10 من حالات الحمل الأكثر غرابة في التاريخ! – بالصور
كتبت: مها طــه
في اللحظة اللي حضرتك بتقرأ فيها المقال ده، غالبًا في مئات الآلاف من الحيوانات المنوية بتلتقي ببويضات وبتلقحها، ومبروك المدام الحامل. الحمل في حد ذاته بقى ممكن يكمل وممكن لأ، ينتج عنه طفل واحد، اتنين، لكن كل ده ضمن العادي والمألوف والمتوقع.
هنا مش هنتكلم عن حالات الحمل العادية والمألوفة اللي بتحصل كل يوم ويمكن كل لحظة، حالات الحمل اللي هنشوفها حالًا كلها محاطة بظروف غريبة، أو حصلت بشكل غريب. وعلى الرغم من اختلاف أسباب الغرابة، إلا إنها في النهاية كلها حالات نادرة وغير معتادة إطلاقًا، بقولكم إيه ما تيجوا نشوف.
الحالة الأولى// طفلين تؤام من أبوين مختلفين
“ميا واشنطن” ست زي ستات كتير خلفت ولدين توأم، لحد هنا الموضوع عادي ومتكرر. لكن الحقيقة إن الولدين دول من أبوين مختلفين! اللي حصل بالظبط إن “ميا” متجوزة وبشكل طبيعي حملت من جوزها ده، بويضة خرجت وإتلقحت بحيوان منوي من الزوج عادي. بس بعدها بفترة قصيرة (يومين مثلًا) كان المبيض التاني عند “ميا” أنتج بويضة تانية، وتصادف مع ده لقائها مع حبيبها/ عشيقها، وحصل الحمل التاني بفرق أيام ما بينهم.
الحالة دي تم توثيقها طبيًا كحالة نادرة للحمل في تؤام متآخي (أخوات يعني) من أبوين مختلفين تحت اسم الإخصاب المتعدد أو الـ”heteropaternal superfecundation”. الحالات دي لحد دلوقتي في العالم تعتبر محدودة للغاية، وغالبًا بتتكشف الحقيقة دي، لما الطفلين بيبقى فيهم واحد مختلف تمامًا عن الأب، وبالتالي بيقوموا بعمل تحليل (DNA) ويتكشف المستور. بالمناسبة زوج “ميا” أخد مسئولية الطفلين واعتبر نفسه أبوهم هما الاتنين عادي.
الحالة الثانية// أكبر الأمهات على الإطلاق
سنة 2008، اعتبرت “راجو ديفي” البالغة من العمر 70 سنة، أكبر الأمهات سنًا على الإطلاق. “راجو” وجوزها حاولوا على مدار 50 سنة (طول مدة جوازهم) إنهم يخلفوا، لكن في النهاية كانوا فقدوا الأمل، وطبعًا أصبح الموضوع مستحيل بعد ما انقطعت الدورة الشهرية عند راجو في أواخر الخمسينات من عمرها.
ومع ذلك، بعد دخول تقنيات الحقن المجهري وغيرها للعيادات وانتشارها بشكل ما، راجو قررت تقوم بالعملية واللي حصل إنها فعلا نجحت وحملت عن طريق بويضة متبرعِة تم تلقيحها بحيوان منوي من زوج راجو البالغ من العمر 72 سنة، وفي 6 ديسمبر 2008 “راجو” خلفت بنت بتتمتع بصحة جيدة.
لكن في 2016، قررت الهند تعلي على نفسها، وقررت “دالييندر كور” وزوجها اللي اتجوزوا لمدة حوالي 50 سنة من غير ما يقدروا يخلفوا برضه إنها تروح نفس المستشفى اللي قامت فيها “راجو” بالعملية، وبالفعل العملية نجحت بنفس الشكل بعد سنتين من المحاولات، عشان تخلف “دالييندر” ابنها “أرمين” وهي في سن 72 سنة.
اعرف أكتر| 10 حقائق لازم تعرفهم عن الحيوانات المنوية
الحالة الثالثة// أصغر أم على الإطلاق
على ذِكر السن بقى، لازم نفتكر “لينا مدينا” المُسجلة كأصغر أم في التاريخ، واللي بدأت قصتها وهي عندها 5 سنين، لما أهلها اكتشفوا بالصدفة إنها حامل في شهرها السابع، وده لأن “لينا” بتعاني من حالة معروفة باسم البلوغ المُبكر، وده معناه إن أعضاءها التناسلية نضجوا بالشكل الكافي اللي يسمح بالحمل في سن مبكر أوي عن الطبيعي، وبالفعل أمها قالت إن “لينا” بتجيلها الدورة الشهرية من عمر 3 سنين، وبالبحث الدكاترة عرفوا إن التبويض عندها بدأ فعليًا وهي عمرها 8 شهور بس!.
بعد شهر ونص من اكتشاف حمل “لينا” وتحديدًا في 14 مايو سنة 1939، لينا ولدت ابنها “جيراردو” بعملية قيصرية، وكان وزنه وقتها 2.360 كيلوجرام، وبالمناسبة لحد دلوقتي هوية أبو جيراردو مازالت مجهولة، لأن لينا عمرها ما قالت مين أبوه. اعرفوا القصة الكاملة لـ”لينا” بصور أكتر ليها ولابنها هنا.
الحالة الرابعة// أصغر مواليد في العالم
الحالة دي مش حالة حمل غريبة، لكن الطفل الناتج عن الحمل ده هو اللي مختلف. “جيمس الجين جيل” كان أصغر طفل يبقى على قيد الحياة بعد ولادته، جيمس اتولد يوم 20 مايو 1987 في كندا بعد 21 أسبوع و5 أيام بس من الحمل (مدة الحمل الطبيعية حوالي 40 أسبوع).
حالات بقاء الأطفال المبتسرين اللي بيتولدوا قبل الأسبوع الـ22 على قيد الحياة أقل من 10%، لدرجة إن كتير من المستشفيات بترفض حالات الأطفال دول، لكن “جيمس” كان محظوظ، لأنه إتولد بوزن حوالي 482 جرام، وده يُعتبر “تقيل” شوية مقارنةً بالأطفال الطبيعين في نفس المرحلة دي من الحمل، وده اللي ساعد في بقائه على قيد الحياة.
أما بالنسبة للأكثر نحافة، فهي الطفلة الأمريكية “إميليا سونجا” _صاحبة الصورة اللي تحت_، واللي اتولدت بعد 21 أسبوع و6 أيام لكن بوزن 283 جرام، وفضلت لفترة في العناية المركزة لحد ما صحتها تحسنت ونجت.
اعرف أكتر| عن هلع الولادة في التامن هو البيبي فعلًا هيموت!
الحالة الخامسة// أكبر مواليد في العالم:
زي ما اتكلمنا عن الأصغر لازم كمان نتكلم عن الأكبر، صاحبة الرقم القياسي لولادة “أثقل” مولود على قيد الحياة في العالم هي الإيطالية “سيج كارميلينا فيديلي” سنة 1955. سيج كارميلينا ولدت طفل وزنه وقت ولادته 10.2 كيلوجرام!
وفي 2005، ولدت السيدة “فرانسيسكا راموس دوس سانتوس” في عمر 38 سنة طفل تم اعتباره “عملاق” على حسب وصف الصحف وقتها، حيث إن الطفل “أدميلتون” اتولد بوزن 8 كجم، وهو الطفل الخامس للأم، وسبب زيادة وزنه في الأغلب هي إصابة والدته بمرض السكري، اللي بيسبب خلل في معدلات الإنسولين في الدم، وبالتالي بيؤثر على حجم الجنين أثناء تكوينه.
تم تسجيل ابن فرانسيسكا راموس في موسوعة جينيس للأرقام القياسية كأكبر مولود في العالم لأنه ماكنش تم تسجيل ابن سيج كارميلينا لأن جينيس كانت لسه في بدايات تأسيسها، ومع ذلك تم ذكر المولود الإيطالي صاحب الـ10 كيلوجرامات في موسوعة جينيس، ولكن ماتمش العثور على أي صور ليه وقتها توثق الحالة.
الحالة السادسة// 5 توائم متماثلة في بطن واحدة:
“أنيت”، “سيسيل”، “إميلي”، “ماري” و”إيفون”، والمعروفين باسم (Dionne Quints). البنات دول هما الحالة الوحيدة المُسجلة لولادة 5 توائم متماثلة، وواحدة من ضمن عدد قليل جدًا من الحالات الطبيعية للحمل في توائم متعددة في نفس الوقت، والباقية على قيد الحياة بعد الولادة.
في 28 مايو 1934، ولدت الكندية “أوليفيا” الخمس بنات التؤام، والحقيقة إنها وجوزها كانوا فقراء جدًا، ولذلك في عُمر 9 شهور، تم أخذ البنات من والديهم، عشان يعيشوا تحت وصاية الدولة، ويتم إجراء التجارب الطبية عليهم، وكانوا السياح بييجوا يتفرجوا على البنات من بعيد.
لما البنات وصلوا عُمر 9 سنوات، رجعوا البنات لحضانة أبوهم وأمهم مرة تانية، لكن للأسف استمرت معاناتهم ومحاولة استغلالهم كسبب لجني الأرباح من الدعاية ومن السياحة. الخمس بنات دول عاشوا حياة صعبة وتعرضوا لكتير من الانتهاكات الجسدية في طفولتهم وكانت نتيجتها إصابتهم بصدمات نفسية، وكانت النتيجة إن البنات قطعوا علاقتهم مع أهلهم أصلًا بسبب كل ده للأسف.
الحالة السابعة// أصغر جدة في العالم في عمر 23 سنة:
“ريفكا ستانيسكو” هي الحاصلة على لقب أصغر جدة في العالم في عمر 23 سنة بس!،رفيكا من الغجر الرومانيين، وعندهم التقاليد والأعراف بتسمح بالجواز في سن صغير جدًا، لدرجة إنها لما إتجوزت كان عمرها 11 سنة وجوزها “لونيل” كان عمره 13 سنة، وبعد سنة واحدة من الجواز خلفت رفيكا بنتها “ماريا”.
وبالرغم من محاولات رفيكا مع بنتها “ماريا” إنها تكمل تعليمها، إلا إن ماريا اتبعت نفس العادات والتقاليد واتجوزت وهي في سن 11 سنة، وخلفت إبنها “لون”، وفي الحالة دي أصبحت رفيكا أصغر جدة في العالم وهي عمرها 23 سنة بس.
الحالة الثامنة// أكتر ست خلفت أطفال في العالم
بالرغم من إن الست دي هي صاحبة الرقم العالمي في موسوعة “جينيس” لأكتر ست خلفت أطفال في العالم، إلا إن اسمها مش معروف، لإنها منسوبة لجوزها “فيودور فالسيليف” الفلاح الروسي. الست دي ولدت 69 طفل!
ذكرت التقارير والسجلات التابعة لموسكو القصة دي من خلال سجلات المواليد، واللي قالت إن كل الأطفال اتولدوا بين الفترة من 1725 – 1765 ما عدا اتنين بس، والحقيقة إن ” فيودور فالسيليف” مش بس صاحب رقم قياسي من زوجته الأولى لكنه كمان من حيث مجموع أطفاله.
الزوجة الأولى أنجبت 69 طفل، وده عن طريق إنها خلفت 4 مرات في كل مرة منهم 4 توائم (4 × 4 = 16)، وسبع مرات في كل مرة منهم 3 توائم (7 × 3 = 21)، و16 مرة في كل مرة منهم تؤام (16 × 2 = 32). لو جمعنا كدة الكلام ده هنلاقي إنها ولدت 69 طفل من خلال 27 مرة حمل!
الزوجة التانية بقى لفيودور فالسيليف، خلفت 6 مرات في كل مرة منهم تؤام (6 × 2 = 12)، ومرتين كل مرة منهم 3 توائم (2 × 3 = 6) يعني من مجموع 8 ولادات خلفت 18 طفل. يعني في النهاية الراجل ده كان عنده 87 طفل، وبقى منهم على قيد الحياة 84 طفل! عرفتوا أكيد ليه فيودور صاحب رقم قياسي من حيث مجموع الأبناء ما شاء الله 😀
الحالة التاسعة// حمل في أثناء الحمل
هنا بقى مش هنتكلم عن حالة بعينها، لكن عن حالة طبية معروفة باسم (superfetation – الحمل على حمل)، صحيح الحالة دي نادرة لكنها بتحصل، والحالة دي مختلفة عن فكرة إنتاج مبيض لبويضة وتخصيبها وبعدها بيومين مثلًا المبيض التاني يفرز بويضة تانية وتتخصب برضه زي حالة التؤام المتآخي/ الحالة الأولى اللي اتكملنا عنها فوق. في الحالة دي بيبقى فعلًا في حمل قائم وموجود لكن بدل ما المبيضين يتوقفوا عن إنتاج أي بويضات زي ما هو طبيعي، في بويضة بيتم إنتاجها وبتتخصب كمان.
في الحالة دي ممكن الست تبقى عارفة إنها حامل في الشهر الرابع مثلًا وتفاجئ بوجود حمل تاني في الشهر الثاني، وفي الحالة دي الأطفال مش بيبقوا تؤام طبعًا، وبيضطروا الدكاترة يتدخلوا ويقوموا بعملية قيصرية ويخرجوا الطفل المكتمل ويسيبوا التاني لحد ما يكتمل.
الحالة العاشرة// أول راجل حامل في العالم
“توماس بيتاي” هو أول راجل يحمل ويولد أطفال في العالم، وأعتقد إن حتى لو مش عارفين اسمه لكن غالبًا نعرف صورته، توماس اللي بيُعتبر قانونًا راجل ومتزوج من “نانسي بيتاي” اللي للأسف خضعت لعملية استئصال رحم خلتها غير قادرة على الإنجاب.
توماس اتولد بنت أصلًا، وخضع لعملية تصحيح جنسي، لكنه في العملية أزال الثديين لكنه أبقى على الرحم عادي جدًا، وخضع لعلاج هرموني (جرعات من التستوستيرون). لما اتجوز وكانت نانسي مراته بتعاني صحيا واضطرت تستأصل الرحم، قرروا إن هو اللي يحمل في أطفالهم، وده تم عن طريق التلقيح الصناعي، وباستخدام حيوانات منوية تم التبرع بيها، استطاع توماس إنه يحمل في طفلته الأولى، سنة 2008. حاليًا بقى توماس ونانسي عندهم 3 أطفال جابوهم بنفس الطريقة.
اعرف أكتر|التوالد البكري: من النهاردة مفيش رجالة!
المصادر: listverse thesun guinnessworldrecords livescience babycenter
