.
نوّرها

المخ والعضلات: رياضيين وفي الأصل علماء

كتبت: يارا كمال

مش معنى إن العلماء علماء، إنهم معقدين ومايعرفوش عن العالم الخارجي بتاعنا حاجة، وبالتالي مش هيبقى ليهم في أي أنشطة تانية، بالعكس دول يمكن إرادتهم وشغفهم بالعلم يتنقل للأنشطة التانية دي. في المقال ده مثلا هنتكلم عن 10 أمثلة لعلماء أثبتوا إن العقل السليم في الجسم السليم بحق وحقيقي وكده 😀

إرنست رذرفورد (1871 – 1937):

علماء مارسوا الرياضة

الراجل ده بيعتبروه ”أبو الفيزياء النووية“، وحاصل على جايزة نوبل في مجال الكيمياء سنة 1908 على بحوثه في تحلل العناصر وكيمياء المواد المشعة، وكان بيلعب الرجبي (كرة القدم الأمريكية) في كلية نيلسون وجامعة كانتربري.
(الصورة في كلية نيلسون وتم التقاطها عام 1887)

 

إيفان بافلوف (1849 -1936):

علماء مارسوا الرياضة

ممكن تكونوا سمعتوا اسمه لو مرت عليكم تجربته الشهيرة بـ”كلب بافلوف“.  الراجل ده عالم مهم جدًا في مجال وظائف الأعضاء. الراجل ده أثبت إن الجهاز العصبي هو اللي بيلعب الدور الأكبر في تنظيم عملية الهضم، والاكتشاف ده هو أساس فيسيولوجيا الهضم الحديثة. (الفيسيولوجيا هي علم وظائف الأعضاء).

وده اللي وصّله بعد كده لفكرة الإشراط الكلاسيكي، وفكرة إن الكلب هيفرز لعابه لو اتعرّض للحاجة اللي بتحصل قبل حصوله على الطعام مع تكرار الارتباط اللي بين الحاجة دي والأكل زي صوت جرس مثلًا.

بافلوف تفوّق في الرياضة الروسية الفلكورية ”Gorodki“. كمان كان بيروح جيم ”سانت بيتربيرج“ أسبوعيًا هو وزمايله الدكاترة وهو بيشتغل في معهد الطب التجريبي. حتى بالأمارة كانوا بيسمعوا ”اتقدم .. اتقدم“.

 

علماء مارسوا الرياضة

روزاليند فرانكلين (1920-1958):

الست دي غلبانة جدًا بقى، لإنها اكتشفت هيكل الـDNA، ولكن علماء غيرها اللي حصلوا على التقدير على هذا الاكتشاف وخدوا جايزة نوبل، تقدر تقول سرقوه منها (وعشان تعرفوا أكتر عن القصة دي اقروا موضوعنا عن نساء أثروا في العلم). وهي في مدرسة سانت باول للبنات في لندن في سن المراهقة، كانت بتلعب تنس وكريكيت ورياضات تانية كمان، مع ذلك ده مامنعش إنها تموت بسبب السرطان في سن صغير.

 

بريستون كلاود (1912 -1991):

الراجل ده هو الجيولوجي اللي كان ليه دور كبير في معرفتنا بتاريخ الأرض وتطور الحياة عليها. الراجل ده بعد ما اتجند في القوات البحرية الأمريكية سنة 1930، أصبح بطل الملاكمة للهواة في وزن الديك بتاع قوات الاستطلاع في المحيط الهادي. ما شاء الله، الراجل متفوق في كل حاجة.

 

ميريديث جوردين (1929 – 1998):

علماء مارسوا الرياضة

جوردين بقى مكانش مجرد هاوي. الراجل ده وصل للأوليمبياد، لأ وكان فاضل له على الوصول للميدالية الذهبية حوالي أربعة سم بس! هي دي المسافة اللي فرقت نطته عن نطة منافسه جيروم بيفل في مسافة الوثب الطويل في أولمبياد 1952 (في الصورة يظهر جوردين على اليمين وفي النص بيفل). الأغرب بقى من كده إن حد يبقى محقق الإنجاز الرياضي ده، ويبقى عامل أكتر من 30 براءة اختراع ويعمل دكتوراه في الفيزياء الهندسية كمان!

باز ألدرن (1930 – حتى الآن):

الاسم ده بيفكرني بـ”باز يطير“، والشخصية فعلًا مستوحاة منه. ”باز ألدرن“ هو اللي قاد أبوللو 11، أول مركبة توصّل إنسان لسطح القمر. أهي أبوللو 11 دي اللي كان فيها نيل أرمسترونج أول شخص ينزل على سطح القمر.

”باز“ كان اللاعب الرئيسي في فريق كرة القدم الأمريكية في مدرسته الثانوي، ولما وصل للمنصب ده في الفريق، قرر يحط الرياضة كده على جنب ويركز في مذاكرته ودرجاته وده قبل ما يقدّم في الأكاديمية العسكرية الأمريكية. (في الصورة بيحضر ألدن إحدى مباريات كرة القدم، 2015)

 

أدوين هابل (1889 – 1953):

عارفين تليسكوب ”هابل“؟ أهو متسمي على اسمه. الراجل ده عمل اكتشافات مهمة جدًا في الفلك، وفي سنة 1909، ساعد فريق سلة اسمه ”Chicago Maroons“ إنه ينتزع لقبه الوطني الثالث على التوالي.

 

 

علماء مارسوا الرياضة

إنريكو فيرمي (1901 – 1954):

”فيرمي“ فاز بجايزة نوبل في الفيزياء سنة 1938 عن عمله على النظائر المشعة. فيرمي كان معروف بعناده وبنيته الجسدية القوية وقدرته على المنافسة بشراسة، وكان بيحب التنس وبيهزم منافسيه بإنه بيوصّلهم لحالة إنهاك شبه كاملة، بيفرهدهم من الآخر. لأ عنيد عنيد سواء في العلم أو الرياضة.

 

كارل ساجان (1934 – 1996):

نيجي بقى للغالي. كارل كان كابتن فريق كرة السلة بتاع مدرسته (في الصورة يظهر كارل ساجان مع فريق كرة السلة في جامعة شيكاغو في الخمسينات). ساجان كان بيحب اللعبة دي لدرجة إنه فوّت أول اجتماع ليه مع ”سيمور أبراهامسون“، وده كان طالب دراسات عليا في جامعة ”إنديانا“ واللي هيساعد كارل إنه يحصل على أول وظيفة معملية ليه. كارل طنّش الاجتماع عشان يروح يلعب شوية كرة سلة. للي ميعرفش كارل ساجان، ده عالم فلك وكونيات مهم ومشهور.

نيلز بور (1885 – 1962):

علماء مارسوا الرياضة

فاكرين رذرفورد اللي اتكلمنا عليه في الأول خالص؟ أهو ده مابيطيقش علماء الفيزياء النظرية وبيقول عليهم مغرورين، بس ييجي بقى عند ”نيلز بور“ ويقول إنه مختلف، ده بيلعب كرة قدم يا جدعان!

نيلز كان حارس المرمى في جامعة كوبنهاجن. كمان أخوه الصغير ”هارالد“ كان بيحب كرة القدم وساعد الفريق الأوليمبي الدانماركي إنه يفوز بالميدالية الفضية في أولمبياد 1908.

الفكرة كلها إن الإنسان بيحتاج اهتماماته تتنوّع، حتى لو فيه اهتمام معين هيكرّس له حياته، بس باقي الاهتمامات برضه هتخدّم عليه.


المصادر:  mentalfloss  teara  nobelprize  Nationalacademy

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى