المخ اللي أكلته يا هانيبال يا ليكتر هيطلع على جتتك!
كتبت: يارا كمال
بمناسبة الهالويين اللي كان من فترة قريبة، وأفلام الرعب اللي الناس بقالها فترة مهووسة بيها أكتر من المعتاد بدون سبب معروف أو يمكن بسبب نزول أفلام رعب قوية في السوق اليومين اللي فاتوا، أو هكذا قال عنها بعض المشاهدين، افتكرت لما ماما كانت مابترضاش تشرح لي هو ليه فيلم هانيبال بشع ومرعب حفاظًا على مشاعري، لحد ما معيدة معانا في الكلية كلمتني على لقطة هانيبال فيها كان بياكل مخ ضحيته وبيأكّلها منه.
طب صحيح، إيه اللي ممكن يحصل لو أكلت مخ إنسان؟!
يعني هل في أي فايدة محتملة طيب ولا هو أذى وخلاص؟ لو حد كان نفسه هافاه على مخ بني آدم، أحب أقول له إن للأسف ده مضر خالص بل وقاتل. الافترا وحش برضه!
فيه قبيلة في دولة بابوا غينيا الجديدة كانوا الناس فيها لحد الستينات بياكلوا الميتين كطقس جنائزي. مابطلوش العادة الهباب دي، إلا لما العلماء توصلوا لإن أكل مخ الإنسان بيسبب مرض اسمه ”كورو“ واللي بيخلص على مخهم زي ما خلصوا على مخ الغلبان اللي مات ده (تحسها برضه شبه انتقام روح القتيل في أفلام الرعب). والمرض ده ممكن يتنقل كمان بلمس المسام المفتوحة أو الجروح.
الكورو مرض من ضمن اعتلالات الدماغ الإسفنجية المعدية، واللي بيميزه تراكم بروتينات (اسمها البريونات) متنية ومشوهة على نسيج المخ، وده بيؤدي لتدهور وظايف المخ، وبتعيث فسادًا على المادة الرمادية في مخك وتسيبها وهي عاملة زي إسفنجة مشوهة.
المرض ده بيأثر بالأساس على المخيخ، وهو المسئول عن التنسيق، وعشان كده الأعراض الأولى عادةً بتكون مشية غير مستقرة وارتعاشات وتقل اللسان (أصلًا كلمة ”كورو“ عند القبيلة دي معناها رعشة). وبالرغم من إن الموضوع بائس أوي، إلا إن من أعراض المرض إن المريض ييجي له نوبات ضحك عشوائية. من أعراضه برضه الصداع الشديد وصعوبة البلع.
فترة الحضانة ممكن تستمر من سنوات قليلة لحد عشرات السنين ويمكن توصل لستين سنة، بس مجرد ما بتظهر الأعراض الأولى، المريض بيتوفى خلال سنة. وللأسف المرض ده مالوش علاج بيقضي عليه ولا حتى بيحجمه، وحلّه الوحيد هو إن الناس دول يبطلوا ياكلوا أمخاخ بني آدمين، وده اللي حصل بتشجيع من الحكومة، عشان كده المرض ده تقريبًا اختفى.
ده إحنا ناكل أعضاء تانية بقى!
لو حضرتك من آكلي لحوم البشر ومصمم تاكل أي حتة في الجتة أو لو حضرتك نفسك ومُنى عينك تاكلي دراع أختك، فأحب أبشركم بإن مفيش أي أمراض مقترنة بأكل أي جزء تاني في الجسم.
مبدئيًا، الرجل البالغ فيه ما يزيد بحاجة بسيطة عن 80 ألف سعر حراري، يعني لو أكلته هتحصل على العدد ده من السعرات. طبعًا دي بروتينات ودهون كتيرة عليك أوي، فالطبيعي إنك تاكل عضو واحد، فمثلًا لو أكلت دراع إنسان، هتحصل على حوالي 1800 سعر حراري، يعني أغلب السعرات اللي بيحتاجها الإنسان في اليوم (الست بتحتاج 2000 سعر حراري في اليوم، والراجل بيحتاج 2500 سعر حراري في المتوسط).
اقرا موضوعنا عن السعرات الحرارية: احسب الكالوري بالكيلو يطلع لك الوزن في الساعة! .
أما لو أكلت قلب إنسان، ففي الغالب هتحصل على حوالي 720 سعر حراري. بس يعني يا ابني استهدى بالله. لو كل اللي أنت محتاجه شوية سعرات حرارية، روح كل لك تلاتة سنيكرز ولا حتتين تلاتة بيتزا، والدنيا هتبقى تمام، من غير ما تقرقش في قلوب الناس وجو الرعب ده.
زائد بقى إن دي مش أحسن وسيلة للتغذية، بسبب كل الدهون المشبعة اللي هتخش لجسمك من لحم البشر اللي أنت بتاكلها، في حين إن جمعية القلب الأمريكية بتوصي بإن يا دوب بس 5% تقريبًا من السعرات الحرارية اللي بنحصل عليها تكون من الدهون المشبعة، وبالتالي فلحم البشر واللحوم الدهنية الكتير عمومًا غلط على صحتنا.
أرجو تكون حضرتك صرفت نظر. مش ناقصين احنا أفلام رعب مبنية من قصص حقيقية :/
المصادر: sciencedump ninds.nih.gov medlineplus ua.edu
