هل كان بنو اسرائيل مصابين بالبارانويا؟
كتبت: يارا كمال
أنا ماقصدش كل بني اسرائيل، أنا أقصد أولاد سيدنا يعقوب مش الأحفاد وباقي السلالة. إخوات سيدنا يوسف اللي من أم تانية كانوا حاسين إن سيدنا يعقوب بيحب يوسف أخوهم أكتر منهم وبالتالي قرروا يتخلصوا منه عشان يبقوا هما اللي على الحِجْر، والموضوع وصل معاهم لحد التنفيذ مش مجرد تخطيط أو إحساس بالاضطهاد. يا ترى إخوات سيدنا يوسف كانوا مصابين بالبارانويا؟ كلهم كده جت لهم فرّة بارانويا؟
إيه هي البارانويا ؟
البارانويا هي إن حد يكون عنده شعور غير مبرر وغير عقلاني ودائم بإن الناس مترصداك ومستقصداك، يعني قاصدين يسببوا لك مشاكل. وفيه 3 أنواع رئيسية من البارانويا: اضطراب الشخصية المرتابة (Paranoid personality disorder) والاضطراب الوهامي (Delusional (paranoid) disorder ) والفصام البارانويدي (paranoid schizophrenia).
بس قبل ما نشرح كل واحد فيهم، تعالوا نعرف إيه أعراض البارانويا، واللي بتتراوح من أعراض بسيطة لأعراض شديدة:
- سهل إن مريض البارانويا يحس بالإهانة أو الاستياء.
- من الصعب إنه يثق في الآخرين.
- بيفهم تعليقات وكلام الآخرين بإنها كلمات سيئة موجهة ليه.
- دايمًا في حالة دفاع عن نفسه.
- بيكون عدائي وبيجادل كتير.
- مابيقدرش يوصل لحلول وسط أو توافق مع الناس.
- بيكون صعب عليه – إن لم يكن مستحيل – إنه ينسى ويسامح.
- بيفترض إن الناس بيتكلموا عليه وحش من ورا ضهره.
- بيبقى شكاك بزيادة وفاكر إن الناس بيحاولوا يكدبوا عليه أو يغشّوه.
- مايقدرش يأتمن حد على سر لإنه أصلًا مابيثقش في حد.
- عنده صعوبة في إنه يكون عنده علاقات اجتماعية.
- بيشوف العالم مكان للتهديد المستمر.
- بيحس إن العالم كله مضطهده.
- بيؤمن بمؤامرات مالهاش أي أساس من الصحة.
يعني هتحسه أحمد وفيق أوي في نفسه وهو في مسلسل سقوط حر فعلًا. طبعًا كل الأعراض دي بتخلي المريض مش عارف يتعامل مع الناس وبتأثر سلبًا على حياته الاجتماعية. في المسلسل أحمد وفيق كان متأكد من إن مراته بتخونه، مع إنه هو اللي كان بيخونها مع أختها (نيللي كريم)، لأ وكمان أقنع نيللي إن أختها بتخونها وخلاها تخطط معاه لقتلها وقتل جوزها!
تعالوا بقى نشوف كل نوع من البارانويا بيعمل إيه:
اضطراب الشخصية المرتابة .. حاجة كده على خفيف:
ده أبسط نوع فيهم، لإن أغلب المصابين بالاضطراب ده بيتصرفوا طبيعي، بالرغم من إنهم مابيبقاش عندهم ثقة في العالم من حواليهم. أما لو التصرفات والاتجاهات المرتبطة بالاضطراب بقت واضحة، فغالبًا هتكتشفها لو أنت بقى لك كتير في حياة المريض.
الاضطراب الوهامي .. هل عاطف السكري بارانويد؟
النوع ده من البارانويا بيخلي فيه وهم معين أو فكرة مش حقيقية مسيطرة على المريض بدون أي علامة على المرض العقلي، وسلوك المريض هنا بيعتمد على الوهم اللي بيسيطر عليه.
يعني مثلًا لو المريض حاسس بالاضطهاد والفكرة دي مسيطرة عليه ممكن يبقى شايف إن الناس بتراقبه وبتتآمر عليه. وممكن تبقى مطاردة أو تعقب شخص ما هي اللي تحصل نتيجة الاضطراب الوهامي، يعني مثلًا المريض يبقى فاكر إنه على علاقة بنجم سينمائي كبير وهو عمره ما قابله، زي ما عاطف السكري كان شايف إن سعاد حسني بتحبه، وزي فتحي عبد الوهاب في فيلم ”بحبك وأنا كمان“. ممكن المريض برضه يفتكر إنه عنده مرض خطير، حتى لو الدكاترة أكدوا له إنه بخير.
الفصام البارانويدي .. هنا الموضوع وسع أوي:
ده أشد نوع بقى وبتبقى الأوهام والهلاوس هنا غريبة أوي زي إن المريض يتخيّل إن أفكاره بتتذاع في الراديو. المريض في الحالة دي بيحس إن العالم مربك بالنسبة له جدًا وبيبقى عنده أزمة في التصرف بشكل طبيعي بدون علاج.
لم يُعرف السبب، فدام العجب!
لحد دلوقتي محدش يعرف أسباب البارانويا بشكل واضح، بس فيه نظريات بتقول أسباب مختلفة بس مفيش سبب منهم أكيد:
- الجينات: بس برضه الأبحاث مش كفاية ومش حاسمة. فيه بعض الدراسات بترجّح إن فيه علاقة جينية بالمرض ده، وفيه دراسات تانية بتقول إن مفيش علاقة بين الجينات والبارانويا. برضه مش أكيد إذا كان الاستعداد للإصابة بالمرض بيكون موروث ولا لأ.
- كيمياء المخ: فيه باحثين شايفين إنه بما إن فيه مخدرات زي الكوكاينن والماريجوانا بتغير كيميا المخ، وفي نفس الوقت بتسبب أفكار ومشاعر وتصرفات مرتبطة بمرض البارانويا، يبقى البارانويا ممكن تكون اضطراب بيوكيميائي في المخ، لإن كيميا المخ اللي بتكوّن الأساس بتاع أفكارنا ومشاعرنا. بس برضه احنا لسه مش عارفين إيه اللي بيسبب الاضطراب ده، لو هو فعلًا السبب في البارانويا.
- الأحداث الصادمة في حياتنا: على سبيل المثال، لو حد اتعرّض في طفولته لمعاملة سيئة ممكن ده يشوّه الطريقة اللي هو بيفكر بيها طول حياته، أو يشوّه مشاعره، فيمكن ده يكون سبب في البارانويا.
- نتيجة ضغط: بعض الدراسات توصلت لإن البارانويا بتكون أكثر شيوعًا بين الناس اللي بيتعرضوا لضغط شديد ومتواصل زي أسرى الحرب، بس إزاي الضغط بيسبب البارانويا .. الله أعلم.
- مجموعة عوامل: وليه ماتكونش الحاجات دي كلها؟ يعني ممكن يكون السبب مجموعة عوامل جينية وعوامل محيطة بالمريض تكون هي اللي بتسبب البارانويا.
أنا ماحدش يكتشفني!
المشكلة بقى إن البارانويا صعب تتشخص لإن الإحساس المبالغ فيه بعدم الثقة شايع في اضطرابات عقلية كتير ، وممكن كمان إحساس عدم الثقة يحس بيه الناس المصابين بالخرف. المشكلة كمان إن مريض البارانويا مابيثقش في أي حد، فيبقى إزاي هتوديه لدكتور ولا توديه مستشفى؟
التشخيص ممكن يتضمّن التاريخ الطبي للمريض والفحص الطبي وتقييم الأعراض والاختبارات النفسية واختبارات لاستبعاد الاضطرابات النفسية التانية اللي ممكن تسبب نفس الأعراض.
كمان العلاج مابينهيش البارانويا خالص، بس بيساعد المريض على التعامل والتأقلم مع الأعراض اللي بيعاني منها وإنه يعيش حياة أحسن. فيه علاج عن طريق الأدوية زي العقاقير المضادة للقلق وللذهان واللي بتخفف شوية من حدة الأعراض، وفيه علاج من خلال جلسات مع الدكتور، بس المشكلة إن مريض البارانويا لا بيثق في الأدوية ولا في إنه يتكلم مع حد في مشكلته. ممكن كمان مهارات التأقلم تُستخدم عشان تساعد على تحسين تعامل المريض مع الناس وده ممكن يحصل من خلال العلاج بالاسترخاء وتعديل السلوك وأساليب الحد من القلق. ولو الحالة خطيرة بقى، ممكن المريض يحتاج يتحجز في المستشفى لحد ما حالته تستقر.
وعلى العموم لو أنت بتبص للأعراض بتاعة البارانويا وشايف إنها بتنطبق عليك، فأنت في حالة من الاتنين: يا إما تروح للدكتور وتطمّن على نفسك، يا إما أنت مصاب باضطراب الشخصية الهستيرية وتحب تتوهم إن عندك أي مرض سمعت أعراضه وده برضه هتعرفه من الطبيب النفسي، وعشان تعرف أكتر عن اضطراب الشخصية الهستيرية، اقرا الموضوع ده: اضطراب الشخصية الهستيرية: ”أيوة أنا عندي نفس المشكلة دي“
المصادر:
