عن حجم العضو الذكري: ماتشغلش بالك على الفاضي!
كتب: أحمد حسين
خلينا نتكلم بصراحة شديدة، أغلب معلوماتنا الجنسية غالبًا بناخدها من مصادر غلط. يعني لو ولد، فغالبًا معلوماتك الجنسية بتكون من أفلام بورن أو مواقع شديدة الرداءة في الشرح والمحتوى الطبي والعلمي، ولو ربنا كرمك يعني، ممكن تلاقي قناة يوتيوب نضيفة ولا كتاب محتواه كويس تقدر تعرف منه أكتر عن الجنس بشكل عام. أما لو بنت، يبقى الموضوع يا إما معلومات غير صحيحة أو صحيحة بس مش كاملة من واحدة صاحبتك أو مدرسة العلوم في مدرستك أو مامتك يعني في أفضل الأحوال، أو كتاب وأفلام أجنبي يعني، وعدد قليل منهن ممكن يكونوا بياخد ثقافته من أفلام البورن برضه.
البورن .. ثقفني شكرًا!
أفلام البورن دي لوحدها حكاية، فهي في النهاية صناعة للربح مش للتثقيف، هما مايفرقش معاهم يوصلوا لك معلومة ولا لأ، كل اللي يفرق معاهم إنك تتفرج أكتر، فهما يكسبوا أكتر. دلوقتي كمان أغلب قنوات وأفلام البورن بدأوا يتجهوا لتقديم كل ما هو متطرف وكل ما هو معبر عن أقصى الخيالات الجنسية الجامحة عند الإنسان فيما يتعلق بالممارسات نفسها.
ممثلة أفلام البورن مثلًا لازم تكون ذات مواصفات معينة، وبتختلف المواصفات دي كل فترة حسب ذوق الناس أو ذوق خيالاتهم في الفترة دي، وغالبًا يعني المواصفات دي مابتكونش بالضرورة طبيعية أو واقعية أصلًا، سواء بسبب المكياج أو التصوير أو عمليات الشفط والنفخ إلخ إلخ.
أما ممثل أفلام البورن فلازم برضه يكون على حسب الفترة، يعني زمان مثلًا كان يُفضل يكون راجل شكله مقبول وشعره شكله نضيف (بمعنى أدق مسبسب)، حليق الذقن، جسمه مظبوط من غير لا عضلات بطن ولا حاجة وحجم القضيب عنده عادي. من السبعينات أو التمانينات تقريبًا، بدأت تظهر موضة الشباب اللي تبان عليهم ملامح الفحولة والقوة، ومع مرور الزمن، بدأوا يظهروا بعضلات متفرقة في مختلف أنحاء الجسم ما شاء الله وتغييرات من هنا وهناك علشان يناسبوا مواصفات الفترة دي.
اختيار الممثلين دول بقى بيخضع لأي معايير؟
بيتم اختيار الممثلين وفقًا لاختبارات بيمروا بيها علشان يعرفوا حجم القضيب في الانتصاب وعدمه، وبيختاروهم بمواصفات معينة للشكل والحجم، يا إما بقى عمليات جراحية، ودي ممكن تؤدي لتشوهات وضعف انتصاب وأمراض تانية، بس دي مش بتبقى مشكلة القائمين على الصناعة! وده كل اللي بتحتاجه أفلام البورن، إنها تصدر لك صورة ممتعة عن كل الخيالات اللي في دماغك، ومش مهم الصورة دي تكون واقعية، المهم إنها تعجبك.
إيه هو الحجم الطبيعي للقضيب؟
طيب، هو إيه حجم القضيب الطبيعي؟ مبدئيًا كده، الحجم ده مرتبط بحاجتين، الطول والمحيط. في دراسات كتير اتعملت على الموضوع ده، والسبب إنه حوالي 45% من الرجال حاسين إن قضيبهم صغير (والشكر لأفلام البورن). الدراسات دي كلها اللي اتعملت على مستوى العالم كله وجدت إن متوسط حجم قضيب الرجل منتصبًا بيتراوح ما بين 12 إلى 16 سنتيمتر، والقضيب غير المنتصب بيترواح ما بين 7 إلى 10 سنتيمتر.. ده بالنسبة للطول، أما المحيط فالمنتصب بيكون محيطه حوالي 12 سنتيمتر وغير المنتصب بيكون حوالي من 9 إلى 10 سنتيمتر.
إمتى يبقى القضيب صغير جدًا ويحتاج لاستشارة طبيب؟
نُشرت دراسة في جريدة الصحة الجنسية (The Journal of sexual medicine) ومجلة جراحة المسالك البولية (Journal of urology)، بتقول إن طول القضيب لما يكون غير منتصب أقل من 4 سنتيمتر ولما يكون منتصب أقل من 7.5 سنتيمتر، ساعتها الشخص بيكون محتاج يستشير طبيب لأنه الموضوع هيكون غالبًا محتاج تدخل جراحي لإن عمق المهبل عند الست من الداخل بيتراوح ما بين 6.8 و14.8 سنتيمتر، فصغر حجم القضيب لهذه الدرجة شيء مش شائع وبرضه كبره شيء مش شايع زي إنه يكون أكبر من 20 سنتيمتر مثلًا.
في دراسة لطيفة جدًا اتعملت في كندا عن أحجام القضيب المختلفة حسب البلاد، الدراسة دي شملت 80 بلد من ضمنهم مصر. نتائج الدراسة دي كانت إن أكبر بلد من حيث متوسط حجم القضيب كانت الكونغو (18 سم) والأكبر كقارة كانت أمريكا الجنوبية (16 سم) والأصغر كانت كوريا الشمالية (9.5 سم) أما المتوسط كان (14 سم). أما بالنسبة لبلدنا الحبيب مصر، فالحمدلله ما خذلتناش في دي وكان متوسط الحجم فيها (15.7 سم). فأحب أطمن الجميع إننا زي ما قال محمد صبحي في مسرحية ”الهجمي“: عراقة .. أصالة .. فحولة .. رجولة!
”ياختي كده ينفع وكده ينفع“ شعارًا!
يعني عمومًا الموضوع متغيّر ومختلف على حسب كل بلد، لكن في بعض الرجال بيتطور معاهم حالة القلق لإنهم فعلًا يحسوا بإنهم فاقدين القدرة على الاتصال بأي ست، مع إنه الستات في الأساس مابيكونوش شايفين إنه التفضيل للراجل ذو الحجم الضخم، لسببين في اعتقادي؛
أولًا: إحنا مش في العصر الحجري والناس بقت بتلبس هدوم، ثانيًا: 85% من عينة من الستات أجريت عليهم دراسة بريطانية شايفين إنهم راضيين جدًا عن شركاء حياتهم لأنه في الأساس الموضوع نفسي بحت، والمهم الشخص نفسه مش حجم القضيب عنده خالص.
في دراسة اتعملت سنة 2012 بتقول إنه في بعض الأحيان، موضوع الحجم ده بيفرق، بس بيفرق عند مين بالظبط وليه؟! الدراسة بتقول إن موضوع الحجم ده بيفرق عند الستات اللي بيفضّلوا النشوة الجنسية اللي بتيجي مع الاتصال المهبلي، ثانية واحدة! هو في نشوة جنسية بتيجي من حاجة غير الاتصال المهبلي؟ أيوه، النشوة الجنسية عند معظم الستات بتيجي من 3 مواضع: المداعبة الخارجية للبظر، وفي منطقة الـ(G-Spot) ودي نقطة موجودة داخل المهبل تقريبًا في الثلث الأول منه، وعند الاتصال المهبلي الطبيعي أو المتعارف عليه.
وعليه النساء اللي بيفضلوا النشوة الجنسية المتتالية أو النشوة الجنسية اللي بتحصل نتيجة الاتصال الجنسي، هما بس اللي بيفضلوا يكون حجم القضيب أكبر شوية من المتوسط. في الأساس كمان، بعض الدراسات بتقول إن النواقل العصبية اللي موجودة في المهبل مختلفة عن النواقل اللي موجودة في البظر، ده غير إنها في أحيان كتير بتكون أقل منها في العدد وفي الحساسية كمان. فوق كل ده بقى، إن المهبل عند الست برضه مش بييجي بمقاس standard بل إن دايرة اتساعه بتختلف من ست لتانية ففي ست مهبلها ضيق وست تانية مهبلها أوسع وإن المهبل أصلًا بيتأثر بعوامل تانية بتؤثر على اتساعه وأشهر العوامل دي الولادة مثلًا، وده طبيعي جدّا إن كلنا بالبلدي كده نيجي بمقاسات مختلفة من شخص للتاني.
فمن الأخر وباختصار شديد، الوصول للرضى الجنسي عند الطرفين مالوش أي علاقة بالشكل الخارجي للجسم، جزء كبير من الموضوع بيعتمد على الجانب المعنوي. في أحد الجامعات الاسكتلندية، بعض الباحثين عملوا بحث عن الموضوع ده، واكتشفوا إن صفات زي الثقة والشخصية الممتعة والانجذاب ومحبة الشخص نفسه كلها صفات بتتفوق بشكل واضح على فكرة حجم القضيب. فاللي حاطط الموضوع في دماغه ومسبب له أزمة إنه مايشغلش باله على الفاضي، إنتوا زي الفل.
