5 حيوانات بيحلموا بالتزاوج طول حياتهم وبعد ما يحصل بيموتوا!
كتب: أحمد حسين
الحيوانات بيمرّوا بحياة تشبهنا شوية، يعني بيتولدوا وبعدين يكبروا ويتطوّروا ويتعلموا بعض المهارات، وبعدين يبلغوا ويحلموا بالتزاوج ويسعوا له، وبعدين يلاقوا شريكة ويتزاوجوا ويخلّفوا، والأطفال يمروا بنفس دورة الحياة دي وهكذا. بس تخيلوا إن في بعض الحيوانات اللي بيحلموا بالتزاوج طول حياتهم، أول ما ده يحصل فعلًا بيموتوا للأسف!
التزاوج والموت
الحيوانات اللي بيموتوا بعد التزاوج بيُطلق عليهم اسم “Semelparous Animals”، وبيحصل لهم ده، نتيجة إنهم بيحطّوا قدر كبير جدًا من الطاقة في عملية التزاوج، لأنهم في الغالب مابيقدروش يعيشوا كتير. هشرح لكم أكتر، في مثلًا حيوان اسمه “Antechinus” شكله قريب جدًا من الفيران، بيعيش أقل من سنة، وبيمارس الجنس/التزاوج لمدة 14 ساعة في اليوم في موسم التزاوج بتاعه.
طبعًا فكرة 14 ساعة دي حاجة مبهرة، بس للعلم دي نقمة مش نعمة خالص، لأنه خلال الـ 14 ساعة دي، بيحتاج بروتينات وطاقة كبيرة جدًا، للدرجة اللي بتخلّي الشعر اللي موجود على جسمه يقع. فببساطة، بما إنه بيعدّي بموسم تزاوج واحد، بيستغله أفضل استغلال ممكن، ولازم خلاله يتأكد إن أنثاه هتولد. نقدر نقول يعني، إن بعض الحيوانات اللي زيه، بيختاروا التزاوج بدلًا من إنهم يعيش لمدة طويلة. وهنا ما اتفقنا، هنتكلم عن 5 حيوانات بيمروا بنفس الموضوع.
ذكر النحل – Drones
خلية النحل من أكتر البيوت اللي بنشهد لها بالتنظيم. بتتكون من 3 أنواع من النحل، العاملات ودول اللي بيشتغلوا طول الوقت تقريبًا، وفيه الملكة ودي أكثر الإناث خصوبة، وفي ذكر النحل، ودول بقى أغلبهم مابيعملوش أي حاجة خالص، غير إنهم بيستنوا موسم التزاوج، وخلاله بيحصل تزاوج بين عدد كبير منهم وبين ملكة النحل، وبيحطّوا كل طاقتهم فيه، لدرجة إنهم بيموتوا بعده على طول. حياة بسيطة مش كده؟
سلمون المحيط الهادي – Pacific Salmon
سمك السلمون بيهاجر في رحلة طويلة جدًا، وبيعدّي أنهار وشلالات وبيواجه التيّار، كل ده علشان يختار مكان مناسب للبيض، اللي هيخرج منه الجيل الجديد من أسماك سلمون المحيط الهادي. المهم أول ما يوصلوا للمكان المناسب، بيبدأوا في التزاوج، وأول ما الإناث يضعوا البيض بيموتوا، أما الذكور فبيفضلوا عايشين شوية، قد شهر كده مثلًا، لا بياكلوا ولا بيعملوا أي حاجة غير إنهم بيحموا البيض، وبعد ما يتأكدوا من إنه فقس وسليم وكله تمام، بيموتوا هما كمان لأنهم بيكونوا فقدوا طاقة كبيرة جدًا خلال فترة الحماية دي. وطبعًا الأجيال الجديدة دي، بتبدأ نفس الرحلة من أول وجديد، وبينتهوا إلى نفس النهاية، في دايرة مغلقة مستمرة وعابرة للأجيال.
أخطبوط البحر العميق – Deep-sea Octopus
أحد أنواع أخابيط البحر العميق اسمه “Graneledone Boreopacifica”، أنثاه بعد التزاوج، بتفضل عايشة بس علشان تحمي البيض، وده موقف شبيه بسمك السلمون، بس الفرق إن ده بتعمله الإناث مش الذكور. المهم يعني إنهم بيستنوا كتير جدًا جنب البيض، لمدة ممكن توصل لـ 53 شهر كاملين، وطول الوقت ده مابياكلوش خالص، وبعد ما البيض يفقس بتموت. أما الذكر، فبيموت بعد التزاوج بوقت قليل جدًا، زي أنثى سمك سلمون المحيط الهادي كده. نقدر نقول إنها القصة نفسها، بس معكوسة بين الجنسين.
الطفليات ملتوية الأجنحة – Twisted-wing Parasites
الطفليات دي بتعيش حياة غريبة جدًا. في البداية، الإناث بيدخلوا جوه حشرات تانية، زي النحل والدبابير، وكل اللي ظاهر منها هو الجزء اللي هتستخدمه في التزاوج مع الذكر. أما الذكر بقى فبيجي ويتزاوج معاها وهي جوة الجسم الغريب ده، وبعدين بيموت. هي بقى، بتستنى لحد ما البيض يتفقس جوّة الحشرة دي، وبعدين الأطفال/الوِلدة بياكلوها _الأم يعني_ من جوّة لبرّة قبل ما ينطلقوا خارج الحشرة ويمارسوا حياتهم ويعيدوا الكرة سواء إناث أو ذكور. الأمومة صعبة مش كده؟
حرباء لابورد – Labord’s Chameleon
تقريبًا كل سنة، بيموت الجيل كله من النوع ده، وبيطلع بداله جيل جديد تمامًا. دورة حياة حرباء لابورد بتبقى حوالي 4 أو 5 شهور، فيهم بقى بيكبروا ويبلغوا ويتزاوجوا، وبعدها بشوية يموتوا. هي في النهاية حيوانات مش منتشرة أوي، وبتعيش بشكل أساسي في جزيرة في مدغشقر. ورغم سرعة وصولهم للبلوغ والتزاوج، بيفضلوا في أعداد قليلة علشان بيموتوا بسرعة.
المصادر: popsci nationalgeographic nationalgeographic
