10 حيوانات الشر فيهم بس ربنا هاديهم!
كتب: أحمد حسين
الحيوانات أنواع، فيهم الحيوانات المفترسة، اللي معروفين طبعًا بأكلهم للحوم، وافتراسهم لأي حيوان أضعف منهم أو حتى أقوى علشان يحصلوا على الغذاء، وفيهم الحيوانات اللطيفة الكيوت، اللي بنقدر نربيهم في البيوت ونعتني بيهم وكده، وفيهم حيوانات بقى، الشر فيهم بس ربنا هاديهم.
يعني إيه؟ يعني حيوانات شكلهم كيوت كده ولطيف وبريء، لكن سلوكهم مالوش أي علاقة باللطافة والكيوتنس.. زي إيه؟
1- الينفوخيات (Pufferfish)
سمك الينفوخيات شكله لطيف، بعيونهم الواسعة وألوانهم الزاهية الجميلة. لكن لما بتنفخ نفسها، ده بيكون تحذير عن إنك تبعد أحسن لك، وكمان تحذير بإنها مش للأكل.
سمك الينفوخيات يُعتبر من أكتر السمك سُميّة (سام جدًا يعني)، لأن السم اللي فيها (Tetrodotoxin)، وده بيكون موجود على جلدها وفي أعضائها كمان، ولما الإنسان بياكلها، السم ده بيأثر في الأعصاب، وبيكون أقوى بـ1200 مرة من سم السيانيد!
2- الضفدع السام (Poison dart frog)
ده تقريبًا واحد من أجمل أنواع الضفادع، بل كمان ممكن نقول من أجمل أنواع الحيوانات. ألوانه متنوعة وزاهية جدًا، الضفادع تقريبًا عبارة عن لوحات بتتحرك على الأرض، بس كل ده ماينمنعش إنها سامة جدًا.
السم اللي فيها من نوعية أشباه القلويات، اللي بيتفرّع منها المورفين والنيكوتين والكوكايين. السم ده بقى موجود على جلدها بمعدلات كبيرة جدًا، ولما بيدخل الجسم، بيأثر في الأعصاب برضه، وساعتها مش بيكون له علاج، الشخص بيموت في ساعتها.
3- لوريس البطيء (Slow loris)
من أكتر الحيوانات اللي شكلها لطيف، بعيونه الواسعة وجسده الضئيل وإيديه ورجليه اللي أقرب لشكل إيدين ورجلين الأطفال. بس اللوريس البطيء بيقدر يحاكي أسلوب الكوبرا، وشكله، وصوته كمان، ومش بس كده، ده يعتبر الوحيد من الرئيسيات القادرة على تطوير عضّة سامة.
4- خُلد الماء (Platypus)
على الرغم من شكلهم الغريب شوية، إلا إنهم برضه لُطاف. بس عندهم سلاح سرّي، موجود في الذكور، عند الرجلين، في هناك شيء أشبه بالحربة المدببة اللي طرفها سام، ممكن تقضي على أي كائن حي في وقت قليل، خصوصًا في موسم التزاوج لما بيزيد مُعدل السم ده. هل محتاج أوضح أكتر من كده الحيوان ده ممكن يكون كيوت وخطر في نفس الوقت؟
5- الفار الشوكي الأفريقي (African spiny mouse)
الفيران، خصوصًا البيضا والهامسترز، يعتبروا كائنات شكلهم لطيف ومش مؤذيين، وهما كده فعلًا، بس ممكن ساعات تكون أفعالهم غريبة، زي الفار الشوكي كده. الفار ده قادر إنه يتخلّص من جلده في أي وقت، ويرجع بعد أيام ينمو تاني، وبعد حوالي شهر يرجع الفراء ويبقى شكله طبيعي تاني. ليه بيعمل كده؟ دي طريقة دفاعه عن نفسه، علشان لما ييجي حيوان مفترس ويشوفه بالشكل ده بيبعد.
6- الدولفين (Dolphins)
طبعًا كائنات لطيفة، ماحدش بيختلف على كده تقريبًا، بس الفكرة في إن الذكور منهم، بيتخانقوا مع بعض كتير جدًا، وبيكون الموضوع أشبه بخناقة إبراهيم الأبيض مع رجالة المعلم زرزور، بيقطّعوا بعض ويعلّموا على بعض بسنانهم فعليًا، وأظن ده مش سلوك كيوت خالص.
7- القضاعة البحرية أو ثعلب الماء (Sea otter)
بعيدًا عن الاسم الغريب، بس الكائنات دي لطيفة فعلًا، وكل زوجين لما بييجوا يناموا، بيمسكوا إيد بعض ويناموا (كيوت بزيادة يعني). بس الكائنات اللطيفة الجميلة دي وقت ما بتجوع بيشتغلوا زي العصابات بالظبط وبيسرقوا الأطفال من أمهاتهم علشان يجبروا الأمهات دول يجيبوا لهم أكل، فيسيبوا لهم ولادهم تاني. وهما في الحقيقة بيجوعوا كتير، وبياكلوا كتير جدًا علشان يقدروا يقاوموا حرارة الميّه الساقعة.
8- البط (Ducks)
يعني، بيقوم من النوم فرحان وبيغطس ويعوم، في لطافة أكتر من كده؟ بس الحقيقة، الكائن اللطيف ده سلوكه في التزاوج غريب جدًا. الذكور أعضاءهم بتكون موجودة داخل الجسم، وبتخرج بس وقت التزاوج، والحقيقة إنهم عصبيّن شوية، والدافع الجنسي عندهم قوي شوية، فجزء من الأطفال اللي بيتولدوا في موسم التزواج (حوالي 3%) بيجيوا عن طريق الإتصال الجنسي بالغصب، باختصار يعني بالاغتصاب!
9- حلزون القمر (Moon snail)
شكلهم لطيف ولونهم حلو، بس الحقيقة لما بيجوعوا بيقلبوا كائنات مفترسة، وبياكلوا أي كائن بحري أصغر منهم، ده غير إنهم ممكن ياكلوا الكائنات اللي من نفس فصيلتهم.
10- الدعسوقة (Ladybug)
واحدة من أكتر الكائنات اللي شكلهم حلو، بس لما بيجوعوا برضه بيبقوا أكثر شراسة. هما المفروض بياكلوا حشرة صغيرة اسمها ”المن“، وأول ما يشوفوا مجموعة من المن، هيفترسوهم فورًا، بلا كيوتنس بلا بتاع بقى، جعانين!
المصادر:
ncbi.nlm.nih gizmodo bbc smithsonianmag sciencedirect nature bbc biologists scienceblogs pugetsound bbc
