تقنية النانو : عشان نبقى متفقين يعني إيه ”نانو“ !
كتبت: مها طه
كل فترة تظهر على السوشيال ميديا مقالات أو أخبار عن تطبيق جديد باستخدام تقنية النانو، أو يرجع الكلام عن نجاح دكتور مجدي يعقوب والفريق البحثي المعاون له في بناء سقالات من النانو لانتاج أول قلب بشري من خلايا الجذعية، لكن يا ترى هو إيه النانو ده أصلًا؟!
تقنية النانو!
مصطلح بيتردد كتير، مش متأكدين من نسبة قد إيه من الناس عندها فكرة بخصوص النانو: هو إيه؟ ليه تقنية؟ كل اللي أغلبنا يعرفه عن تقنية النانو إنها حاجة كويسة جدا ساعدت في إيجاد حلول لأمراض كتير كانت مستعصية لحد فترة قريبة. التقنية دي بتفيدنا إزاي؟ هل استخداماتها طبيا بس؟ ده اللي هنعرفه حالًا ..
أولا خلينا نعرف إيه هو النانو؟
النانو هو وحدة قياس = جزء من المليون من الملليمتر. عشان تتخيل معايا أكتر مدى تناهي صغر وحدة النانو، إحنا متفقين إن المتر فيه 100 سم. السم الواحد فيه 10 مللي. النانو جزء من المليون من الملليمتر ده.
تقنية النانو هى تقنية بتشتغل على مستوى الجزيئات والذرات التى تقاس أبعادها بالنانومتر. كل ما على الأرض من أي حاجة ممكن نتخيلها بيتكون من عدد لا نهائي من الجزيئات والذرات، جسمنا، الأكل اللي بناكله، الميه اللي بنشربها، البيوت اللي بنسكن فيها، إلخ.
التقنية عادةً ما تتعامل مع القياسات اللي تتراوح من 0.1 إلى 100 نانومتر. أما عن تطبيقات النانو فهي بتُستخدم في مجالات متنوعة منها : الكيمياء – الطب – الهندسه الميكانيكيه – الاتصالات – الهندسه الحيويه .
لكل شيء أصل وبداية.. ما أصل النانو؟
بداية ظهور علم النانو كانت على يد العالم الفيزيائى الشهير “ريتشارد فاينمان”عام (1959) قبل فترة طويلة من ظهور مصطلح تقنية النانو. فاينمان وصف النهج أو الطريقة اللى ممكن إتباعها للتحكم فى ذرات وجزيئات على المستوى ده من تناهي الصغر.
بعدها تقريبا بـ10 سنوات من الأبحاث صاغ العالم “نوريو تانجويتشى” مصطلح ” تقنية النانو”. مع التطور العلمى للميكروسكوبات أمكن رؤية الذرات والجزيئات بشكل مفرد _يعني كل وحدة على حدا_ ومن هنا بدأ فعليا عصر تقنية النانو.
إيه أهمية تقنية النانو بالنسبة لنا ؟
أهمية تقنية النانو واستخداماتها لا تقتصر على رؤية الذرات والجزيئات لكن كمان التحكم بيها. بالرغم من أن علم النانو يعتبر من العلوم الحديثة نسبيا إلا إنه استُخدم من مئات السنين فى صنع الألوان للرسم على نوافذ الكنائس فى القرون الوسطى باستخدام جسيمات دقيقة من الذهب والفضة، بالتأكيد فى الوقت ده ماكنش الفنانين فاهمين أوي طبيعة التقنية التى أدت لتغيير تركيب المواد دي وبالتالى إمكانية استخدامها في لتلوين .
بعد انتشار مصطلح تقنية النانو بدأ العلماء فى التفكير فى إمكانية بناء آلات على المستوى الجزيئى أي باستخدام الجزيئات اللي لا تتعدى أبعادها بعض النانومترات، بالإضافة إلى استخدامها فى تصنيع الروبوتات والمحركات وحتى كمبيوتر كامل متناهى الصغر.
تمكنت التكونولوجيا من تطوير فكرة استخدام الجزيئات كوحدة بناء للهياكل البسيطة زي (الأسلاك الكهربائية اللي بتتكون من هياكل جزيئية بسيطة تسمح بانتقال الالكترونات بينها لتوصيل اكهرباء). باكتشاف تقنية النانو أصبح من الممكن تطويع الأفكار دي في بناء أشكال أبسط تعتمد على جزيئات بحجم النانو.
تقنية النانو ممكن يكون لها تأثير واضح على معظم الصناعات، وده هيتيح استخدامها لتصنيع مواد أفضل تركيبًا، وأطول عمرًا، وأكثر نظافة وأمانًا لاستخدامها فى المنازل، فى الاتصالات، فى الطب وغيرها .
تخيل مثلا جهاز طبى مصنوع بجزيئات متناهية الصغر يقدر يتحرك داخل جسم الإنسان للقضاء على تجمعات الخلايا السرطانيه قبل انتشارها أو صنع صندوق صغير بحجم قطعة السكر يحتوي على المحتويات الكاملة لمكتبة الاسكندرية أو صنع مواد أخف وزنًا من الصلب ولها نفس القوة.
كأى اكتشاف علمى جديد يفتح الباب للتساؤل عن أضراره أو إمكانية الاستخدام السئ له. تقنية النانو سلاح ذو حدين، زي ما ليها استخدامات هتصنع فارق في معظم مناحى حياتنا، فالفكرة الأساسيه ليها قد تتيح تصنيع أسلحه متناهية الصغر وذات قوة تدميرية رهيبة.
و من هنا يمكن القول بأن تقنية النانو تقدر تساهم في ثورة علمية على مستوى القوة والدقة فى الصنع والكفاءة والانتاجية. ويتوقع العلماء استمرار تقنية النانو فى التطور على مدار الـ 20 سنة الجايين لحد تبلور الفكرة تمامًا ويصبح استخدامها ببساطة استخدام الكمبيوتر والإنترنت فى الحياة اليومية.
عن تطبيقات النانو في الطب كمل معانا ….
عن تقنية “النانو” والطب: الثنائي الأنجح!
المصادر:
- science
- understandingnano
- nano
