الفيديو جيم هيحل مشاكلك!
كتبت: مها طـه
فى دراسة اتعملت على حوالى 200 شاب كلهم بيلعبوا ”فيديو جيم“ كتير، لقوا إن المخ عندهم مختلف عن المخ الطبيعى!
الباحثين لقوا دليل على وجود زيادة فى الاتصال بين الخلايا فى مناطق المخ المختلفة بالإضافة لزيادة مستوى التشتت، الدراسة ركزت على الشباب من سن 10 لـ19 اللي طلبوا المساعدة في التخلص من إدمان ألعاب الفيديو واللي تم تصنيفه كمرض عصبى بالرغم من إنه لسه في حاجة لدراسات كتير لإثبات ده، المهم الشباب قالوا إنهم دول بطلوا ياكلوا أو يناموا بس عشان يكملوا لعب، وتم عمل أشعة على مخهم و مقارنتها مع أشعة لمخ شباب معدل الساعات اللي بيقضوها في لعب الفيديو جيم طبيعي عشان يقارنوا ما بين نشاط المخ فى الحالتين.
أشعة الرنين المغناطيسى اللى اتعملت على المخ لاحظوا فيها نشاط لمنطقة ”salience network“ فى دماغ الشباب اللى بيلعبوا فيديو جيم كتير، والمنطقة دي هي المسئولة عن تحديد ما هو مهم وتركيز قدرات الجسم على أداء المهمة بالشكل المطلوب، فى الحياة العادية الجزء ده بيشتغل عشان يخليك تتفادى عربية مقربة عليك لكن فى عالم الفيديو جيم بيخليك تهرب من طلقات الرصاص الافتراضية اللى بتضرب عليك.
زيادة الاتصال بين خلايا المخ بتزود القدرة على توجيه الاهتمام ناحية أهداف أو مهام معينة والملاحظة الدقيقة للمعلومات الموجودة فى البيئة المحيطة بالشخص، وده اللي قاله ”جيفرى أندرسون“، رئيس فريق البحث فى جامعة يوتا، كما قال إنه التغييرات دى فى المخ بتساعد الشخص على التفكير بطريقة أفضل.
العلماء القائمين على البحث كمان لقوا إنه فى تنسيق بيحصل ما بين خلايا القشرة المخية الأمامية_عند الجبهة_ وخلايا الفص الصدغى _اللى موجودة فى المنطقة اللى فوق خدك_ لكن الاكتشاف ده مُقلق لأن التنسيق ده بيكون مرتبط بحالات الإصابة بالشيزوفرنيا وحالات داون (البَلَهْ المغولي) والتوحد بالإضافة للأشخاص المصابين بضعف فى السيطرة على الانفعالات، وده ممكن يثبت إن ألعاب الفيديو بتزيد من التشتت وبتقلل من الانضباط عند الأشخاص اللى بيلعبوا كتير.
لحد دلوقتى العلماء مش متأكدين هل الاستمرار فى اللعب لمدة سنين هو السبب فى التغيرات دي ولا الاختلافات فى تركيب خلايا المخ من الأول هو اللي أدى لإن شخص معين يميل بشكل كبير ناحية الألعاب دي، لذلك لازم تتعمل الأبحاث والاختبارات على الأشخاص دول بشكل كبير عشان الصورة تكون واضحة وكمان نقدر نعرف تأثير ألعاب الفيديو _بشكل مكثف_ على المدى الطويل على المخ.
التغيرات اللي تم ملاحظتها على زيادة نشاط خلايا المخ هي فى الحقيقة مفيدة لكن من الممكن فى نفس الوقت إنها تسبب مشاكل على المدى الطويل، الأكاديمين القائمين على البحث ده بيقولوا إنه أكتر الأبحاث _اللى اتعملت على الأشخاص اللي بيلعبوا فيديو جيم كتير_ إلمامًا بالفروق بين المخ عند مدمني ألعاب الفيديو جيم وعند غيرهم من الأشخاص الطبيعين، بناءًا على البحث ده فى مجموعة كبيرة من الأبحاث بتشتغل على التعرف أكتر على تأثير ألعاب الفيديو على صحة الجسم والعقل سواء كانت الآثار دى سلبية أو إيجابية.
المصادر
