شاهد: خضروات وفواكه قبل وبعد!
كتبت- مها طه
كلنا بنستنى الصيف عشان ناكل حتة بطيخ ساقعة تخفف عننا الحر، ولا الموز لما تفطر بيه الصبح، أو لما تمشى فى الشتا على الكورنيش و انت بتاكل ذرة مشوى، لكن عمرك سألت نفسك هى الحاجات اللى بناكلها دى كلها فعلًا كان شكلها كده من زمان؟ من قبل حتى ما نبدأ ناكلها!!
طبعًا كلنا بنسمع عن الخضراوات والفاكهة المُعدلة وراثيًا، أو بالمعنى الشائع المُهجنة، وهى الفاكهة و الخضراوات اللى شكلها بقى متغير عن شكلها زمان فمثلًا تلاقى دلوقتى خوخ حجمه كبير بشكل ملحوظ عن الخوخ اللى كنت بتاكله من 15 سنة.
والحقيقة إنه التعديل الوراثى هو اللى بيغير من شكل و طعم الفواكه و الخضراوات دى، لكنه مش بس ظهر فى الوقت الحاضر، البشر بالفعل غيروا كتير من جينات الفواكه والخضراوات على مر آلاف السنين عشان يوصلوا لطعم أفضل و شكل أحسن و مميزات تانية كتيرة.
الخضراوات و الفواكه المُعدلة وراثيًا بيكون دخل على تركيبها الجينى جينات من كائنات تانية زى البكتريا مثلًا، وده بيخلى النبات الجديد يبقى له صفات أفضل زى إنه مثلًا يبقى مقاوم للآفات.
النباتات دى بقى المزارعين بيختاروها ويخلوها تتزاوج من بعضها عشان يضمنوا انتقال الصفات الجديدة دى للأجيال الجاية من النباتات دى، ومن الموز للباذنجان للبطيخ وغيرهم فواكه وخضروات تانية بقى شكلها مختلف تمامًا عن الشكل اللى كانت عليه قبل ما البشر يبدأوا يزرعوها ويعتمدوا عليها فى أكلهم.
1- البطيخ:
اللوحة دى رسمها الفنان الإيطالى ”جيوفانى ستانشى“، بيصور فيها البطيخ وقتها واللى طبعًا بالنسبة لنا مختلف بشكل كبير عن البطيخ اللى نعرفه كلنا، اللوحة موضحة شكل بطيخة زمان، البطيخ كان عبارة عن 6 حُفر مثلثة موجود جواها البذر، كأنه جواه دوامات، اللوحة دى اترسمت فى الفترة ما بين 1645 و1672 يعنى فى القرن ال17.
بمرور الوقت ظهر الشكل الجديد من البطيخ، واللى إحنا عارفينه دلوقتى، اللى من جوا كله أحمر_طبعًا لو حلو_.
بعض الناس كانوا بيعتقدوا إن البطيخ اللى فى اللوحة دى هو مجرد بطيخ مش ناضج أو بيعانى من الجفاف، لكن البذر اللى موجود جواه وواضح بيقول غير كده، وإن ده كان شكل البطيخ فى الوقت ده.
2- الموز:
أول مرة تمت فيها زراعة الموز كان من حوالى 7000 سنة على الأقل، وممكن كمان يكون قبل كده من حوالى 10000 سنة، فى المنطقة المعروفة دلوقتى بغينيا الجديدة.
كمان الموز كان بيتزرع فى جنوب شرق آسيا، والموز الموجود دلوقتى جه عن طريق تهجين نوعين مختلفين من الموز Musa acuminata و Musa balbisiana. النوعين دول بذورهم كبيرة وصلبة زى اللى باين فى الصورة دي، الموز المُهجن الموجود دلوقتى قشرته سهل إزالتها جدًا مقارنة بالأنواع القديمة منه، كمان بقى طعمه أحلى ومليان مغذيات كتير، ومن غير بذر أصلًا.
3- الباذنجان:
على مر التاريخ كان الباذنجان موجود وبيختلف فى أشكاله و ألوانه، زى الأبيض، الأزرق السماوى، والبنفسجى. الأصفر زى اللى موجود فى الصورة دي، بعض الأنواع القديمة منه كانت بتتزرع فى الصين، الأنواع البدائية منه كانت ليها أشواك على المكان اللى بيربط جذع النبات بالزهرة. تهجين الأنواع دي أدى لتخلصها من الأشواك، وخلى حجمها يبقى أكبر ،وخدت الشكل البيضاوى واللون البنفسجى اللى كلنا نعرفه دلوقتى و المألوف بالنسبة لنا.
4- الجزر:
أول معرفة بنمو الجزر كانت فى القرن العاشر فى آسيا الصغرى، ويُعتقد إن لونه كان أبيض أو بنفسجى، وله جذور رقيقة ومُتشعبة، زي اللى ظاهرة فى الصورة دى، لكنه فقد اللون البنفسجى وأكتسب مكانه اللون الأصفر. المزارعين خدوا الجذر اللى جذوره بيضاء و رقيقة و له نكهة قوية ومميزة وزهرته بتنمو كل سنتين، وقدروا يطوروه وصولًا للجزر اللى إحنا نعرفه دلوقتى بجذور كبيرة و طعم حلو ولونها برتقالى، وبقت محصول سنوى شتوى.
5- الذرة:
أشهر مثال بقى لفكرة التعديل الوراثى دي هى الذرة الحلوة الموجودة فى أمريكا الشمالية، الأنواع البدائية منها كان شكلها أشبه بالبسلة دلوقتي بس على رفيع زي اللى فى الصورة كده، ودى كانت موجودة من حوالى 7000 سنة قبل الميلاد، وكانت جافة زي البطاطس كده، وده طبقًا للمعلومات اللى كتبها مدرس كيمياء اسمه ”جيمس كينيدى“.
حاليًا الذرة بقى حجمها أكبر بحوالى 1000 مرة من اللى كانت عليه من 9000 سنة، وتقشيرها و نموها بقى أسهل بكتير، كمان نسبة السكر فيها بقت 6.6%، بعد ما كانت نسبة السكر فيها 1.9% بس، وده بردضه وفقًا لكينيدى، أكتر من نص التغييرات دى حصلت من القرن الـ15 لما بدأ المستوطنين الأوروبين يستقروا فى أمريكا و يزرعوها هناك.
6- الخوخ:
حتى الخوخ اللى نعرفه دلوقتى مش هو الخوخ اللى كان موجود زمان، الخوخ البدائى كانت ثماره صغيره، شبه الكريز واللحم فيه قليل، الخوخ ظهر لأول مرة من حوالى 4000 سنة قبل الميلاد عند قدماء الصينين، وكان طعمه مالح شوية ويشبه العدس، لكن بعد آلاف السنين من زراعته بصورة تلقائية وصل للشكل اللى نعرفه دلوقتى من الخوخ، بقى حجمه أكبر بحوالى 64 مرة، مسكر أكتر بنسبة 4%، وفيه عصارة أكتر ب 27%، وبكده بقى لو جه حد يقولك انت مش لازم تاكل فاكهة و خضروات مُعدلة وراثيًا قول له فى الحقيقة إحنا أكلناها فعلًا.
المصادر
