.
ليه وإزاي؟

مفاعل حيوى يصنع كل الأدوية!

كتبت: مها طه

الحصول على دواء معين يعتبر مشكلة حقيقية فى بعض المناطق فى العالم وخصوصًا المناطق النائية، عشان كده فى مجموعة من الباحثين فى الولايات المتحدة طوروا مفاعل حيوى صغير ومحمول يقدر ينتج أنواع مختلفة الأدوية فى أى مكان.

طب إزاى بيشتغل المفاعل ده وينتج الأدوية المختلفة؟

بيتم خلط مجموعة من الأحماض والمحتويات الخلوية وإدخالها للمفاعل ده، اللي بدوره بينتج أنواع مختلفة من البروتينات اللى ممكن تعالج كل حاجة تقريبًا من أول السكر للأنيميا، بالإضافة لعلاج أنواع مختلفة من الأمراض المعدية.

المفاعل ده أكتر كفاءة من أى جهاز تجارى مُستخدم حاليًا، وده لأنه بيقدر ينتج أنواع أكتر من البروتينات عن اللي بيتم إنتاجها بالطريقة التقليدية، بالإضافة لكده فالبروتينات المُنتجة دى ممكن تحسينها بشكل كبير عن طريق تسهيل التفاعلات الكيميائية فى المفاعل.

المفاعل ده بيتكون من إيه؟

فى قلب المفاعل ده فى نوعين من الشقوق، وقنوات طولها حوالى 4.9 متر بتكون متبطنة بغشاء ميكروسكوبى من السيليكون. التفاعل بيحصل فى واحدة من القنوات دي، وبعدين البروتينات الناتجة بتمر منها عن طريق غشاء للأنبوبة التانية وبتبقى جاهزة للتجميع. التبادل اللى بيحصل بين المواد الداخلة فى التفاعل زى ما بينتج البروتينات، كمان بينتج مواد ممكن تعطل شوية إنتاج البروتينات لكن وجود الأغشية دي بيمنع المواد دى من إنها تعطل الإنتاج فى القنوات.

بالرغم من إنه لسه الجهاز ده محتاج وقت عشان يبدأ يُستخدم تجاريًا، لكنه ممكن فى يوم من الأيام يكون الجهاز ده السبب فى إنقاذ مرضى كتير موجودين فى مناطق نائية، تكاليف الجهاز ده لحد دلوقتى مش محددة بالظبط لكن فريق البحث بيتوقعوا إنه يكون أقل من أى حل تقليدى موجود حاليًا.

الفرق الرئيسى بين المفاعل ده وأى جهاز تانى هو إن المواد العضوية مش لازم تكون حية عشان يقدر ينتج منها بروتينات وده طبعًا بيخليها تنفع تتنقل لمسافات أطول وتتخزن لمدة أطول، من أكتر الناس اللى ممكن تستفيد من التقنية دى هما الجنود اللى بيكونوا فى حروب او فى مناطق حدودية بعيدة عن المدن وبالتالى بيبقى المرض ووجود أدوية متوفرة هو مشكلة حقيقية.

الجهاز ده ممكن يحسن صناعة الأدوية كلها لأنه هايقضى على مشكلة الأدوية محدودة الإنتاج والأدوية عالية التكاليف، الجهاز ده ممكن يُستخدم فى المناطق اللى بتظهر فيها أوبئة خطيرة أو كوارث والوصول ليها بيكون صعب جدًا.

باستخدام الجهاز ده بقى ممكن إنتاج بروتينات كتيرة وبشكل أسرع، وده اللى بيخلى التقنية دى مثالية فى مجال الرعاية الصحية، الجهاز ده بيقلل من الأدوات اللى كانت لازمة لتصنيع البروتينات وبيفتح الباب لتخليق البروتينات فى أى وقت وأى مكان محتاج للدواء مع ضمان بقاء البروتينات باردة ومحفوظة أثناء الشحن والتخزين.


المصدر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى