الكافيين مفيد ولا مضر؟
كتب: أحمد حسين
مبديئًا خليني أقول لكم حاجة في البداية، أنا بصنّف أي حاجة بتعامل معاها في حياتي على أساس العاطفة، بمعنى إني بتعاطى مع أي حاجة من زاوية بحب وبكره، وأنا بكل صراحة بحب القهوة. أينعم مش مُحب تقيل أو ما يُعرف بالهاردكور، لكني بحب أشربها عمومًا وبستطعمها. على الجانب الآخر في بعض الناس ممكن نقول عليهم -وأنا بحب أحكم على البشر- عقلانيين أو بيفكروا أكتر قبل ما يختاروا على أساس العاطفة، فبيبصوا على الكافيين ومشاريبه من زاوية النفع والضرر.
الناس كلهم طبعًا لهم الحق في اختيار الزاوية اللي يبصوا بيها على الأشياء، فخلونا نقول إن موضوع الفايدة والضرر ده ممكن يبقى لطيف ليهم، وبرضه، خلينا نتكلم بصراحة، حتى لو زيي بتحكموا على الأشياء بالعاطفة، لكن بيكون نفسكم ساعات تعرفوا الحاجة دي مضرة ولا مفيدة علشان مانلاقيش نفسنا لابسين في حاجة أكبر من اللي ممكن نتوقعها. فخلونا نشوف بقى إيه الكافيين ده وإيه فوايده وأضراره.
إيه هو الكافيين؟
التعريف الرئيسي ليه بيقول إنها مادة شبه قلوية لونها أبيض وطعمها مر، لذلك يُطلق عليها في بعض الأحيان الأبيض المر. العالم بيستهلك أكتر من 450 ألف كيلوجرام من الكافيين عن طريق القهوة والشاي. لكن فيه بعض أنواع الشجر بنقدر نستخرج منها الكافيين، زي “البهشية البراجوانية – Yerba Mate” اللي بيتعمل منها نوع من أنواع الشاي، و”الجوارانا – Guarana”، وكمان “جوزة الكولا – Kola Nut”.
بيأثّر علينا إزاي؟
الكافيين، اسمه العلمي “1,3,7 – Trimethylxanthine”، مادة مخادعة ودحلابة كده زي اسمها، اللي يبدوا صعب لكن نطقه سهل. الكافيين يشبه مركب كيميائي في جسمنا اسمه “أدينوسين – Adenosine”، الأدينوسين بيتفاعل مع المستقبلات العصبية في المخ علشان يوصل لنا إحساس بالهدوء ونقدر ننام. اللي بيعمله الكافيين بقى هو إنه بيقفل المستقبلات دي قدام الأدينوسين، بحيث يخدع مخنا ويزوّد ضغط الدم وسرعة ضربات القلب فنفضل صاحيين ونفوّق.
في الوقت ده بنتخدع ونصحصح فعلًا ونبدأ نتعامل في يومنا بشكل طبيعي، والكافيين عمره جوه جسمنا حوالي 6 ساعات، وبيبدأ تأثيره يضعف ويختفي بعدها تمامًا، فبنحتاج فنجان أو كوباية كمان علشان نصحصح كده. هل ده معناه إنه إدمان؟ نظريًا أه، بس فعليًا لأ. أولًا لأنه مابيأثّرش على الجسم والمخ زي المخدرات ما بتعمل، ثانيًا أعراض الأنسحاب منه بسيطة جدًا، وممكن تنتهي في يوم أو اتنين، زي ما بنبطّل نشرب كافيين في نهار رمضان، أول يوم أو اتنين بس بنحس فيهم بالصداع والتعب وبعض العصبية وتقلّب المزاج، ودي أعراض أضعف كتير من أعراض الانسحاب من المخدرات اللي ممكن ندمنها.
اعرف أكتر| حرب الكافيين: النسكافية ولّا القهوة؟
باختصار، الناس اللي بتحب الكافيين غالبًا بيشربوه علشان دي عادة محببة ليهم، مش علشان هما أدمنوه، وطبعًا ده متعلق بحاجات كتير، زي حساسيتك تجاه الكافيين والمقدار اللي بتستهلكه والسن. وده ينقلنا إلى سؤال تاني مهم، إيه هي أضرار الكافيين والمقدار اللي المفروض نشربه.
أضرار الكافيين
اتفقنا إن الكافيين زيه زي أي مادة، يُفضل يكون استهلاكنا له بالمعقول علشان نقدر نستفيد منه ومايصيبناش الضرر، ولو ماتفقناش يبقى خلونا نتفق، إن أي حاجة هنستهلكها يُفضّل نستهلك منها كميات معقولة، علشان مانوصلش لكميات مضرة تصيبنا بحاجات يعني مالهاش لازمة خالص.
اعرف أكتر| هذه الكمية من المواد الطبيعية كفيلة بقتلك!
المهم، فرضنا مثلًا إن حد ماتفقش معانا، وقرر إنه يستهلك الكافيين بصورة أكبر من الطبيعي، أيوة اللي هي كام؟ اللي هي 300 ميلليجرام، يعني حوالي 3 كوبايات حجم متوسط، زي كوبايات الشاي كده.. هيحصل إيه؟ هيصاب بأمراض تخص ارتفاع ضغط الدم وضربات القلب.
بس الأول، قبل ما نفترض إن حد عدّى المقدار ده، لازم نعرف إن المتوسط من استهلاك مادة بيختلف من شخص للتاني. بمعنى إن كل شخص له مقدار غير التاني حسب السن والحالة الصحية والتاريخ الصحي للعيلة والحساسية تجاه الكافيين والوزن وعوامل تانية، ودي حاجات ممكن نعرفها من التحاليل اللي يعملها طبيب مختص مش أي حد.
وبرضه، خلينا نقول إنه لو شربت قهوة أو شاي أو مشروب طاقة أو أي حاجة، وحسيت إنك مش مرتاح أو أثّرت عليك بشكل إنت شايفه غريب عليك، فيُفضّل إنك ماتشربهاش، أو الأفضل بقى إنك تروح لدكتور وتعمل تحاليل تشوف أثّرت عليك بالشكل ده ليه. ولو قال لك إن الكافيين مش كويس علشانك، فحاول على قد ما تقدر تسمع كلامه. مدرك إن كلام الدكاترة ساعات مابيكونش على هوانا، بس في النهاية هو لا يعرفنا ولا نعرفه لكنه بيقدم نصيحة بخصوص الصحة اللي هو بيفهم فيها.
خدوا بالكم، إننا كل ده بنتكلم عن استهلاك الكافيين، بغض النظر بتستهلكه من أنهي جهة، يعني لو بتشرب قهوة مثلًا، بتشربها من غير سكر ولا بسكر، وبتحط قد إيه سكر، وبتحط عليها كريمة ولا لأ، كل دي حاجات هيراعيها أي دكتور متخصص تتكلم معاه في موضوع الكافيين ده، يعني ببساطة، شرب المشروبات الغازية غير شرب مشروبات الطاقة غير شرب الشاي، كل واحد فيهم له مكونات مختلفة.
يبقى إن إحنا نقول إن الحوامل لهم قصة تانية، يعني الحامل من المستحب إنها ماتستهلكش أكتر من 200 ميلليجرام من الكافيين، بس برضه ده لازم يتم بعلم الطبيب، ويُفضل هو اللي يقول لها تستهلك قد إيه من الكافيين، وتشرب إيه وماتشربش إيه، علشان صحتها يعني وصحة المولود، اللي حابة إنه يستقبل العالم الجديد عليه بصورة جيدة يعني.
إيه فوائد الكافيين؟
نخش في الموضوع على طول. إحنا اتفقنا -مرة تانية- إن الكافيين بيخلينا نحس بالصحصحة والفوقان، وبيساعدنا نركز في اللي بنعمله. كمان، الكافيين بيحسن من قدرتنا المناعية كونه مادة مضادة للالتهابات (Anti-inflammatory)، وبسبب الميزة الجميلة دي، بيقدر الكافيين إنه يقلل من أعراض الربو (Asthma).
ده غير إنه بيساعد في تقليل أعراض عدد من الأمراض، زي “الباركنسون – Parkinson” وهو مرض بيسبب الرجفة للجسم وبيأثر على الجهاز العصبي، وأيضًا أمراض الكبد، ومرض السكري من النوع الثاني، ده في حالة استهلاكه بصورة طبيعية ومن مصادر مفيش فيها سكر كتير، بس كلنا ناس متعلمين وعارفين إن السكر لوحده مش سبب أساسي في الإصابة بمرض السكري من النوع الثاني، لكنه ممكن يكون سبب في السمنة، اللي بدورها ممكن تكون سبب في الإصابة بمرض السكري من النوع الثاني.. ببساطة يعني، بس الأهم نخلي بالنا من مقدار استهلاكنا -زي ما اتفقنا مرتين فوق- من أي حاجة بنستهلكها.
في النهاية، خلونا نحاول نستمتع بالكافيين من مصادره المختلفة، من غير ما نأفوّر على قد ما نقدر يعني، وكله هيبقي خير إن شاء الله.. كله هيبقى خير.
