موعد غرامي في 2040
كتب: أحمد حسين
تقريبًا، العلم ماسابش حاجة ماحطش بصمته عليها، كل شيء حاليًا أصبح العلم له دور فيه بشكل أو بآخر، حتى المواعيد الغرامية أو الـ Dates بمعنى أصح، اللي كانت غالبًا بتتم في كافية أو حفلة أو مكان ترفيهي عمومًا، العلم حط بصمته عليها، وده اللي هيظهر في الـ25 سنة القادمة.
بعد عدة مقابلات مع خبراء علم الإنسان (Anthropology)، والتكنولوجيا، والطب الحيوي، تم صياغة نسق أو سياق خاص بالمواعيد الغرامية وشكلها سنة 2040 وكانت دي النتايج:
1- مواعيد في الواقع الافتراضي: بحلول عام 2040، هتخلاج مع حبيبتك في راندي فو من غير ما تتقابلوا حتى، المقابلات دي هتكون في العالم الافتراضي، وهنقدر نتقابل عن طريق الـ(VR) أو الواقع الافتراضي.
2- القدرة على رؤية المشاعر: أحد الشركات دلوقتي بتشتغل على مشروع ”تاتوو – Tattoo“ بيُظهر مشاعر الشخص اللي قدامك. مثلًا، لما تحس بمشاعر حب تجاه الشخص اللي قدامك، شكل سداسي هيظهر على إيدك، وهكذا بقى.
3- علاقات مع روبوتات: في الفترة الأخيرة تقدمت صناعة الروبوتات بشكل ملحوظ، ومن المتوقع إن الروبوتات هتحل محل الإنسان، حتى في العلاقات العاطفية، فالروبوتات هتشكل ضغط عاطفي على الشريك أقل بكتير من اللي بيحصل في العلاقة العادية بين البشر، العلماء قالوا إنهم قريب هيقدروا يأسسوا لعلاقة ما بين روبوت وإنسان.
4- نهاية الصمت المُحرِج: بحلول سنة 2040، هيكون تم اختراع ذكاء اصطناعي يقدر يحلل البيانات بسرعة، ويبدأ يبعت لعقلك جُمل تقدر تبدأ بيها الكلام، وانطباعات سريعة على الكلام ده، وكمان نصايح علشان تعدي المقابلة على خير.
5- انفصال إفتراضي: بما إننا بقينا بنضحي بخصوصيتنا عمّال على بطّال في الفضاء الإفتراض الإجتماعي دة، فالعلماء شايفين إنه البشر لما يوصلوا في 2030، هيكونوا البشر وصلوا لمرحلة عالية من فضح الخصوصية لدرجة إنهم ممكن ينشروا انفصالهم (أو ينفصلوا بمعنى أصح) على النت.
6- مطابقة الأنماط السلوكية: في المستقبل، هنبدأ بالتدريج نعتمد على البيانات الإلكترونية علشان نتخذ قرار بشأن العلاقات العاطفية، زي نحب مين؟ هنتجوز ولا لأ؟ نجيب كام طفل؟ وهكذا.
7- مطابقة الحمض النووي: بعض مواقع ”المواعدة“ بيقولوا إنهم بيستخدموا سلسلة من الخوارزميات في تحديد الشريك المناسب ليك. في دراسة حديثة اقترحت إن الناس بيميلوا للمتشابهين معاهم فيما يخص الحمض النووي أو الـ DNA، وعلى ما تيجي سنة 2040، هيكونوا غالبًا اخترعوا أجهزة تقدر تحلل الحمض النووي للأشخاص اللي قدامك.
8- مواعدة عابرة للقارات: مع زيادة الإختراعات اللي بتخص وسائل المواصلات، وتطويرها علشان تكون سريعة، زي الـ (Hyperloop) واللي بيتحرك _نظريًا_ بسرعة 223 متر في الثانية، وغيره من وسائل نقل حديثة هتقلل المسافات بين الدول بشكل كبير، رجح العلماء إن المقابلات/المواعيد الغرامية بعد كدة هتبقى بين ناس من دول مختلفة مش بس محافظات مختلفة.
المصدر
