هل ترتيبك بين أخواتك بيحدد شخصيتك؟!

كتبت: مها طـه

الصغير دايمًا متدلع. البِكري دايمًا طيب. الوسطاني هو المنسي في النص أو هو الأخبث على الإطلاق.

دايمًا بنلاقي نفسنا بنردد الكلام ده عن نوع شخصيتنا وعلاقتها بترتيبنا وسط أخواتنا، وكل واحد طبعًا بيكون متحيز أكتر لترتيبه هو، ويبدأ يعمم الفكرة على كل اللي زيه، والحقيقة إن الكلام ده فعلًا علمي، وفي كتير من النظريات اللي اتكلمت في علم النفس عن العلاقة ما بين ترتيبك وأخواتك ونوع شخصيتك.

على حسب ترتيبك بين أخواتك بتكون شخصيتك

الابن البكري: حيث المسئولية والقيادة

غالبًا لما بيجي حد يتكلم بيكون التحيُز الأكبر للابن البكري أو الكبير، واللي بيتمتع بالعديد من السمات الشخصية، زي إنه أشطر في الدراسة وغالبًا بيوصل لمرحلة أعلى من التعليم ده غير إنه طموح بدرجة كبيرة، كمان بيتمتع بقدر عالي من الإحساس بالمسئولية بالإضافة لكونه الأكثر نضجًا، ونضيف عليهم كمان إنه عنده مهارات قيادية أعلى من الباقيين.

السبب في كل الصفات دي هو كون الابن الأكبر بيكون مُحاط بقدر أكبر من الرعاية والاهتمام نظرًا لكونه أول طفل، وبالرغم من إن ده شئ جميل، لكنه في نفس الوقت بيجي معاه توقعات عالية جدًا من الآباء، بمعنى تاني بيحسوا إنه الأجدر بتحقيق أحلامهم وطموحاتهم فيه.

في علم النفس النوع ده من المعاملة والمصحوب بتوقعات بيخلي الشخص بالفعل يستجيب لتحقيق التوقعات دي أكتر، يعني لو إنت في موقع مسئولية وعليك قدر من التوقعات، فغالبًا إنت هتستجيب وتشتغل على نفسك أكتر وتحقق التوقعات دي. وطبعًا في حالة الأخ الاكبر وبما إن الآباء بيتوقعوا منه إنه يكون مسئول، فبالفعل بيكون الأكثر تحملًا للمسئولية بين أخواته.

الأخ الأوسط: التعاون والاجتماعية

الأخ الأوسط وعلى عكس ما هو منتشر _بين الأشخاص اللي ترتيبهم وسط_ مش بيكون أبدًا شخص مهضوم حقه، لكنه بيكون متعاون أكتر، أقل عنادًا وأكثر مرونة في تقبل الأشياء والأشخاص، وده السبب في إنه بيكون شخص اجتماعي ومحبوب على مستوى واسع، وبيكون صدقات بسهولة.

السبب وراء كل الصفات دي، هو إن الابن الأوسط مابيكونش مُحمل بنفس أعباء ومسئوليات الابن الكبير _عادةً الكبير هو اللي بيهتم بالصغير_، لكن كمان وفي نفس الوقت الابن الأوسط مش بيتمتع بنفس الدلع أو التساهُل اللي بيحظى بيه الأخ الأصغر، وعشان كدة ده بيخليه أقل طموحًا ومسئولية من الكبير،  وفي نفس الوقت بيتعامل مع الأمور ببساطة وأريحية أكتر، كمان كونه الطفل التاني بيخليه يتعرض لاهتمام أقل من الأهل وبالتالي ده بيسمح له أكتر بتكوين الصداقات والعلاقات الاجتماعية، اللي ممكن يكون غير مسموح بيها للابن الأكبر.

الابن الأصغر: أخر العنقود

الابن الأصغر غالبًا بيكون محبوب وجذاب أكتر من الباقيين، كمان بيكونوا على الأغلب مُبدعين أكتر من باقي اخواتهم، الابن الأصغر كمان بيتمتع بثقة في النفس عالية جدًا، وأخيرًا فالابن الأصغر بيكون الأقل إحساسًا بالمسئولية وكمان الأقل نُضجًا بين أخواته الباقيين.

السبب في كونه الأقل نضجًا وإحساسًا بالمسئولية هو إنه غالبًا بيكون متدلع أكتر وعليه مسئوليات أقل نظرًا لكونه الأصغر ودايمًا في شخص ما من العائلة بيهتم بيه، ده غير إنه بيجي بعد ما الأب والأم يكونوا عانوا في تربية إخواته الأكبر وبالتالي بتكون طاقتهم معاه أقل، ولذلك بيكون التساهل معاه أكتر، والتوقعات منه أقل بكتير، كمان الابن الأصغر بيبقى صعب إنه يكون قائد لأنه بيتعود إن دايمًأ في شخص ما هو المسئول عنه، أما عن كونه مُبدع أكتر، فده نابع من إن الأهل بيتساهلوا معاه أكتر وبالتالي بتكون عنده المساحة أكبر للإبداع.

الابن الوحيد: عندما يجتمع كل الأبناء في واحد

الابن الوحيد غالبًا بيتمتع بصفات كتيرة، لأنه بيجمع بين كل أنواع الأخوات مع بعض، فهو الطفل الأول وبالتالي ناجح على المستوى الأكاديمي، وكمان مُبدع وفي نفس الوقت بيتمتع بدهاء نوعًا ما، غالبًا بيكون ناضج ومُتحمل للمسئولية، لكنه كمان في المقابل بيكره إن حد يديه أوامر وبمعنى أدق بيحب يكون هو المُتحكم في مسار الأمور. الابن الوحيد دايمًا بتكون توقعات الأهل له عالية جدًا، لكن على عكس الابن الأكبر، فهو مش محتاج يجذب انتباههم ولا يكون على نفس قدر توقعاتهم لأنه ببساطة مفيش غيره.

الابن الوحيد غالبًا بميل لتقليد الكبار نظرًا لأنه لوحده وبيتعامل في بيت كل اللي فيه أشخاص بالغين، وهو ده السبب في كونه ناضج ومتحمل للمسئولية على الرغم من إنه وحيد، الابن الوحيد كمان مش مضطر لاستقبال قدر أقل من الاهتمام ولا الرعاية، وده بيخليهم أكثر أنانية وأقل مرونة في تقبل الأمور، لأنهم ببساطة بيتعاملوا من غير ما يكون في معوقات وبالتالي وجود المعوقات بيخليهم أكثر حدة من غيرهم.

في النهاية كل الكلام ده عبارة عن نظريات في علم النفس، قامت على دراسة عدد كبير من الأشخاص وجمع بيانات عنهم وتحليلهم نفسيًا، لكن ممكن على مستواك الشخصي تلاقي الكلام ده مش صحيح، يعني مثلا في اعتقاد عند مش قليل إن الطفل الكبير بيكون عنده إحساس إنه مضطهد والصغير خالص هو الأكثر تحملا لمسئولية أبوه وأمه لأنه اللي بيقضي الفترة الأطول معاهم وهما في سن كبير محتاجة رعاية وهكذا.

 في النهاية تفضل الحقيقة الثابتة هو إن مفيش شئ ثابت، وإن العوامل المؤثرة على تكوين الشخصية كتيرة جدًا، سواء الجنس أو الحالة الاجتماعية والاقتصادية أو حتى عدد الأبناء والفرق العمري ما بينهم، ومع ذلك مازلنا نقدر نشوف ونعرف ونحلل يا ترى نسبة كام في المئة من الكلام ده تنطبق علي كل واحد فينا، طبقًا لترتيبه بين اخواته، وبما إني الابنة الكبرى ففغليًا كل الكلام ده ينطبق عليا 😀

المصادر:   huffingtonpost  parents  scientificamerican  realsimple  AsapSCIENCE