7 حيوانات شبه أسطورية في الطبيعة
كتب: أحمد حسين
معظم الحيوانات اللي بنشوفها في حياتنا بيكون شكلها مألوف يعني الكلب مثلًا أو القطة أو البط، كل دي حاجات شكلها معروف لكل الناس لكن الحيوانات اللي هنتكلم عنها دلوقتي دي حيوانات فعلًا شبه أسطورية، يعني لما تسمع عنها تحس إنها ظهرت في قصص المثيولوجيا اليونانية القديمة لكن الفكرة إنها موجودة في الطبيعة وكأن ده أمر عادي يعني!
– الأوكابي – Okapi
حيوان شكله قريب جدًا من شكل الحصان لكن ألونه مختلفة يعني جسمه فيه اللون البني المحمر ووشه لونه رمادي ورجليه مخططه بالأبيض والأسود، ودي كلها حاجات بتفيده في إنه يهرب من الحيوانات المفترسة.
– حريش البحر – Narwhal
يُطلق عليه برضه الحوت وحيد القرن، وبيعيش في القطب الشمالي. الغريب في الحيوان ده إن عنده سن ممكن يوصل طوله لأكتر من 2 متر! يعتبر حريش البحر حيوان نادر الوجود، فعدد الموجود دلوقتي تقريبًا من 45 إلى 50 ألف في العالم كله.
– حيوان مدغشقر – Streaked Tenrec
حيوان شبيه للقنفد وحجمه صغير جدًا، بيعيش في مدغشقر. الحيوان ده عنده ميزة وهي إنه بيقدر يتواصل مع مجموعته عن طريق الريش اللي موجود على ضهره في الظلام، بيتواصل برضه بصوت تردداته عالية جدًا على ودن الإنسان علشان كده مابنسمعهاش.
– طائر الجنة الرائع – Superb bird of paradise
الطائر ده شكل مختلف تمامًا عن الطيور المُتعارف عليها، الريش على ديله طويل، وعنده زي درع كده على صدره لونه أزرق، وده اللي بيستخدمه الذكر في إنه يشد إنتباه الأنثى عن طريق فرده فبيكون عامل زي وش لونه أزرق في أسود مستغرب.
– الشيطان الشائك – Thorny dragon
نموذج مُصغر من حيوان ممكن بس تشوفه في فيلم أسطوري أو خيالي. بعيدًا عن شكله الغريب، الحيوان ده بيعيش وبيتغذى على النمل! طبعًا زي ما هو واضح من اسمه على ضهره في أشواك بتبعد عنه الحيوانات المفترسة زائد إن لونه بيتغير من الأحمر والأصفر الفاتح للغامق لما الجو يبقى برد.
– غزال مصاص الدماء – Vampire deer
اسمه الأصلي غزال الماء. النوع ده بيمتلك أنياب طويلة بُتستخدم في التنافس _بمعنى أصح الخناق_ على الزوجات. لحد وقت قريب الحيوان ده كان يعتبر مُنقرض لحد ما العلماء اكتشفوا وجود واحد في أفغانستان بعد 60 سنة من الاختفاء.
– واكاري أصلع – Red Uakaris
نوع من أنواع الرئيسيات (زي القردة والشمبانزي وكده). لونه المميز ده بيُظهر إنه يتمتع بصحة جيدة، لأن أي حد فيهم لونه بيكون باهت بيتم اعتبار ده مؤشر على سوء أحواله الصحية. بالرغم من إن النوع ده مابيمتلكش ديل طويل زي باقي الأنواع إلا أنه بيقدر يتنقل من شجرة لشجرة بسهولة.
المصدر
