وإن الأرض بقت أدفى، فمافيش نفس الحاجة البيولوجية للأجسام الكبيرة عشان تخزن الحرارة في الجو شديد البرودة.

يمكن ده يحسسنا إننا هنفضل نقصر إلى الأبد على المدى البعيد، بس اللي حصل إن في الـ150 سنة الأخيرة، إن متوسط طول الناس في الدول الصناعية زاد ييجي 10 سم. أولاً، لإن الأكل والرعاية الصحية اتحسنوا، وكمان الثورة الصناعية وحدوث طفرة في وسائل الانتقال ساعدت على زيادة اختلاط الشعوب ببعضها، واختلاط جيناتهم ببعض، والحد من آثار زواج الأقارب.

وعليه وباختصار، الفروق اللي حصلت دي كلها في حدود الطبيعي. يعني مفيش حاجة تقدر تقول إن الإنسان كان عملاق أو هيبقى قزم!

المصادر:  australianmuseum  scientificamerican  scientificamerican