16 من أغرب انواع أسماك القرش: ما لا تعرفه عن الفك المفترس
كتبت: مها طه
طبعًا كلنا عارفين فيلم الفك المفترس، ومتخيلين لو حد مننا شاف قرش حقيقي هيحصل له إيه، هيعملها على نفسه في المية من الخوف غالبًا، ولكن سؤال القروش هل القروش كلها مفترسة ودايما مرعبة وبنفس الزعنفة المخيفة دي سؤال مثير للاهتمام. ولما بحثنا عن إجابة السؤال ده، اكتشفنا إن القروش أنواع كتيرة ومختلفة، وهنا هنتعرف على أغرب أنواع القروش.
1 –القرش النينجا:
أجدد نوع من القروش الغريبة، اكتشفه العلماء مؤخرًا. القرش النينجا من أغرب أنواع القروش فعلًا، بيعيش فى الأعماق. لونه الأسود بيساعده على عملية التخفى من أعدائه لكنه عنده قدرة إنه ينور فى الظلام! القرش النينجا تم اكتشافه عن طريق مجموعة من الباحثين فى مركز أبحاث أسماك القرش فى المحيط الهادى. القرش النينجا طوله تقريبًا نصف متر وبيعيش على عمق 1000 متر على ساحل المحيط الهادى، لونه الأسود مع الضوء اللى بينتجه بيساعده فى خداع الفرائس.
2 –القرش الحوت:
وده أكبر أنواع القروش، طوله 13 متر ووزنه 21 طن!، الحمدلله ما بياكلش بني آدمين، بالعكس صغاره ممكن تلعب مع الغواصين كمان، فى فيتنام القرش الحوت بيُعتبر مُقدس.
3 –المطرقة:
أيوه هو اللي شفناه في كارتون ”نيمو“
وكان بيجاهد نفسه عشان يبقى نباتي وصديق للسمكات الصغيرة. لكن في الحقيقة ”القرش المطرقة“ من الأنواع الخطيرة جدًا، طوله ممكن يوصل لـ6 متر، والرؤية عنده بزاوية 360 درجة. ذكر القرش المطرقة بيعض الأنثى بشكل عنيف لحد ما توافق على التزاوج معاه، وأه القرش المطرقة بياكل بشر على فكرة عادي.
4 –القرش السعيد:
ده ثانى أكبر أنواع الأسماك، طوله 12 متر موجود فى سواحل أسكتلندا، بيعيش فى أى مكان درجة حرارة الماء فيه معتدلة لأن دى البيئة المناسبة لتوافر العوالق أو الهائمات_الكائنات الدقيقة اللى بتعيش فى الماء_، القرش ده أسنانه وخياشيمه شبه المصفاة، بيبتلع أطنان من الماء المُحمل بالعوالق دى و يطرد الماء وتفضل العوالق اللى بيتغذى عليها، يعتبر كيوت بالنسبة لإخواته مش كده.
5 –القرش ذو القرن:
لو حابب تربى قرش فالقرش ذو القرن هو الاختيار المناسب، حيوان لطيف وكسول، بيعيش فى قاع البحر وبيتغذى على المحار لحد ما تتحول أنيابه للون البنفسجى، اشمعنى بنفسجي مش عارفين الحقيقة. القرش ده بينام طول النهار ويبتدى يخرج بالليل، أقصى مسافة ممكن يبعدها عن بيته هى 10 ميل.
6 –القرش الجلاد:
شكل جميل، وجسم انسيابى، مع وجود زعنفة ذيلية طويلة. القرش ده بيستخدم زعنفته فى جلد الأسماك الصغيرة الموجودة فى أسراب، وممكن فى الضربة الواحدة يوقع من3 لـ7 سمكات ويتغذى عليهم. طوله حوالى 6 متر، نصفهم تقريبًا عبارة عن الزعنفة الخلفية. ومن هنا نعرف إن الشكل مش كل حاجة، ماتحكموش بالمظاهر يا جماعة ده طلع جلاّد!
7 –القرش الملاك:
طوله تقريبًا 1.5 متر، نوع القرش ده بيفضل ساكن على رمال القاع مستنى الأسماك الصغيرة لحد ما توصل عنده وبتدخل فى فمه المستدير أو الكمين بالأصح بمحض إرادتهم، القرش ده ممكن يعض الغواصين لكن عضته مش مميتة.
8 –الرأس الأبيض:
لو كنت فى سفينة وغرقت غالبًا هو ده القرش اللى هاياكلك، عشان تبقى عارف يعني مش أكتر. يُعتبر”الرأس الأبيض“ أكثر أنواع القروش فتكًا بالبشر، فعليًا النوع ده تغذى على عدد كبير من البشر اللى غرقوا فى الحرب العالمية الثانية، القرش ده بيسبح على أعماق كبيرة جدًا. كفاية علينا معاه لحد كده.
9 –القرش النمر:
القرش بيتغذى على أى حاجة بمعنى أى حاجة بما فيها البشر طبعًا، فى دراسة اتعملت عليه لقوا فى معدته بواقى ماعز وخيول وحتى قطط! غالبا بره بيرموا الحيوانات الميتة في المحيط برضه. استنوا ده كمان لقيوا إنه ممكن ياكل المخلفات أي الزبالة يعني.
10 –الميجالدون:
القرش ده بقى منقرض من حوالى 2.6 مليون سنة، لكنه كان أكبر سمكةقرش فى العالم طوله كان 30 متر، الصورة دى بتوضح إنه بياكل حوتين فى نفس الوقت، وممكن يستوعب إنسان بمنتهى السهولة، ده استوعب حوت ما بالك بإنسان غلبان ي حالاتنا كده.
11 –القرش ذو الفم الكبير:
فى فقط حوالى 60 قرش من النوع ده واللى معرض للانقراض، القرش اللى فى الصورة ده تم اصطياده فى الفلبين، بيوصل طوله لـ 5.5 متر، وهو مش من الأنواع المفترسة الخطيرة لأنه بيعتمد فى غذائه على العوالق، وكمان كسول بيسبح لمسافةلا تتعدى الـ 2 متر.
12 –القرش ذو الفم الدائرى:
حجمه صغير مقارنةً بالاعتقاد السائد عندنا عن القروش لكن في الحقيقة، وبالرغم من حجمه ده ففكه دائرى وأسنانه موجودة بالشكل الدائرى ده نفسه، عضته بتنتزع جزء من اللحم فى شكل دائرى متوحش. هو القرش الدائري بلا منازع!
13 –قرش النهر:
وده من أغرب أنواع القروش لأنه بيقدر يعيش فى الماء المالح والعذب فى نفس الوقت. طوله بيوصل لـ 1.8 متر، وبكده حتى لو هتعوم فى نهر فإنت مش فى أمان لأنه بيعض البشر، بس لحسن حظنا القرش ده بيعيش فى أستراليا، مش أحسن ما نبقى أستراليا؟!
14 –القرش المزركش:
بيعيش بالقرب من قاع المحيط، بيتخفى عن الأعين بشكل كبير، السبب فى تسميته كده هو وجود 6 مجموعات من الزعانف الزخرفية عنده، واللى بتدىه شكل كأنه لابس طوق على راسه، طوله ممكن يوصل ل 1.8 متر، وعدد أسنانه حوالى 300.
15 –القرش المنشار:
كلنا عارفين النوع ده من الأسماك لكن الحقيقة هو قرش، طوله حوالى 1.7 متر، بيسبح دايمًا فى مجموعات وطبعًابيتميزبوجودالمنشارده، واللى بيستخدمه فى التنقيب عن الفرائس اللى ممكن تدفن نفسها فى الرمال عشان تتفادى أعدائها.
16 –القرش العفريت:
زى ما هو واضح فى الصورة القرش ده من أبشع القروش شكلًا، وده بيخلى شكله مرعب مع إن لونه وردى، بيعيش قريب من الشواطئ،بطئ جدًا فى السباحة لكن الحمدلله مبياكلش بشر، تخيل لو كانت نهايتك علىقرش بالشكل ده شعورك كان هيبقى إيه؟
المصادر
