هل لو أكلت جزر كتير لونك هيبقى برتقاني؟!
كتب: أحمد حسين
الجزر غالبًا يُعتبر من أكتر الخضروات اللي اتقال عنها إشاعات، يعني مدام عفاف راضي قالت «وكمان قالوا الجزر، ده بيقوّي النظر»، ودي طلعت إشاعة حقيقية، والجزر ممكن يقوّي النظر فعلًا في بعض الحالات ولبعض البشر، يعني اللي قالوا المعلومة لمدام عفاف راضي ماكانوش بيضحكوا عليها.
من فترة كنت قاعد مع صديق بقالي كتير ماشوفتوش، وبنتكلم بقى في الحاجات العادية بتاعة إيه الأخبار؟ إزاي الحال؟ بتعمل إيه دلوقتي؟ هناكل ولا لأ؟ فبنتكلم على الشغل، قال لي إنهم في مكان شغله ماحدش غالبًا مهتم بالعلوم، لكن من ضمن المعلومات الطايرة قدامه هناك كانت من زميل قال لهم لو «أكلت جزر كتير، لونك هيبقى برتقاني». فأنا استغربت من المعلومة دي، ووعدته إني هدوّر على مدى صحتها.
القصة دي بدأت زمان كقصة بيحكيها الآباء لأبناءهم، عن طفل كان بيحب الجزر جدًا، فكان بياكل منه طول الوقت، واتحول لونه للبرتقاني والدكتور أكد لهم إن أكل الجزر الكتير هو السبب في ده. والحقيقة إن الدكتور عنده حق، في إنك لو أكلت جزر كتير لونك هيتحوّل للأصفر المائل للبرتقاني كده، ودي حالة اسمها «فرط كاروتين الدم – Hypercarotenemia»، أو بيُقال عليها اختصارًا (Carotenosis).
حالة فرط كاروتين الدم هي حالة غير مُضرّة خالص، تأثيرها بس إن الجلد بيتحوّل لونه لأصفر مائل للبرتقاني، ومش من أكل الجزر الكتير بس، في فواكهة أو خضروات تانية زي قرع العسل والببايا، وبيشتركوا مع الجزر في إنهم بيحتوا على نسبة كبيرة من فيتامين (أ) أو كما يُسمى «بيتا كاروتين – Beta carotene». وممكن تعرف أكتر عن فيتامين (أ) من هنا: أكله كله غذا وفيتامين – الجزء الأول
العملية دي بتتم في أكتر من خطوة، يعني الألفا أو البيتا كاروتين بتدخل الجسم عن طريق الجزر -أو غيره-، وبعدين بتتحوّل لفيتامين أ.
فيتامين أ بعدها بيروح للكبد علشان يتقسّم لـ«أحادي الهيدروكسي – Monohydroxy»، واللي بيتحوّل بعدها لـ«عديد الهيدروكسي – Polyhydroxy» اللي بيخرج مع البول.
وكل ما زادت نسبة البيتا كاروتين في الجسم، هيزيد فيتامين أ وبالتالي لون الجلد هيتحوّل لأصفر مائل للبرتقاني. التأثير ده بيظهر على الجسم على فترات، وعلى حسب برضه سرعة عملية التمثيل الغذائي، يعني لو حد عنده التمثيل الغذائي (Metabolism) بيتم بسرعة فهيظهر عليه اللون بسرعة، أما لو التمثيل الغذائي بطيء فهيظهر اللون بشكل أبطء وهكذا بقى. طبعًا زي ما ذكرنا سابقًا، التأثير ده مش ضار خالص، بس بيخليك شبه ترامب، أو الفنان تامر هجرس.. سو اتشوز وايزلي أي (اختر بحكمة) 😀 وكُل على مهلك.
المصادر: scientificamerican uamshealth
