ذوبان الجليد هنموت كلنا غرقانين!
كتب: أحمد حسين
مخرجين وكتاب أفلام الرعب لما بييجوا يفكروا في نهاية العالم والإنسانية، بيفكروا دايمًا في أشياء محفوظة اسطبمات كده، يعني مثلًا هجوم زومبي (الموتى الأحياء كترجمة) أو مثلًا إن في مخلوقات فضائية من العالم الأخر تملى الدنيا وتقضي على البشر بشكل أو بآخر، أو مثلًا تحصل مجموعة كوارث طبيعية مع بعض في نفس الوقت، أعاصير بقى على براكين على زلازل على فيضانات وكل اللي قلبك مايحبوش.
بس المشكلة إن عمرهم ما فكروا مثلًا في شيء زي ذوبان الجليد في القطبين وفي العالم بشكل عام. يعني إحنا بقى لنا كتير بنسمع عن التغيرات المناخية اللي بتحصل في الكرة الأرضية، والتغيرات دي بتأثر على الثلج اللي في العالم، خصوصًا اللي في القطبين الشمالي والجنوبي، فليه تجاهل مخرجين وكُتّاب السينما فكرة زي دي؟
إيه اللي هيحصل لو ساح كل الجليد اللي على الكرة الأرضية؟، بالرغم من إن الموضوع ده تناوله الإعلام والأبحاث العلمية وغيره وعقدوا له قمة مناخ في 2015 بتناقش التغير المناخي ووضع حد لارتفاع درجات الحرارة نتاجا عن انبعاثات ثاني أكسيد الكربون وغيره. فهنا إحنا هنجاوب على السؤال ده من منطلق ”فذكّر إن نفعت الذكرى“.
اعرف أكتر عن: تغير المناخ.. ما بين الأدلة والكارثة المنتظرة
ذوبان الجليد وتدمير بيئة الكائنات الحية
خلينا نبدأ الحكاية من البداية خالص. معروف إننا كبشر أجسامنا بتتكوّن بشكل أساسي من الميّه، وإننا محتاجين نشرب ميّه كتير علشان التفاعلات اللي جوه جسمنا تحصل.
أهو الميّه العذبة اللي بنشربها دي بتُمثل حوالي 3% من إجمالي مساحة المياه على الكرة الأرضية، يعني في 97% ميّه مالحة وغير صالحة للشرب. ومن الـ3% دول في حوالي 70% ميّه مُجمّدة، ودول بينقسموا لأنهار جليدية وغطاء جليدي وثلوج وغيرهم.
القطب الشمالي مثلًا عبارة عن محيط مُجمّد ومساحته كبيرة، وبعض الأجزاء من الميّه بتتخذ شكل الجبل الجليدي. المشكلة بقى إن الجبال الجليدية بتتعرض للشمس بشكل مباشر، وده بيخليها تذوب بشكل سريع جدًا كل ما زادت الحرارة؛ مما يؤدي في النهاية لارتفاع منسوب ومستويات الميّه أكتر.
لو فضل الوضع على ما هو عليه لفترة طويلة، السُفن هتبقى قادرة تعدي من أوروبا لحد روسيا عبر القطب الشمالي من غير ما يكون في ثلوج/جليد في الطريق. ده هيكون كويس لشركات الشحن الحقيقة، بس مش هيكون كويس للفقميات (عجل البحر والفقمة وأسد البحر) وطبعًا مش هيكون كويس كمان للدب القطبي. الحيوانات دي ممكن تنقرض _وهي حاليًا بالأساس مُهددة بالانقراض_ بسهولة لو استمر تدمير البيئة اللي هما عايشين فيها.
زائد كمان إن في حيوانات مائية زي الحوت مقوّس الرأس وحريش البحر، حياتها أصبحت مهددة في المحيط، بس مش بسبب الاحتباس الحراري وتغيّر المناخ بس لكن كمان بسبب شركات البترول اللي بتنقّب في القطب الشمالي عنه.
لأن السفن علشان تنقّب على البترول بتستخدم الموجات الزلزالية، والموجات دي بتدمّر البيئة الجليدية للمكان، ساعتها الحيوانات دي بتضطر يا إما تغادر وتروح بيئة غير متكيّفة معاها وتموت، يا إما تفضل مكانها وتموت برضه، وفي الحالتين هينقرضوا طبعًا للأسف.
ذوبان الجليد وسيناريو نهاية العالم
طيب، خلينا في السؤال الأساسي اللي جايين علشانه هنا، إيه اللي هيحصل لو ساح كل الجليد اللي على الكرة الأرضية؟ أول إجابة منطقية هتكون إن مستوى الميّه هيرتفع، بس مش هيرتفع بشكل طبيعي يعني الارتفاع ممكن يوصل لـ70 متر مثلًا، ودي في حد ذاتها كارثة لأن جزء كبير من البشر عايشين بالأساس على سواحل مُطلّة على مساحات مائية.
مين طيب هيدفع التمن؟ الناس اللي عايشة في طوكيو ونيويورك وساو باولو، ومعاهم مومباي وشانجهاي وجاكرتا. كل البلاد دي هتدُمّر معظم مبانيها إن ماكانش كلها، وهيكون عندنا حوالي 2 مليار شخص مُشرّد في العالم لأن المُدن بتاعتهم غرقت والميّه غمرتها تمامًا. زائد كمان إنه بعد تدمير البيئة في المحيط، الزرع اللي فيه هيموت وده اللي بيمدنا لحد دلوقتي بحوالي نص الأكسجين اللي موجود في الأرض.
بس كده؟ لأ، الحقيقة مش بس كده ولا حاجة، الخلل في المحيط هيُنتج عنه خلل تاني بس على الأرض، هينتقل للمناخ كله بما في ذلك أوروبا والخوف خصوصًا على البلاد المُنتجة والمُصدّرة للخضروات والفاكهة، لأن ساعتها المحاصيل كلها هتُدمّر وعلى ما يقدروا يلاقوا مكان تاني يزرعوها فيه هيكون في ناس اتأثّرت وجايز ماتت بسبب الموضوع ده.
يعني باختصار، ذوبان الجليد أو الثلج ده مش مجرد شيء عابر وسهل، دي كارثة حقيقية بتتصاعد. المشكلة الأكبر إنه بالرغم من التوعية الكبيرة تجاه ذلك، إلا إن الحال لا يزال على ما هو عليه، مش لموضوع المناخ بس، لكن كمان السفن اللي بتنقّب عن البترول واللي عمّالة تدمر في البيئة المُحيطية، فالمحصلة تبقى حيوانات هربانة ومهددة بالانقراض أو انقرضت بالفعل، و2 مليون بشري مُشرّد في العالم، واختفاء مدن كاملة كمان.
المصادر: sciencealert howstuffworks
