8 مشاكل صحية ممكن تحصلك بسبب قلة النوم

كتب: أحمد حسين

النوم سلطان دي حقيقة. مش بس كده ده يمكن يكون من أهم الأشياء اللي الإنسان بيعملها في حياته، مش بس بدافع الكسل لكن بدافع الحفاظ على صحته، والـ8 حاجات اللي هنتكلم عنهم  هنعرف من خلالهم: إيه اللي بيحصل لما مابناخدش كفايتنا من النوم؟

8 حاجات ممكن تحصل نتيجة قلة النوم

1. البرد :

دراسة جديدة اختبرت 164 شخص بيتمتعوا بصحة جيدة. اكتشف القائمين على الدراسة دي إن اللي ناموا عدد ساعات أقل من 5 ساعات يوميًا أُصيبوا بالبرد أكتر من الناس اللي ناموا 7 ساعات أو أكتر.

2. مشاكل المعدة:

عدم النوم بيسبب التهاب الأمعاء وإرتجاع الأحماض، وده بيخليك عُرضة للإصابة بمتلازمة إلتهاب الأمعاء (inflammatory bowel syndrome).

3. صعوبة التعلّم:

عدم أخذ كفايتك من النوم بتأثر على قدرة الذاكرة والقدرة على معالجة معلومات جديدة، فالعلماء أوصوا بالنوم بدري شوية لما يكون وراك مدرسة أو جامعة تاني يوم علشان تاخد كفايتك من النوم وعقلك يكون قادر على تذكر المعلومات الجديدة.

4. الانفعال وتقلب المزاج:

وجد الباحثون إن قلة النوم بتسبب الإنفعال وتقلب المزاج لأن أي حاجة بتضايقنا بدرجة ما وإحنا واخدين كفايتنا من النوم، بتضايقنا أضعاف لما بنكون مش نايمين كويس.

5. الصداع الكُلي أو النصفي:

ربط الباحثون بين النوم السيء (قليل الجودة) وبين الصداع الكُلي أو النصفي. فلما تصحى في يوم من الأيام حاسس بصداع في دماغك، اعرف ساعتها إنك مانمتش كويس.

6. ضعف القدرة الجنسية:

عدم النوم أو قلته ممكن يؤدي إلى ضعف القدرة الجنسية واستجابة الأعضاء. يعني باختصار، النوم الجيد هيحافظ على صحتك الجنسية فحافظ عليه.

7. ضعف الرؤية:

دائمًا بيتم الربط بين قلة النوم وعدم وضوح الرؤية أو الرؤية المزدوجة، أو الإعتام. وكل ما صحيت لفترة طويلة، كل ما كان عندك مشاكل في الرؤية وهلاوس وحاجات كدة.

8. زيادة الوزن:

قلة النوم تُسبب زيادة الوزن، ليه بقى؟ لأنك كل ما كنت صاحي كل ما كنت هتجوع، وكل ما هتجوع كل ما هتاكل، وكل ما هتاكل كل ما هيزيد وزنك.. وهكذا بقى.

المصدر: businessinsider