معلومات لا تعرفها عن الدبدوب اللي مش ”كيوت“ خالص
كتبت – يارا كمال
أهلًا بيكم يا سناجل. بتحلموا بقصة حب عاطفية ملتهبة؟ نفسكم حد يجيب لكم دبدوب أحمر في الفلانتين؟ حاضر، بس ممكن أسألكم سؤال. مين قال لكم إن الدبدوب ده أنسب هدية للفالانتين؟ مين قال لكم إنه كيوت أصلًا؟ عشان بفرو وشكله بيبي فيس وبيتحضن وبيملا فراغكم العاطفي؟ طيب أنا هدمر لكم كل أحلامكم العاطفية دي بقى.
الدب الحقيقي مش كيوت خالص. يمكن هو أشبه للخرافة بتاعة الدبة اللي كانت بتقلي بطاطس في المطبخ، ولما صاحبتها دخلت عليها، رمت الطاسة في وشها، أي والله. إليكم 10 حقائق عن الدبدوب هتصدمكم فيه حبتين، وهيبقى فيه كلام بالأخص عن الدب القطبي باعتباره الأكبر حجمًا، وأكتر دب الناس مخدوعة فيه عشان فروه الأبيض الجميل:
1- الدب أكبر آكلات اللحوم حجمًا:
الدب من الثدييات آكلة اللحوم، وهو أكبرها حجمًا. يعني مثلاً الدب القطبي وزنه حوالي 725 كيلوجرام، وطوله من 240 سم لـ3 متر من الأنف للديل. يعني لو قارناه بوزن الأسد (حوالي 250 كيلوجرام) أو بوزن النمر (حوالي 295 كيلوجرام)، فالدب كائن ضخم جدًا. بس مش كل الدببة كدة، يعني مثلاً دب الملايو (دب الشمس) حجمه أد حجم كلب كبير. فيه 4 أنواع من الدببة الأكثر انتشاراً: الدب القطبي، دب أمريكا الشمالية الأسود، الدب البني، الدب الأشهب. الـ3 أنواع الأخيرة بتتراوح في الحجم، يعني كل واحد فيهم أكبر من التاني.
2- أجسام البغال وعقول العصافير:
المثل ده بيتقال لما يكون حد جسمه كبير، مع ذلك عقله صغير (ولو إن مفيش علاقة أصلًا)، بس عمومًا هو ينطبق أوي على الدب. الدب كائن فضولي جدًا، لو لقى جسم غريب، هيقعد يشمم فيه ويلعب. ويا سلام بقى لو طلع لك دب قطبي مثلًا، وإنت صرخت أو جريت، ده هيستفزه جدًا ويخليه يهاجمك. كمان الدببة عصبية جدًا، فلو قلقت نومها، قول على نفسك يا رحمن يا رحيم، وخصوصًا الدب الأشعث الأسود اللي بيعيش في جبال الهند، وبرغم إنه مش ضخم، بس ممكن يصيبك بأسنانه ومخالبه إصابات مميتة.
3- مشية الدب:
الدب بيمشي مشية غريبة أوي، كإنه بيتدحرج، لإنه بيرتكز على قدميه اليمين أو الشمال بالتبادل، لأ وكمان بيمشي على طراطيف صوابعه زي الإنسان، والحيوانات اللي بتمشي بالطريقة دي اسمها (Plantigrade). وبيتريقوا على مشية الغراب قال.
4- نطي نطة يا دبدوبة .. هوب هوب:
الدب في فترات راحته بيتحرك ببطء، يبان لك إنه كسول ولو جريت منه مش هيلحقك أكيد. بس بالعكس، الدب نشيط جدًا، وممكن يفاجئك وإنت بتجري منه. ورغم وزنه التقيل، ممكن يتسلق الأشجار، بإنه بيمسك جذع الشجرة بمخالبه الأمامية، ويجيب رجليه الورانية قدام.
وبالنسبة للدب القطبي، ممكن يتسلق الحواف المنحدرة بتاعة جبال التلج. كمان أقدامه المتغطية بالشعر، بتخليه يتحرك بنعومة على الجليد. والدب بشكل عام سباح ماهر، خصوصًا الدب القطبي، حتى في الميه المتلّجة، وده بسبب فروه اللي بيحميه من البرد، بالإضافة لطبقة الشحم السميكة الموجودة تحت جلده.
5- ما يقدر على القدرة غير ربنا:
الدب القطبي بياكل عجل البحر. يستناه يطلع من الميه يمدد على الجليد، فينزل الدب الميه بالراحة، لحد ما يوصل له، ويمسكه ويغرز مخالبه في جسمه، وينتهي أمره. بس برضه كل قوي فيه الأقوى منه. فيه حيوانين الدب القطبي ميقدرش يهاجمهم: فيل البحر، وثور المسك. ثور المسك بيعيش جوة قطيع، فميقدرش الدب يهاجمه، أما فيل البحر فهو ضخم ومتوحش للدرجة اللي تمنع الدب إنه يقرب له، لدرجة إن فيل البحر هو اللي ممكن يهاجم الدب القطبي ويطارده، لو شافه في الميه.
6- الإنسان أكثر شراسةً وشرًا:
بس الإنسان متوحش أكتر من الكائنات دي كلها، لدرجة إنه بيتفنن في تعذيب كائن حي من باب التسلية. كان فيه رياضة قديمة اسمها ”شراك الدببة“: كانت عبارة عن إنهم كانوا بيربطوا دب في عمود، ويشجعوا كلاب إنها تهاجمه، وكان ممكن الدب يقتل الكلاب دي قبل ما يموت هو. بس اللعبة دي اتمنعت قانونًا في بريطانيا قبل سنة 1835.
7- الدبدوب الصغنون:
رغم إن الدب كبير جدًا، إلا إن حجم الدب القطبي المولود بيبقى صغير جدًا، ما يزيدش عن الفار كتير. الدببة بتتزاوج في شهر إبريل، ودي الفترة الوحيدة اللي ممكن تشوف زوج دببة بالغين مع بعض. وفي شهر يناير أو فبراير، بتحفر الأنثى جحر في الجليد، آخره أوضة واسعة، اللي هتقعد فيها هي والدببة الصغيرين. الأنثى بتولد شبلين (طفل الدب وممكن يتقال عليه جرو كمان) في المرة الواحدة. أول أسبوعين بعد ولادتهم بتكون الدببة الصغيرة لسه مش قادرة تشوف، وبيفضلوا في العرين (الجحر ده) مش أقل من شهر وأمهم مابتسيبهمش خالص، وبتفضل ترضعهم طول الوقت. وبيفضلوا عايشين مع الأم لمدة سنة مسافة ما تعلمهم الصيد.
8- القطة كلت ولادها:
الدب القطبي الذكر مبيبقاش ليه أي علاقة بالدببة الصغيرين، لدرجة إنه ممكن يقتل صغار الدببة. مش بقول لكم غبي.
9- بياكل أي حاجة تيجي في سكته:
رغم إن الدب القطبي حيوان آكل للحوم (الحية)، إلا إنه عنده استعداد ياكل أي حاجة. الدب بشكل عام، عنده ضروس تخليه يقدر ياكل نباتات، زي الثمار والجذور وأوراق الشجر الصغيرة. وطبعًا الدببة مشهورة بحبها للعسل، حتى لو النحل قرصه معندوش مانع يقطّع عش النحل وياكل العسل اللي جواه، ويمكن كمان يرقات النحل.
أما الدب القطبي، بتكون النباتات قليلة في المكان اللي بيعيش فيه، بس ممكن ياكل كمية محدودة من التوت والأعشاب في الصيف، بس الفكرة بقى في إنه ممكن ياكل حيوانات ميتة، برغم إن دي مش طبيعته، بس معندوش مشكلة مثلًا ياكل بقايا حوت ميّت. لأ وكمان ممكن ياكل زبالة، فممكن يقرّب من مكان فيه بني آدمين عشان ياكل زبالتهم، وده ممكن يعرّض الناس دول للخطر.
10- فرو الدب القطبي مش أبيض:
أيوة، شعر الدب القطبي، شفاف ومجوّف وجلده أسود؛ عشان يمتص أشعة الشمس. طب ليه بنشوف فروه أبيض؟ احنا بشكل عام بنشوف اللون الأبيض لما كل الألوان تتعكس لعينينا، فالهوا اللي جوا تجويف الشعر بيعكس لنا كل الألوان فبنشوفه أبيض. العلماء في أواخر السبعينات لقوا إن حدائق الحيوان حول العالم الدببة القطبية بتتحوّل فيها للون الأخضر؛ لإن الطحالب اللي بتعمل اللون الأخضر ده بتعيش جوا تجويف كل شعرة مش على فرو الدب.ايه ده؟ يعني كمان فروه مش أبيض؟
أيوة يا حبيبي. ممكن تجيبلي عروسة كرنبة الفلانتين الجاي؟
المصادر
- موسوعة المعرفة – المجلد الثالث عشر
- animals.nationalgeographic
- loc
