هجص بلدي

6 خرافات حول النظافة الشخصية والعامة

كتب: أحمد حسين

داخلين على الصيف وهنبدأ نشم ريحة العرق ونتحسس مسدسنا كل ما نركب مترو ولا مواصلة عامة في عز الظهر وربنا يستر علينا، لكن على فكرة موضوع النظافة الشخصية ده ممكن مايبقاش زي ما إحنا متصورين خالص، بالعكس في كتير من الاعتقادات الشائعة جدًا عن النظافة الشخصية ممكن تبقى مجرد أوهام وخرافات جوا دماغنا وبنتناقلها بمنتهى الثقة من غير ما نتأكد.

في مقالنا هنتعرف على 6 من أشهر الخرافات المتعلقة بالنظافة العامة والشخصية، ونشوف سوا يا ترى هناخد كام من 6 في اختبار النظافة الشخصية النهاردة:

العملات المعدنية مليئة بالبكتيريا

غسل الإيدين أمر ضروري مفيش كلام طبعًا، لكن ده في حالة إنك دخلت التواليت مثلًا أو أكلت أو حتى لسه راجع من بره البيت، لكن مش ضروري خالص إنك تغسل ايديك كل ما تمسك العملات المعدنية. عدد من الدراسات أثبتت إن العملات النحاسية زي الجنيهات والنص جنيه وغيرهم قادرة على إنها تقتل كتير من البكيتيريا الموجودة على سطحها، صحيح مش كل البكتيريا، لكنها برضه مش هتكون مؤذية بشكل كبير، وبالتالي بلاش موضوع إنك تترفع عن لم الأجرة في الميكروباص ده – إلا لو مبتعرفش تحسب طبعًا- وبلاش مع كل جنيه تطلع مطهر الإيد.

Assorted_United_States_coins
صورة: الإنترنت

ارتداء القفازات أثناء التنظيف صحي أكثر

بعض الناس بيلبسوا القفازات (الجوانتي) أثناء التنظيف باعتبار إنهم كدة بيحموا نفسهم أكتر من أي عدوى أو بكتيريا أو غيره ممكن تتنقل ليهم من الأسطح اللي بيتم تنظيفها. لكن الموضوع مش كدة خالص، لأنه في الأصل من المفترض تكون القفازات دي نظيفة وجافة. لكن ارتداءها وهي رطبة أو إنك تسيبها رطبة في مكانها بعد التنظيف بيخليها بيئة خصبة جدًا للبكتيريا والفطريات المضرة. ولذلك، القفازات لازم تتنظف مرة واحدة على الأقل في الشهر بمياة ساخنة وخل ومنظفات، ولذلك برضه عدم ارتداءها وغسل الإيدين بعد التنظيف ممكن يكون حل صحي أكتر من ارتدائها في حالة لو كانت رطبة.

trueblues_gloves_onhand_3_1000_3
صورة: الإنترنت

الفريزر يقتل البكتيريا

تخيل إن حتى في درجة حرارة أقل من 18 درجة مئوية، البكتيريا مش بتموت، هي بس بتفقد قدرتها على  التكاثر والانتشار في درجات الحرارة المنخفضة. لكن بمجرد ما تخرج من الفريزر لدرجة حرارة الغرفة العادية، بترجع تاني لطبيعتها ويتتضاعف أعدادها بشكلٍ طبيعي جدًا. ده غير إن بعض أنواع البكتيريا بتكون متكيفة أصلًا مع درجات الحرارة المنخفضة وطبيعي نعيش فيها.

maxresdefault
صورة: الإنترنت

الحمام هو أقذر الأماكن في البيت

اهو ده كمان اعتقاد شائع لكنه مش حقيقي بالمرة، وتلاقي نفسك وإنت داخل الحمام عند حد قرفان ومش مستحمل وبتغسل إيدك والأوكرة والحيطان كلها بالمطهر والمنظف، لك أن تتخيل بقى إن من أكتر الأماكن اللي بتنتشر فيها البكتيريا في البيت هي الثلاجة.

الثلاجة هي أكتر مكان بنحتفظ فيه ببقايا الأكل، وطبعًا وارد جدًا يتبقى بعضها على حواف الأرفف، وفي حالة إذا لم يتم تنظيفها كل فترة مرة واحدة على الأقل، عدد البكتيريا الموجودة جواها هيتضاعف، وممكن يؤدي لتلف باقي الأكل الموجود جوه الثلاجة. وبمناسبة الكلام عن الثلاحة والمطبخ، ممكن نقول إن قطع القماش اللي بيستخدمها معظمنا في التنظيف، بالتحديد في  تنظيف المطابخ، بتحتاج هي كمان للتنظيف والتجفيف بشكل دوري، لأن زي ما قولنا الرطوبة هتخليها مكان رائع جدًا من وجهة نظر البكتيريا.

spraying-bathroom-sink-with-cleaner
صورة: الإنترنت

الصابون يقتل جميع الجراثيم

الموضوع مش سحر يعني، مفيش صابون يقدر يقتل 99% من الجراثيم زي ما بتقول الإعلانات، فمثلًا الصابون العادي غالبًا بيقضي على عدد صغير من البكتيريا الموجودة على السطح الخارجي للجلد، أما بقى الصابون المضاد للبكتيريا فده بالذات غالبًا مش يبقضي عليها من الأساس إلا في حالة إنك فضلت تغسل إيديك بيه لمدة 9 ساعات متواصلة، ده غير أخطاره التانية اللي بتخليه يقلل المناعة عن طريق قتل البكتيريا النافعة مع الضارة بدون تمييز بينهم.

اعرف أكتر| الصابون المضاد للبكتيريا.. بكتيريا أقوى مناعة أقل!

A new study by Michigan State University researchers found that only 5 percent of people who used the bathroom washed their hands long enough to kill the germs that can cause infections.
صورة: الإنترنت

العرق يسبب رائحة كريهة

لو فاكر إن الريحة الوحشة اللي شمتها في المترو دي ريحة العرق، نحب نقولك لأ، لأن العرق مالوش ريحة، ده عملية طبيعية بتحصل عشان تخفض درجة حرارة الجسم بالذات في الأيام الحارة، وفي النهاية هو عبارة عن ماء بيخرج من الغدد العرقية ومالوش ريحة، طب السؤال بقى أمال اللي بنشمه ده إيه؟!

 اللي إحنا بنشمه ده ناتج عن البكيتيريا اللي بتعيش على سطح الجلد، لإن البكيتيريا دي بتشتغل على تفكيك جزيئات العرق والتفاعل معاها وبالتالي تنتج الريحة دي، واللي طبعًا مش محتاجين نقول إننا لازم نتخلص منها أول بأول عن طريق الاستحمام وغسل الأماكن الرطبة اللي ممكن تتكاثر فيها البكيتيريا.

RF5377813
صورة: الإنترنت

اعرف أكتر| أشهر 10 نظريات علمية خاطئة


المصادر:  cidrap  medicaldaily  npr  webmd

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق