الفياجرا النسائية: مضاد اكتئاب تحول بالصدفة لمنشط جنسي!
كتبت: مها طـه
في 2015، تمت الموافقة من إدارة الأغذية والأدوية (FDA) على عقار “Addyi” المعروف باسم الفياجرا النسائية، لعلاج حالات البرود الجنسي وفقدان الرغبة الجنسية لدى السيدات، ومن وقتها كان الموضوع بيظهر ويختفي على فترات في مصر. لحد الأسبوع اللي فات مع إعلان وزارة الصحة عن الموافقة على طرح العقار في الأسواق المصرية ومن المنتظر عقد مؤتمر صحفي يوم الأربعاء الجاي بخصوصه.
من أول الإعلان عن طرحه في الأسواق المصرية بدأ الجدل حوله، أسئلة كتير حوالين استخدامه وسعره والحالات اللي بيعالجها فعلًا وهل ممكن يكون حل فعّال لمشكلة المختونات في مصر والأهم هل له آثار جانبية خطيرة ده غير طبعًا التحفظات الأخلاقية والدينية اللي عند بعض الناس. كل الأمور دي هنحاول نجاوب عليها في مقالنا ده.
الفياجرا النسائية: علاج عن طريق الصدفة
بدأت القصة بمادة اسمها “فليبانسرين” ودي المادة الفعّالة في الفياجرا النسائية، المادة دي تم تطويرها في الأصل عشان تُستخدم كمضاد للاكتئاب، لكن وبعد إجراء عدد من التجارب السريرية، تمت الموافقة عليها كعلاج لحالة (FSIAD) أو ما يعرف باضطراب الإثارة/ الرغبة الجنسية عند السيدات.
تناول مادة الفليبانسرين بيرفع من مستويات هرمونات الدوبامين والنورادرينالين في الجسم بانتظام وفي نفس الوقت بيقلل من مستوى السيراتونين. الدوبامين والنورادرينالين هرمونات مهمة للشعور بالإثارة الجنسية، حيث إن الدوبامين بيعزز الرغبة الجنسية و النورادرينالين بيعزز الإثارة الجنسية.
تمت الموافقة على الفياجرا النسائية بعد 3 مراحل من التجارب السريرية على المشاركات وظهرت النتائج ايجابية، لكنها تعتبر متواضعة نسبيًا بالمقارنة مع عقار الفياجرا الرجالي، اللي بالفعل كانت نتايجه عظيمة جدًا في علاج ضعف الانتصاب.
بالمناسبة كل التجارب تم اجرائها على سيدات قبل سن انقطاع الدورة الشهرية – سن اليأس- ولذلك العقار ده غير مصرح بيه للسيدات اللي وصلوا لسن انقطاع الدورة الشهرية، وعليه لازم إجراء تجارب كتير قبل التصريح بيه او بغيره لحالات السيدات في سن اليأس.
الرغبة الجنسية ما بين التجحيم والزيادة
في البداية خلينا نتكلم بشكل عام، الستات ليهم سيكولوجية مختلفة في التعاطي مع الأمور الجنسية. مثلًا من 26 – 29% بس من السيدات اللي بيقدروا يوصلوا للنشوة الجنسية في مقابل 75% من الرجال، السيدات بتحتاج لتهيئة نفسية ومداعبة ومقدمات قبل ممارسة الجنس أكتر من احتياج الرجالة لنفس الشئ، ده غير إن السيدات بتمر بفترات من التقلبات الهرمونية اللي بالطبع بتأثر على رغبتهم تجاه الجنس.
اعرف أكتر| اختبر معلوماتك الجنسية.. ضع علامة صح أو غلط أمام العبارة الآتية
كل المشاكل دي عالمية وموجودة في كل مكان، لكن في مصر ممكن نضيف عليهم كمان كارثة الختان اللي بتوصل لإحصائيات وأرقام مرعبة، ومننساش إن الهدف الأساسي للعمليات دي هو السيطرة وأحيانًا القضاء على الرغبة الجنسية للسيدات والبنات، ده غير وجود إحصائيات كبيرة عن ارتفاع حالات الطلاق في مصر واللي بتشير في بعض أسبابها لوجود مشاكل في العلاقة الجنسية بين الطرفين.
كل المشاكل اللي فاتت دي، بتفتح الباب قدام تساؤلات كبيرة وأحلام لكتير من السيدات في إنهن يوصلوا للرضا عن علاقاتهم الجنسية بشركائهم، لكن للأسف لازم نحط الامور في نصابها ونتكلم عن الفياجرا النسائية بشكلها العلمي.
الفياجرا النسائية ليست حلًا سحريًا
الفليبانسرين بيستخدم في علاج حالات انخفاض الرغبة الجنسية في السيدات اللي موصلوش لسن اليأس ومش بيعانوا طوال حياتهك من فقدان الرغبة أو انخفاضها، لكنهن بيعانوا منها بشكل عارض لا يتجاوز 6 شهور. كمان الفياجرا النسائية غير مصرح باستخدامها مع الحالات اللي بتعاني من انخفاض الرغبة الجنسية نتيجة لحالة طبية أو اضطراب عقلي أو مشكلة مع الشريك نفسه.
من الضروري يكون تناول الفياجرا النسائية تحت إشراف طبي، وإنك تكوني متاكدة تمامًا من إنك مش بتعاني من حساسية لمكونات الدواء نفسه، ولا بتعاني من أي حالة من المحاذير دي:
- ضغط الدم المنخفض
- تاريخ من إدمان الكحول أو المخدرات
- مرض في الكبد
- تاريخ مرضي بالاكتئاب أو الأمراض العقلية
- تناول الكحوليات في الوقت الحالي
لأن في أي حالة من الحالات دي، ممكن الفياجرا النسائية تكون تأثيراتها خطيرة، يعني مثلًا في حالة تناول الكحوليات، ممكن تناول العقار يؤدي للوفاة نتيجة لخفضه ضغط الدم بشكل قد يصعب على الجسم تحمله. ده غير تعارضه مع بعض أنواع الأدوية زي الآتي ذكرها:
- بعض المضادات الحيوية زي (نيفازودون)
- بعض مضادات الفطريات زي (فلوكونازول)
- الأدوية المضادة للفيروسات الكبدية
- أدوية القلب والضغط
- أدوية الإيدز ونقص المناعة الذاتية
ده غير إنه مش معروف إذا كان تناوله آمن في فترة الحمل أو الرضاعة ولا لأ وغير مسموح باستخدامه لمن هم دون 18 سنة.
اعرف أكتر| إزاي تتعامل صح مع الدوا بتاعك في البيت؟
وعلى الرغم من إن حوالي 43% من السيدات على مستوى العالم بيعانوا من انخفاض في الرغبة الجنسية، لكن الفياجرا النسائية بتستهدف حوالي 10% منهن بس. كما إن تناول قرص منها يوميًا – الجرعة الموصى بها- لا يعاني اختفاء كل أعراض انخفاض الرغبة والتماثل التام للشفاء، لكن بجانب تناول الدواء، السيدات دول محتاجين لتقليل التوتر وتصفية الحالة الذهنية والمزاجية وبالطبع شريك متفهم قبل كل ده. يعني نقدر نقول إنه لا يمكن اعتباره منشط جنسي بقدر ما هو علاج لحالة مرضية.
الفياجرا النسائية علاج غير هرموني، لكنه بيشتغل على مستويات النواقل العصبية في المخ (السيراتونين – الدوبامين – النورادرينالين) وده ممكن يكون مطمئن للسيدات اللي خايفين من كونه هرموني، لكننا برضة نحب نقول إنه بعد ما تطمني وتستشيري الطبيب وتتأكدي من إنه مناسب لحالتك. لازم تاخدي بالك من الأعراض الجانبية له زي (الدوخة – اضطرابات النوم – غثيان – جفاف الفم – الشعور بالارهاق – خفض ضغط الدم – الاغماء وفقدان الوعي).
في النهاية، مفيش أي علاج بيكون هو الحل السحري وخصوصًا في أمور بحساسية وحميمية العلاقات الجنسية بين طرفين. كل العلاجات والأدوية ما هي إلا محاولة للتغلب على مشاكل صحية بما فيها الفياجرا (رجالي – نسائي). لكن لو مش بتعانوا من أي مشاكل صحية بتمنع العلاقة الجنسية يُفضل المصارحة بين الطرفين واللجوء لاستشاري علاقات – حقيقي- يحاول يساعدكم في حل المشكلة. مع خالص تمنياتنا بحياة سعيدة ومرضية لكل الأطراف.
المصادر: webmd health everydayhealth almasryalyoum healthline mayoclinic abcnews
