7 من أجمل الأماكن السياحية اللي عمرك ما زرتها في سينا
كتبت: مها طــه
في بداية سنة 2008، كانت أول مرة أزور سيناء في حياتي، وطبعًا زي أي حد رايح يتفسح تبع شركة سياحة، بتكون أماكن الزيارة محدد مسبقًا، شرم الشيخ ودهب وسانت كاترين ومؤخرًا ظهرت رأس شيطان كمان على القائمة. أكتر حاجة لفتت نظري وقتها هو إن الطبيعة في سيناء “بِكر” لسة أيادي البشر وإهمالهم وقدرتهم الخارقة على التشويه ماوصلتش هناك إلى حد كبير.
في الطريق لفت نظري مرورنا على محمية رأس محمد ولأني كنت وقتها طالبة في الثانوية العامة ونفسي أدخل كلية العلوم وشغوفة بعلم الأحياء، زعلت جدًا إن برنامج الرحلة كان بس بيحتوي على الجانب الترفيهي، مع عدم ترك أي مساحة للجانب البيئي والعلمي، اللي بالمناسبة ممتع برضه على فكرة.
7 من الأماكن السياحية اللي ماتعرفهاش في سيناء
- محمية رأس محمد:
رأس محمد من أكتر المحميات المشهورة في مصر، موجودة في محافظة جنوب سيناء وتحديدًا في الجزء الجنوبي منها على بعد حوالي 12 كم من شرم الشيخ. وبتعتبر جزيرتي تيران وصنافير جزء من المحمية، اللي تم إعلانها كمنطقة حماية سنة 1983. وبتعتبر محمية طبيعية لأشجار المانجاروف ومواقع الشعاب المرجانية.
محمية رأس محمد بتكتسب شهرة عالمية كأفضل مكان لممارسة رياضة الغطس، لاحتوائها على حفريات في الصخور بيتراوح عمرها من بين 75 ألف لـ20 مليون سنة، ده غير إنها من المناطق الغنية جدًا بالشعاب المرجانية (208 – 218 نوع).
رأس محمد كمان بتعتبر مثال رائع للتنوع البيولوجي، بيعيش فيها عدد كبير من الأسماك الملونة، والسلاحف البحرية المهددة بالانقراض للأسف، ده غير مجموعة مختلفة من الطيور والزواحف، وبالطبع أشجار المانجروف اللي بتعتبر من أهم النباتات اللي بتختزن الكربون داخلها وتساهم في حماية البيئة من تزايد نسبته في الجو.
- سانت كاترين:
منطقة سانت كاترين تعتبر من المناطق المشهورة في الزيارات بتقع في محافظة جنوب سيناء، وبالطبع من أشهر المزارات في المنطقة هي دير سانت كاترين، اللي بيجمع الديانات السماوية التلاتة (اليهودية والمسيحية والإسلام) في نفس المكان، وبيعتقد إنه المكان اللي كلم فيه موسى ربنا وتلقى فيه الوصايا العشر، تحديدًا على جبل سيناء.
منطقة سانت كاترين تم إعلانها كمنطقة محمية سنة 1988، وبتمتد لمسافة 425 كم2 ، وبتتميز بسلاسل جبال سانت كاترين وأشهرهم جبل سانت كاترين اللي بيعتبر أعلى قمة في مصر، وبيحتوي على عدد من الوديان زي وادي الأربعين والرها وفيران.
منطقة سانت كاترين من أغنى مناطق مصر وأكثرها جاذبية للسياحة عمومًا، لتنوعها الثقافي والديني، ده غير انتشار النخل فيها، ده غير الحيوانات اللي صعب تشوفها في أماكن تانية، زي الغزلان البرية والوعل النوبي والفهد السيناوي والذئاب والتعابين والقنافذ كمان.
- محمية نبق:
وبما إننا لسه مع جنوب سيناء، فلازم نتكلم عن محمية نبق، ودي محمية بتقع في جنوب خليج العقبة على بعد حوالي 40 كم من ساحل مدينة شرم الشيخ، وتم إعلانها كمحمية طبيعية سنة 1992، وبتمتد لمسافة 600 كم مربع، منهم حوالي 440 كم مربع أراضي ساحلية، وحوالي 160 كم مربع في مياه خلج العقبة.
محمية نبق بتتميز بانتشار أشجار المانجروف، ده غير انتشار الشعاب المرجانية وأعشاب البحر وغيرها من كائنات البيئة البحرية، غير الجبال والكثبان الرملية والأودية، وطبعًا بتنتشر فيها أشكال مختلفة من الحياة البرية زي الماعز الجبلي والغزلان والزواحف والطيور المهاجرة.
- أبو جلوم:
ودي في منطقة دهب، اللي مؤخرًا بقت من المناطق السياحية المشهورة، وطبعًا هناك ممكن تمارس كل أنواع الرياضات المائية زي الغطس والغوص (سنوركلينج). وكمان تستمتع بالجانب البيئي في المكان اللي بيسمح لك تشوف الشعاب المرجانية وأعشاب البحر ده غير الكثبان الرملية والجبال. وعمومًا طبيعة المكان بتخليه جذاب جدًا للسياحة، نظرًا لتميزه بنظام الكهوف اللي تحت المياه. المنطقة تم إعلانها كمحمية سنة 1992.
- طابا:
طابا هي واحدة من المدن المصرية الشهيرة، واللي تم إعلانها كمنطفة محمية سنة 1998، وتعتبر أكبر محمية في جنوب سيناء، نظرًا لإنها بتمتد من الحدود الشمالية لأبو جلوم ولحد الساحل الشمالي لخليج العقبة، لمسافة 3590 كم.
المنطقة في طابا تعتبر جاذبة جدًا للسياحة البيئية وخصوصًا رحلات السفاري والتخييم، وبتظهر فيها تراكيب جيولوجية فريدة من نوعها بترجع للعصر الطباشيري، ده غير المناظر السياحية الخلابة سواء على ساحل البحر أو في الصحاري الممتدة، وأخيرًا كونها بتتمتع بتنوع بيولوجي كبير (25 نوع من الثدييات و 50 نوع من الطيور النادرة و24 نوع من الزواحف).
- الزرانيق:
منطقة الزرانيق بتقع في محافظة شمال سيناء، ويمكن ده السبب اللي بيخليها مش معروفة أوي بالنسبة لمحميات جنوب سيناء. تم اعتبار الزرانيق والبردويل كمنطقة محمية سنة 1985، وبتقع على بعد حوالي 35 كم من مدينة العريش، شرق ساحل البحر المتوسط في شمال سيناء، وبتمتد لمساحة 230 كم مربع.
المنطقة دي بتعتبر من مناطق الأراضي الرطبة الموجودة في مصر، واللي بتجتذب سنويًا مئات الآلاف من الطيور المائية المهاجرة، اللي بتيجي من أوروبا وآسيا وتركيا وروسيا في فصل الخريف. كمان هي بتعتبر مكان مناسب جدًا لاحتضان بيض أنواع مهددة بالإنقراض من السلاحف البحرية. في المنطقة دي تقدر تشوف أنواع مختلفة من الطيور اللي غالبًا متقدرش تشوفها غير هناك، زي طيور الفلامنكو الكبيرة والبجع الأبيض والنسر الذهبي.
- الأحراش:
ودي واحدة من أجمل الأماكن في مصر، اللي بتقع في الشمال الشرقي لشبه جزيرة سيناء، تم إعلانها كمنطقة محمية سنة 1985، وبتمتد لمساحة 6 كم مربع، وبتنتشر فيها أنواع مختلفة من الأشجار زي شجر السنط والنضار والكافور وغيرهم من النباتات اللي بتتحمل حياة الصحاري وبتنمو في الكثبان الرملية.
في النهاية، مصر حقيقي جميلة، مليانة بأماكن كتير ممكن تكون جاذبة سياحيًا وكل اللي محتاجاه بس شوية دعاية واهتمام، وعشان كده عملنا لكم المقال ده واستنونا في المقال الجاي واللي هنجيبلكم فيه أماكن تانية جديدة وجميلة في عدد من محافظات مصر الجميلة.
اعرف أكتر| البيئات المصرية المختلفة: 7 ألاف سنة تنوع بيولوجي وأكتر
المصادر: sis.gov bedawi touregypt sinaimonastery ancient-origins allsinai
