متلازمة أيرلن: العين شايفة بس المخ مش أوي
كتبت: يارا كمال
أنت بتقرا بعينك، صح؟ وبتسمع بودنك وبتشم بمناخيرك؟ بس في الحقيقة، أنت نسيت فرد مهم أوي في العوامل دي كلها وهو المخ. ما هو ده البرنس اللي بيخلينا ندرك كل اللي بيدخل لحواسنا، بدليل إن لو الجزء المسئول عن الإبصار في المخ أو لو العصب البصري اتضرر ممكن الإنسان يُصاب بالعمى. يعني لو العملية الإدراكية دي اضطربت هيبقى عندنا مشكلة في الإحساس نفسه.
أهي هي دي متلازمة أيرلن. المتلازمة دي عبارة عن مشكلة في المعالجة البصرية نتيجة عيب في واحد من المسارات البصرية اللي بتنتقل فيها الإشارات من العين للمخ. العيب ده بيسبب خطأ في توقيت معالجة المعلومات البصرية.
المشكلة إن العين بتنقل 70% من المعلومات اللي الإنسان بيستقبلها، وبالتالي لازم المخ يفسرها كويس عشان لو ده فيه مشكلة، هيبقى فيه صعوبات في معالجة وتفسير البيئة اللي حواليه والتعامل معاها.
المشكلة كمان إن المتلازمة دي ماينفعش تتشخص عن طريق الاختبارات النفسية والتعليمية والمرتبطة بتصحيح النظر. يعني المتلازمة دي مش حاجة ليها دعوة بطب العيون، بس ممكن تكون فيه مشكلة في العين مع المتلازمة نفسها.
المتلازمة ممكن تأثر على البالغين والأطفال، وبتختلف من شخص للتاني. المشكلة إنها بتتقاطع مع مجموعة من الأنشطة وده ممكن يعمل لك عقبات في التعلم وفي التركيز والقدرة على إنك تقعد ثابت وفي السواقة كمان.
متلازمة أيرلن وصعوبات القراءة
أولًا، القراية بتكون بطيئة (يعني بتضطر تقرا كلمة كلمة) ومش دقيقة. ممكن يكون فيه مشكلة في القراية من ورقة بيضا، وبالتالي ممكن مابيبقاش المصاب بالمتلازمة قادر إنه يقرا لفترات طويلة حتى لو بنضارة قراية، وبالتالي ممكن مايقدرش يفهم المكتوب إلا لو قراه تاني. الكلام المكتوب عند المصابين بمتلازمة أيرلن بيبقى مفرّغ أو ملتوي أو مشوش.
طب بالنسبة لموضوع القراية ده، مش ده كده يبقى عسر قراءة أو دسلكسيا؟
الإجابة: لأ الدسلكسيا مختلفة.
الدسكلسيا هي اضطراب في التعلم المعتمد على اللغة، يعني التلامذة المصابين بالدسلكسيا بيمرو بصعوبات في مهارات تعلم اللغة زي الهجاء ونطق الكلمات والكتابة والقراية. الصعوبات ده ناتجة عن عيب في المكون الصوتي للغة. يعني المصاب بالاضطراب ده مابيعرفش يربط بين الكلمات والحروف المكتوبة وبين أصواتها ومعانيها.
المصابين بالدسلكسيا بيحتاجوا طريقة تعلم للغة تعتمد على كذا حاسة، وده عشان يساعدهم على تقوية مسارات المخ اللي بتربط الكلام المنطوق بالمكتوب.
اعرف أكتر| كيف تستقبل عقول أطفالنا المعلومة؟
أما المصابين بمتلازمة أيرلن، فممكن يستخدموا فلاتر أيرلن الملونة واللي بتحسن سرعة وطلاقة ودقة القراية وفهمك للي بتقراه، وكمان بتساعد على متابعة الكلمات في الصفحة، وعلى القراءة في ضوء عادي وعلى تقليل التعب والضغط أثناء القراءة وزيادة الرغبة فيها، وعلى القدرة على القراءة لفترة أطول.
طبعًا المتلازمة دي بتأثّر على الخط كمان وبتخليه مش مظبوط، وبتأثّر على إدراك الشخص المصاب بيها للمسافات وده ممكن يأثر عليه وهو بيسوق مثلًا أو بيلعب رياضة أو لو ماشي عادي.
فيه أعراض تانية مرتبطة بالمتلازمة دي زي: الصداع وإجهاد العين (وده نتيجة إن المصابين بيها شايفين كل حاجة بشكل مختلف) والتعب بشكل عام والصداع والضيق من الأنوار الملعلطة واللمبات الفلورسنت وضوء الشمس وممكن كمان الأضواء اللي في الليل، والغثيان والإحساس بالخمول وعدم الراحة وإن العين تبقى بتدمّع.
متلازمة أيرلن والتوحد
المتلازمة دي كمان شايعة بين المصابين بالتوحد اللي بيعانوا من:
- التحميل الحسي الزائد: واللي بتسببه الأضواء وضوء الشمس، واللي ممكن ينتج عنه سلوك لتجنب الضوء زي التواصل الضعيف بالعين والنظر بعيدًا عن الأهداف البصرية أو مجموعة من النظرات القصيرة الجانبية بالإضافة للقلق والصداع.
- تشوه البيئة: بمعنى إنه المصاب بالمتلازمة يشوف الناس والأرضية والحيطان مشوشين وبيتحركوا وبيتغيروا ويمكن كمان يختفوا، وده ممكن يسبب لمشاكل في التنسيق الحركي وفي إدراك تعبيرات الوش، وفي النهاية ده بيضعف المهارات الاجتماعية وبيعوق ممارسة بعض أنواع الرياضة.
فيه حالات تانية بتتقاطع برضه مع المتلازمة دي. يعني ما يصل إلى 80% من اللي بيعانوا من إصابات دماغ أرضية وإصابات الراس بيبقى عندهم أعراض زي اللي في المتلازمة دي زي:
- تغير في وضوح واستقرار الكلام المكتوب.
- عدم الراحة أثناء القراية وأثناء ممارسة الأنشطة البصرية التانية.
- التواجد في أضواء ساطعة أو فلورسنت والسواقة في الليل مابتبقاش مريحة.
- الشعور بصداع والغثيان والتعب والدوخة ووجع المعدة اللي بيزيد مع القراية والضوء والأنشطة اللي معتمدة على النظر والتهيج، ده غير قلة القدرة على تقدير المسافات.
كمان الناس المصابين باضطراب نقص الانتباه بيتشابهوا في أعراض اضطرابهم مع متلازمة أيرلن، زي إنه في الحالتين، المريض بيبص بعيد عن الصفحة وبيسرح، أو بيوقّف اللي بيعمله بسهولة أو بيتجاهل الأخطاء اللي عملها.
اعرف أكتر| اضطراب فرط الحركة ونقص الانتباه .. بين المرض والميزة التطورية!
إزاي نقدر نميز الإصابة بمتلازمة أيرلن؟
طب إحنا دلوقتي لما نحتاج نفرق بين متلازمة أيرلن وبين غيرها من الاضطرابات المشابهة نعمل إيه؟
فيه طريقة للتشخيص والعلاج ف نفس الوقت اسمها ”Irlen Method“. الطريقة دي بتستخدم من حوالي 30 سنة وبتعتمد على إنك بتشوف من ورا فلتر أو طبقة ملونة بلون مُختار بعناية، وده بيتعمل على مرحلتين:
- تحديد المشكلة وشدتها وأنهي لون اللي بيساعد في تقليل الأعراض.
- بالنسبة للأشخاص اللي بيظهر عندهم تحسن يتراوح ما بين متوسط وكبير بطريقة الطبقات الملونة دي، بيبتدوا يعملوا لهم اختبارات تانية بتتضمن استخدام عدد غير محدود من تركيبات الفلاتر الملونة عشان يحددوا الأطوال الموجية الدقيقة للضوء اللي ممكن تساعد على تخطي أعراض المتلازمة.
الفكرة إن اللون اللي بيتلبس بعد كده كنضارة لازم يبقى مظبوط أوي لإن أي لون مختلف شوية ممكن يزوّد المشكلة. ولازم كمان اللون يتجرب مش بس في القراية، لأ كمان في ضوء الشمس وفي إدراك المسافات مثلًا.
اللي اخترعت الطريقة دي اسمها ”هيلين أيرلن“، وعشان كده اتسمت المتلازمة والطريقة باسمها. وفيه ناس بيفضّلوا يسمّوا المتلازمة (متلازمة ميريس – أيرلن)، عشان يدوا أوليفر ميريس التقدير اللي يستحقه عشان هو من أوائل المؤيدين لاستخدام الألوان لتقليل صعوبات الرؤية.
مين بقى اللي ممكن يصاب بمتلازمة أيرلن؟
حوالي 46% من الناس اللي بيعانوا من مشاكل في القراية أو صعوبات تعلم أو دسلكسيا، وعمومًا، المتلازمة دي ممكن تصيب الناس اللي عندهم دسلكسيا أو ماعندهمش، بس هي أكثر انتشارًا بين المصابين بالدسلكسيا ونسبتها ما بينهم بتتراوح بين 31% لـ46%. المتلازمة دي كمان فرصة انتقالها من أحد الوالدين للأطفال 80%، ولو فيه طفل في أسرة عنده متلازمة أيرلن، ففرصة إصابة الأطفال التانيين اللي في نفس الأسرة بيها 50% – 70%.
المصادر: aaic irlen ncbi google books irlen2
