«هوس نتف الشعر»: سيبي شعرك يا أنسة!
كتب: أحمد حسين
بنات كتير بيسألوا أو بيقولوا عن مشكلة عظيمة عندهم وهي إنهم بيشدوا شعرهم وبيقطعوه وبيطلع في إيدهم، وإن الموضوع تطور معاهم لدرجة إن بعض منهن اشتكوا من إن شعرهم أصبح أضعف وأخف بالفعل، وإنهم مش قادرين يسيطروا على السلوك المتكرر ده. والحقيقة كل اللي بيوصفوه ده جزء من أعراض المرض المُسمى بـ«Trichotillomania» أو «هوس نتف الشعر».
هوس نتف الشعر في تعريفه البسيط على موقع «mental health America»، هو عدم قدرة المريض على التحكم في نزعه للشعر، سواء نتف شعر الرأس أو شعر الحواجب أو شعر الجسم. بيصيب من 1% إلى 2% من البالغين اللي أغلبهم بيكونوا ستات.
في بنت كانت بتحكي عن مشكلتها في أحد المنتديات الخاصة بالصحة، وبتقول إن الموضوع بيبدأ ببساطة، من خلال تمرير صوابعك بين خُصيلات الشعر، وشوية شوية تبدأ تشد فيهم كأنك بتلعب، وبتصيبك حالة من الرضا أشبه بالنشوة من خلال اللي بتعمله، وبينتهي الحوار وإنت مقطّع حبة شعر حلوين أو موقع شوية منه وإنت مش واخد بالك.
«هوس نتف الشعر» :
ده بيحصل ليه أو إيه أسبابه؟
الموضوع بالأساس له شِقّين، إما إنه يكون عادة سيئة أو اضطراب عقلي. لو عادة سيئة فهو نتيجة للتوتر زي بعض العادات السيئة التانية، اللي منها قرقضة الضوافر وهز الرجلين بشكل عنيف والهرش بشكل دامي وتقطيع قشرة الشفاه.
والكلام ده بيحصل في حالتين، إما بشكل واعي أو بشكل غير واعي، الواعي مدرك هو بيعمل إيه وبيعمل كده علشان يتخلص من التوتر، أما غير الواعي فبيعمل كده بشكل تلقائي وهو بيتفرج على التليفزيون مثلًا أو بيقرأ كتاب أو بيعمل فعل ما.
عادة سيئة ولا اضطراب عقلي؟
«هوس نتف الشعر» بيبقى عادة سيئة لما تبقى مدرك إنك بتعمل كده علشان متوتر، بس الكلام ده مش مؤثر عليك بشكل سلبي يستحق الوقوف عنده وبيسبب مشكلة حقيقية فعلا، ولا بيخليك مكسوف من الخروج لمقابلة أصدقائك أو زمايلك. لكن لما تحس إنك مش قادر تتوقف عن فعل نتف الشعر أو الأفعال التانية، وتحس إن ده بيسبب لك مشاكل بخصوص مظهرك، وكمان إنت مش مدرك سبب أفعالك بيبقى ساعتها في احتمالية إنه يكون اضطراب عقلي وهنا الطبيب النفسي هو اللي بيحدد أفضل طريقة للتصرف والعلاج.
إيه أعراض الهوس ده؟
- زي ما ذكرنا في الأول، شد أو نتف الشعر بالإيد أو بأداة (قلم مثلا) من فروة الراس أو الحواجب أو الرموش أو شعر الجسم.
- إحساس متزايد بالتوتر قبل البدء في النتف، أو إحساس بضرورة مقاومة النتف والشد ده.
- الشعور بالنشوة أو المتعة أو التخلص من التوتر بعد شد الشعر وتقطيعه.
- وجود أجزاء فارغة من الشعر في الرأس أو الحواجب أو أجزاء من الجسم وملاحظتها بشكل واضح.
- عض أو بلع أو أكل الشعر المقطوع.
- تمرير الشعر المقطوع على الوجه.
- الشعور برغبة في التخلص من عادة شد الشعر ونتفه بشكل مستمر من غير نجاح في ده.
- مواجهة مشاكل في مكان العمل أو في مكان الدراسة بسبب هوس نتف الشعر.
طيب، لو عادة سيئة إزاي ممكن اتخلص منها؟
موقع «Wiki.How» ذكر بعض الخطوات اللي تقدر تساعد في التخلص من العادة السيئة دي، ومنها:
- التركيز على الأفعال: بمعنى ملاحظة التعامل مع الشعر، هل هو مجرد شد بسيط ولا شد بيؤدي لسقوط شعر كتير؟ وإذا كانت الإجابة التانية، فيحاول الشخص المتضرر إنه يقلل من الواجبات اللي عليه علشان يقلل التوتر، وإذا ماكانش ده بإيده، يحاول ينبّه نفسه ويشغل إيده في أي حاجة تانية غير شد الشعر، ممكن مثلا يمسك كرات الضغط المطاطية اللي بتستتخدم للتخلص من التوتر.
- تخطيط اليوم: شيء مهم، ترتيب الأولويات ومعرفة إنت عايز تعمل إيه في يومك عشان تقلل من التوتر والقلق.
- البحث عن شيء جديد يتعمل، زي تعلّم آلة موسيقية، أو كورس برمجة، أو فوتوشوب، حاجة يعني تشغل بيها نفسك وتبعد بيها إيدك عن شعرك.
- للبنات: ممكن يستخدموا غطاء للرأس، يعني مثلًا بونيه أو تربون، ويا سلام بقى لو شغلتي نفسك وعملتيها بالتريكو مثلًا أو كروشية، يبقى ضربنا عصفورين بحجر، أو تعملي شعرك كحكة دايمًا.
- لو كل ده ماجابش نتيجة، يبقى لازم تستشير طبيب أو اخصائي نفسي علشان يقدر يوصف لك علاج مناسب
معظم الكلام ده ينطبق كمان على العادات السيئة زي ما ذكرنا قبل كده، قرقضة الضوافر وإزالة قشرة الشفّه وهز الرجلين بعنف وهرش الجلد لدرجة إنك ممكن تجرحه، ودول ممكن يكونوا محتاجين موضوع لوحدهم.
باختصار، هوس نتف الشعر ممكن يوصل لدرجة تسبب مشاكل نفسية واجتماعية وجسدية عن المصاب به، لذلك استشارة الطبيب النفسي في حالة مواجهة مشكلة زي دي أمر مهم وضروري. هو مالوش أدوية مخصصة لعلاجه، لكنه بيوصل في بعض الأحيان للاكتئاب، وساعتها ممكن الطبيب النفسي يكتب للمصاب أدوية مضادة للاكتئاب.
