لو سمحت، واحد تشيز كيك من غير سكر!
كتب: أحمد حسين
تقريبًا كده معظم الناس بتحب الحلويات، وتقريبًا برضه نسبة كبيرة منهم مصابين أو معرضين للإصابة بمرض السكر. طيب هل في أي طريقة نحقق بيها المعادلة الصعبة بحيث الناس ياكلوا حلويات عادي من غير ما ييجي لهم سكر؟
طبعًا كلنا عارفين إن الحلويات أشكال وألوان، في مثلًا الشيكولاته ودي غالبًا كلنا كبشر بنستهلك كل مخزونها اللي موجود في الأرض كل سنة، في البسبوسة والكنافة (بالمانجا أو نابلسي أو غيره) وآيس كريم وكيك، ده غير الفواكهة المسكرة والمكسرات.
مسموح لنا ناكل حلويات ولكن!
”د. والتر ويليت“، رئيس قسم التغذية في كلية هارفارد للصحة العامة، قال إنه المزيج اللي بيكون من السكر والدقيق الأبيض والزبدة والدهون غير المُشبعة، هو مرض السكر مقدم على طبق من ذهب. ربطت الدراسات بين المكونات دي وبين زيادة السمنة ومعدلات الإصابة بمرض السكر من النوع 2 (Diabetes type 2). فإذا كنت بتاكل حلويات زي دي كل يوم، فإنت غاوي مشاكل بصراحة!
طبعًا كل شيء في الدنيا بيكون فيه مساحة رمادية ما ممكن الناس كلها تتجمع عليها، خصوصًا لما يتعلق الأمر بالنظام الغذائي (الدايت). ”د. راشيل جونسون“، أستاذ التغذية في جماعة فيرمونت ورئيسة لجنة التغذية بمعهد القلب الأمريكي، بتقول لمحبي الحلويات إنهم لو كانوا بيمارسوا نشاط بدني وبيتحركوا طول اليوم، وبياكلوا أكل فيه سكرياته قليلة طول اليوم، ساعتها ممكن ياكلوا حلويات لكن يخلوا بالهم من الكمية ومش كل يوم.
ولازم نوضح إن اللي ”د. جونسون“ تقصده بالحلويات هو السكريات المضافة، يعني اللي مابتكونش موجودة أساسًا بشكل طبيعي في الأكل اللي بنستهلكه. مثلًا، معظم منتجات الألبان والفواكة بتحتوي على سكر في شكل فراكتوز ولاكتوز لكن لما بتشتري بقى عصير فواكة من أي مكان، غالبًا بيكون فيه نسبة سكر عالية مضافة. الدراسات اللي تناولت الموضوع ده قالت إنه السكريات المضافة دي بترفع ضغط الدم، وبتعلي نسبة الدهون في الدم بطريقة غير طبيعية، ده غير كمان أمراض القلب.
وفقًا للجنة التغذية بمعهد القلب الأمريكي، مقدار السكر اللي مسموح للمرأة بتناوله في اليوم مفروض لا يتعدى ست معالق صغيرة (100 سعر حراري)، أما بالنسبة للراجل، فالمقدار بيكون حوالي 9 معالق صغيرة (150 سعر حراري). طبعًا الحلويات اللي بنجيبها من بره بيكون فيها أضعاف المقدار ده، يعني بولة الايس كريم اللي بتاكلها ممكن تخليك تمتنع عن أكل الحلويات لمدة يومين تلاتة مثلًا رغم إن نسبيًا الآيس أهون من غيره من المنتجات التانية كتير، يعني مثلًا، ”د. جونسون“ قالت إن كل شيء من الكاتشب لصلصة السلطة وصلصلة الطماطم، كل ده مليان سكر إضافي.
تمام، يبقى كده الحلويات مش مفيدة ليك لكن لو كنت من محبي الحلويات، فالأفضل إنك تاكل منها بحرص وبكميات محدودة. ”نيري دارداريان“، مدير مركز التغذية المتكاملة والتنسيق في جامعة دريكسل، قالت إنها لما كانت بتحط قواعد وقيود على كل شيء، كانت بتحس إنها عايزة تاكل من الحاجات أكتر وأكتر عشان كده من الأفضل ليك تاكلها مره في الأسبوع مثلًا أو في الإحتفالات، ماتخليش حاجة في نفسك من الآخر، والأفضل طبعًا لو الحلويات دي معمولة في البيت عشان تبقى عارف مقدار السكر بالظبط فيها، أقول قولي هذا وبالهنا والشفا.
المصادر
