.
هجص بلدي

“ماتشيلش حاجة تقيلة”.. 7 خرافات منتشرة عن وجع الضهر

كتبت: يارا كمال

الضهر هو الجزء البائس من جسمنا منذ الصغر، اللي بيشيل شنطة المدرسة، وبيستحمل قعدة المكتب على المذاكرة، وبيستحمل نومتنا الغلط، وعلى ما تعجّز وتكبر هينحني ويوجعك ويطلع عليك كل اللي عملته فيه بقية حياتك. طبعًا مش بالضرورة يوجعك وأنت كبير بس، وأنت عارف وكلنا في الهوا سوا. وجع الضهر بيصيب 8 من كل 10 مننا آجلًا أم عاجلًا. خلونا نصحح شوية مفاهيم عن آلام الظهر كده.

صورة: Everyday Health
  • الأسطورة تقول افضل فارد ضهرك وأنت قاعد:

طبعًا فكرة إنك تتني ضهرك كده غلط، بس مش معنى ده إنك تفضل قاعد ثابت وفارد ضهرك لفترات طويلة، لإن ده ممكن يضغط على ضهرك برضه. حاول تاخد كام استراحة كده على مدار اليوم. ممكن ترجع بضهر كرسيك وأنت رجلك على الأرض بحيث تتني ضهرك لورا شوية، والأحسن بقى إنك تقوم تقف شوية في الوقت اللي بتقرا فيه أو بتبص فيه على الموبايل أو بتتكلم فيه.

اعرف أكتر| قعدة المكتب طريقك الأفضل للموت البطئ!

  • الأسطورة تقول ما تشيلش حاجات تقيلة:

الفكرة مش في وزن الحاجة اللي بتشيلها قد ما هي في الطريقة اللي بتشيلها بيها. عارف أبطال رفع الأثقال؟ اعمل زيهم بقى. قرفص قصاد الحاجة اللي هتشيلها وأنت ضهرك مفرود وراسك مرفوعة، وقوم اقف وأنت بترفع الشيلة بقى بحيث رجلك ودراعاتك يرفعوا معاك الحمل. ما تلويش ولا تتنيش جسمك عشان ماتأذيش ضهرك. (بس طبعًا لو حاجة اتقل من إنك تقدر ترفعها ماتشيلهاش.)

صورة: webmd
  • الأسطورة تقول ريّح ضهرك يومين تلاتة:

لو جسمك بيعاني من إصابة أو ضغط، هيكون مفيد ليك إن تفرد ضهرك على السرير، بس لو فضلت فارد ضهرك على السرير يوم أو اتنين ده هيزوّد حالتك سوءً وهتتقندل زيادة.

  • الأسطورة تقول إن وجع الضهر بيحصل نتيجة إصابة:

في الحقيقة وجع الضهر ممكن ييجي من تحلل القرص التنكسي، يعني إن الأقراص/ الغضاريف اللي بين فقرات الضهر يتحلل، أو اللي احنا بنقول عليه الديسك. كمان آلام الظهر ممكن تيجي من بعض الأمراض والعدوى، وممكن تكون ناتج عن عوامل موروثة.

  • الأسطورة تقول إن الرفيعين مابيعانوش من وجع الضهر: 

في الحقيقة ممكن أي حد ضهره يوجعه. بالعكس بقى، ده الناس الرفيعين أوي زي الناس اللي عندهم اضطرابات أكل زي فقدان الشهية العُصابي (anorexia)، ممكن يحصل لهم فقدان للعظام، وده بيخليهم أكثر عُرضة لكسر العضم والفقرات. بس طبعًا زيادة الوزن بتضغط على الضهر وبتسبب ألم، وبالتالي آلام الضهر بتبقى شايعة أكتر عند الناس اللي بيعانوا من زيادة الوزن. فنحافظ على وزننا يبقى معقول، يعني لا زايد أوي ولا قليل أوي لدرجة فقدان العظام.

اعرف أكتر| الأنوركسيا: حلم الجسم المثالي ينتهي بالموت المُحقق!

  • الأسطورة تقول إن التمارين بتزوّد وجع الضهر:

بالعكس بقى، التمارين المنتظمة بتمنع ألم الضهر. وبالنسبة للناس اللي بيعانوا من ألم أو إصابة في أسفل ضهرهم، ممكن الدكتور يقول لهم تمارين مخصوص يعملوها. ممكن يبدأوا بحركات خفيفة وبالتدريج يزوّدوا شدة التمارين. وبمجرد ما الألم يروح، ممكن يبدأوا خطة تمرين تخلي الألم مايرجعش تاني.

صورة: Hero Images/Getty Images
  • الأسطورة تقول إن المراتب الناشفة أحسن للضهر:

الناس اللي بيعانوا من وجع عام مستمر في الضهر، وبيناموا على مرتبة مش ناشفة أوي بيتضرروا أقل وبيعرفوا يتحركوا أحسن من الناس اللي بيعانوا من نفس المشكلة وبيناموا على مرتبة ناشفة. في الحقيقة مفيش حاجة واحدة مناسبة للجميع. وعليه، المفروض تحاول تدور لحد ما تلاقي مرتبة مناسبة لعادات نومك ولسبب وجع الضهر عندك عشان تقلله. 

دول 7 خرافات بس عن أسباب آلام الظهر ضمن عدد أكبر من الخرافات. فنركز يا جماعة، المعلومة مش هتكون صح بالضرورة بانتشارها. فكل واحد يسأل دكتوره ويركز ويدور عن السبب الحقيقي ورا وجع ضهره… ومانجيلكوش في وجع وحش.


المصادر:  webmd  everydayhealth  spineuniverse  csp

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى