أحلام اليقظة المفرطة: ”احلم ويحلالي واللي هيحصل إيه؟“ لأ هيحصل كتير!
كتبت: يارا كمال
ممكن تبقى قاعد في شغلك كده سرحان وبتتخيّل إنك بتتخانق مع مديرك وبتموته وبعدين تلاقيه فوق نافوخك بيزعق فيك عشان مش مركز، فتنسى الحلم تمامًا وتقف قصاده باصص في الأرض. وممكن تتخيّل نفسك متجوّز البنت اللي بتحبها وعايشين في حياة سعيدة ولا في الأحلام! أحلام اليقظة عالم جميل بنهرب فيه من الواقع ونخش جوه قوقعتنا شوية نحتمي بيها، بس المشكلة بقى لو القوقعة دي ابتلعتنا وحبستنا جواها.
أحلام اليقظة شيء عادي جدًا، يعني فيه ما يصل إلى 96% من البالغين بيخشوا يوميًا على الأقل في نوبة واحدة من أحلام اليقظة. وبالرغم من إنه من غير الواضح احنا ليه بنحلم أحلام يقظة، بس فيه علماء نفس كتير بيقترحوا إن السلوك ده بيساعد في تمرين المخ وبيخليه مستعد لاتخاذ موقف لما يتعرّض لمؤثر خارجي.
اعرف أكتر| يبقى إيه ده حلم ولا علم؟ الاتنين!
إيلي سومر، وده بروفيسور طبي في علم النفس في جامعة حيفا في اسرائيل، بيعتقد إن أحلام اليقظة المفرطة تُعتبر اضطراب عقلي، وفقًا لـ”وول ستريت جورنال“.
طب امتى أعرف إني كده بحلم وأنا صاحي بشكل مفرط؟
- توصل سومر إلى إن الحاجة اللي بتحدد أحلام اليقظة مفرطة ولا لأ هي نسبة الوقت اللي بتملاه في يومنا. يعني مثلًا، وفقًا للبحث بتاع سومر، الناس اللي بيعانوا من أحلام اليقظة المفرطة الأحلام دي بتمثّل 57% في المتوسط من وقت استيقاظهم، في حين إنها بتمثل 16% من ساعات الاستيقاظ عند المجموعة اللي العادية.
- نوعية الأحلام بتاعة المصابين بالاضطراب –على اعتبار إنه اضطراب- بتبقى مختلفة، يعني بتبقى في الغالب مفصّلة وخيالية أكتر، زي ما تكون فيلم أو رواية، وكتير بتتضمن شخصيات تاريخية أو خيالية أو مشاهير أو نسخ مثالية من الحالمين دول نفسهم. وده على عكس أحلام اليقظة عند المجموعة الضابطة اللي بتتمحور حوالين الحياة الواقعية والأمنيات الملموسة زي الفوز في مسابقة مثلًا.
- في الغالب، اللي بيعانوا من أحلام اليقظة المفرطة بيبقى عندهم حالة عقلية كامنة تانية زي إنهم يعانوا من أعراض نقص الانتباه والوسواس القهري أو ليهم تاريخ مع صدمة أو اعتداء.
- حوالي 80% من المصابين بالاضطراب ده بيبقوا بيتحركوا حركة معينة أثناء الأحلام زي إنهم يفضلوا رايحين جايين أو بيلفوا حوالين نفسهم أو بيتمرجحوا في مكانهم.
صورة: flicker - في الغالب، أحلام اليقظة المفرطة بتبدأ من الطفولة.
- أحيانًا الحالم بيتكلم ويضحك ويبكي ويعمل تعبيرات بوشه وهو بيحلم، بس ده لا يعني إن الحالم مابيبقاش قادر يفرّق بين الحلم والحقيقة، وده اللي بيفرقهم عن المصابين بالذهان أو الفصام.
- أكتر حاجة بتميّز أحلام اليقظة المفروطة عن الأحلام العادية إنها ممكن تتعارض مع حياة الحالم. يعني مثلًا راشيل بينيت، ودي شابة عندها 27 سنة، قالت لـ”وول ستريت جورنال“، إنها بتفضّل تقعد في البيت وتحلم وهي صاحية عن إنها تخرج. ممكن الناس اللي بيحلموا أحلام يقظة بشكل مفرط دول يفضلوا قاعدين في السرير بالساعات بيحلموا وهما صاحيين، ويمكن يبقى عندهم صعوبة في إنهم يروحوا في النوم بسبب ده، ويبقى عندهم صعوبة إنهم يقوموا من السرير بعد ما يصحوا. الناس دول ممكن تتجاهل حاجات أساسية زي وجباتهم والاستحمام وباقي الأنشطة اليومية الرئيسية لإنهم بيحلموا.
- فيه حاجات بتحفّز أحلام اليقظة زي الموسيقى والكتب والأفلام وألعاب الفيديو أو إنك تكون لوحدك وزهقان.
اعرف أكتر| أحلام التوتر: أنا فاتني الامتحان؟ خير اللهم اجعله خير!
على العموم، حاول تستغل أحلامك دي في الإبداع. الأحلام دي لو أنت مبدع ممكن تلهمك بأفكار، وده اللي كان بيعملوا ناس زي أورهان باموق، الروائي الحاصل على جائزة نوبل، وآينشتاين، وتيم برتون، المخرج والكاتب الأمريكي، اللي كان بيقضي طفولته في أوضته بيعمل بوسترات لسلسلة أفلام رعب هو بيتخيلها.
المصادر: medicaldaily medicaldaily1 scientificamerican
