7 اختراعات غيرت العالم ونالت سخريته!
كتبت: يارا كمال
”من يضحك أخيرًا، يضحك كثيرًا“ فعلًا أحيانًا البشر بفعل الحقد أو الشك بيتفهّوا من شأن اختراع بعد كده بيكون داخل في حياتهم بشكل كبير جدًا وبيغيرها كمان. دول 7 اختراعات أول ما طلعوا نالت منهم سخرية بعض الناس، ولكن أدينا شايفين أهوه تأثيرهم في حياتنا.
طبعًا كنت أتمنى إن اختراع الكفتة بتاعنا يبقى منهم، هو حد يكره إن يبقى عندنا اختراع بيعالج فيروس سي والإيدز، الاتنين!
اختراعات سخرت الناس منها في وقتها:
لمبة! من انهي اتجاه يعني!:
نقدر نقول إن توماس أديسون هو أبو الاختراع. الراجل روحه بترفرف على اختراعات كتيرة بنستخدمها لحد دلوقتي، ده مسجّل 1093 براءة اختراع في الولايات المتحدة الأمريكية لوحدها بس.
بس طبعًا أشهر اختراع ليه هو اختراع اللمبة الكهربائية، واللي لولاه كان زماننا دلوقتي بنذاكر على لمبة جاز زي أجدادنا ما كانوا بيعايرونا.
المهم إن الراجل لما اخترع اللمبة، مش كل الناس انبهروا يعني. وفيه لجنة برلمانية بريطانية في سنة 1878 قالت إن لمبة أديسون كويسة بس ده بالنسبة لأصدقاءهم عبر الأطلسي مش يعني بالنسبة للناس في الأمريكتين، إنما ماتستحقش اهتمام الرجال العمليين ولا العلميين.
وبرضه كبير مهندسين مكتب البريد البريطانية قال – ما يعني – إن تقسيم الضوء الكهربائي هو عار أو حكاية خيالية، أه والله خيالية!
القهوة .. سكرنا بها من قبل أن يخلق الكرم:
القهوة اللي إحنا عمالين نبلبعها دي، كان في الأول استخدامها شايع بين الصوفيين عشان يبقوا مصحصحين في العبادة بالليل.
ولما المشروب ده ظهر للناس العاديين في الشرق الأوسط، كان معجزة، لإن الناس بقى عندهم وقت أطول في اليوم يشتغلوا ويمارسوا حياتهم ويبدعوا.
وخلال القرن السادس عشر، في مدارس مختلفة من الفكر بدأت تتجنب القهوة لأسباب مختلفة، يعني بعضهم شافوا إن شرب القهوة فيه شيء من السُكْر مثلًا. وفيه ناس شافوا إن القهوة بتسبب الأمراض الشايعة وقتها.
دلوقتي طبعًا، لو أنت من عشاق القهوة، لو أي حد قال لك أي حاجة وحشة عن القهوة، ممكن تشقه نصين، مفهوم طبعًا 😀
الطائرات لا تصلح للحرب .. لا والنبي؟
الأخوين رايت لما طاروا بأول طيارة سنة 1903، كان إنجازهم مذكور في مانشتات الجرايد، وأول رحلة دي استمرت ييجي 12 ثانية.
لكن في سنة 1911، فرديناند فوش، وده جنرال فرنسي وقائد قوات الحلفاء في الحرب العالمية الأولى، قال إن الطيارات ما هي إلا لعب علمية ممتعة، لكن ملهاش قيمة عسكرية. ضحّكني والله.
بعد 8 سنين بس من كلامه ده، فيه طائرة مائية خاضت أول رحلة ليها عبر المحيط الأطلسي من نيوفاوندلاند للبرتغال.
الشمسية .. ما تسترجل ياض:
في بدايات الخمسينات من القرن الثامن عشر، الناس أهانوا ورموا الزبالة على أول راجل استخدم الشمسية في شوارع بريطانيا.
الراجل ده كان اسمه ”جوناس هانواي“ جاب معاه شمسية من فرنسا. المشكلة إن الشمسية كانت حاجة تشبه المظلة اللي بتمسكها الستات في بلده بس أخف وزنًا وواقية من المطر، وبالتالي دي ارتبطت بدي.
سواقين العربات في الوقت ده بقوا بيتريقوا عليه، لإنهم حسوا إن الاختراع اللي هو ماسكه ده بيهدد شغلهم. فين وفين، على أواخر القرن الثامن عشر، بقت الشمسية حاجة شايعة.
الكمبيوتر الشخصي .. خدوا عمري وسيبوا حياتي:
أنا شخصيًا بتنكّد جدًا، لمجرد إني أتخيل إن اللابتوب بتاعي اللي عليه شغلي وترفيهي وكل حاجة إنه يبوظ. لكن الكمبيوتر أول ما طلع، كانوا الناس بيخافوا منه.
فيه كتاب طلع سنة 1996 اسمه ”Women and Computers“، بيقول إن الستات أصابتهم حالة فوبيا من الكمبيوتر، يعني حالة كده من الخوف من إنهم يلمسوا أو يبوظوا الكمبيوتر (الحالة دي تقريبًا لسه عند أمي، مادام الكمبيوتر مش بتاعها)، ونفور من القراية أو الكلام عنه. لأ، وكمان الستات كانوا حاسين إن الكمبيوتر بيهددهم وخايفين إنهم يبقوا عبيد ليه!
التاكسي .. رايح بينا على فين يا أسطى:
في أوائل القرن العشرين، فكرة التاكسي كانت متنفذة بعشوائية شوية. وقتها مكنتش تقدر تثق في السواق وكان السواقين ممكن ياخدوك على أي حتة يعوزوها.
ممكن حتى السوابق أو اللي اتحكم عليهم قبل كده يبقوا سواقين تاكسي بدون أي قيود.
لكن كل ده اتغير لما رجل أعمال اسمه ”هاري ألين“ اشترى أسطول من التكاسي، وعيّن لهم فريق من السواقين، وبالفعل بقت أجرة التاكسي في الأسطول ده حوالي عُشر الأجرة اللي دفعها هو قبل كده.
وعلى سنة 1937، الحكومة في نيويورك كانت نظمت مين يمتلك ومين يسوق تاكسي.
التطعيم .. بعبع الأطفال:
زمان، فيه ناس كانوا ضد فكرة التطعيم (أظن إن أنت كلنا كنّا منهم وإحنا صغير). الناس دول كانوا شايفين إن فرض التطعيمات ضد حرية الإنسان في السيطرة على جسمه والموافقة على التطعيم أو رفضه.
وقت انتشار الجدري في أمريكا في سبعينات القرن التاسع عشر، كان طبعًا فيه حملات للتطعيم، ومن هنا ظهر على الأقل اتحادين ضد التطعيم.
فيه راجل من الاتحاد اللي موجود في بوسطن، اشتكى في المحاكم المحلية والعليا عشان مايتطعمش، بس طبعًا خسر القضايا دي.
الراجل مكانش يعرف إن التطعيم اللي مكانش عاوز ياخده ده عشان خايف من الحقنة أو أيًا كانت إيه مشكلته، ساهم في القضاء على المرض على سنة 1980.
المصدر: businessinsider
