عيني بترف وراسي بتلف، وعقلي فاضل له دقيقة ويخف!
كتبت: يارا كمال
الأستاذ نجيب الريحاني لما عينه رفّت قال: ”حاسس بمصيبة جاية لي“ ما أتبعه رد الفنانة ليلى مراد عليه بخوف يصحبه دلال ”يا لطيف يا لطيف!“، ودي بقى واحدة من الخرافات إنك تقلق لما عينك ترف أو تتفائل لما القهوة تتدلق وهكذا. بس في الحقيقة، إن عينك بترف لأسباب تانية غير إنها حاسّة بمصيبة، يعني يؤؤسفني أبلغك إن عين حضرتك معندهاش أي قدرات تنبؤية.
اللي بيحصل إن جفن عينك بيترعش، يعني يا إما الجفن الفوقاني أو التحتاني في عين واحدة بس، أو بمعنى أصح جزء من الجفن كمان، وبتاخد وقت قليل وبتروح (بس ممكن تتكرر لساعات أو أيام أو أكتر)، وممكن ماتاخدش بالك منها وممكن برضه تبقى مزعجة.
هو تشنج عضلي بسيط كده. أكيد حصل لك مرة في حياتك. يعني لو دعكت عينك، هيروح. ممكن الواحد عينه ترف بسبب الكافيين. هو إحنا لحد دلوقتي مانعرفش ايه الآلية اللي بتحصل بيها رفّة العين، بس عمومًا الكافيين بيحث على إفراز ناقلات عصبية مثيرة زي السيراتونين والنورادرينالين، فالكافيين محفّز وبيزوّد التفاعل بين العضلات والأعصاب.
اللي ممكن يعمل رفّة العين دي برضه النوم القليل أوي. ممكن لو نمت مدة أطول، الرفّة دي تروح. الضغط والإنهاك برضه ليهم دور، لإن جسمك وقتها بيفرز أدرينالين أكتر، وده ممكن يسبب انقباضات بسيطة زي اللي بتحصل في جفنك.
فيه ناس حتى بعد ما بيعالجوا مشاكل النوم والضغط عندهم، الرفّة دي بتفضل مستمرة، وفي الحالة دي ممكن يتعالجوا بالبوتوكس، لإنه بيقفل مؤقتًا الارتباط بين العضلات والأعصاب. الرفّة ممكن كمان تيجي من تناول الكحول أو الضوء العالي أو تهيّج سطح العين أو التدخين أو الرياح أو المجهود البدني.
يعني تلاقي أستاذ نجيب كان شارب شوب قهوة أو مش نايم كويس _من الحب بقى_ قبل ما ينزل مع الست ليلى مراد عشان كده عينه كانت بترف، بس برضه قلبك دليلك يا أستاذ نجيب.
أحيانًا الرفّة دي بتسرح على باقي الوش أو الرقبة في شكل انقباضات عضلية، ودي بقى قصة تانية، لما بتبقى في ناحية واحدة من الوش بيسموها ”Hemifacial spasm“. وفي حالة تانية اسمها ”Bletharo spasm“، ودي الجفن كله بيقفل أو بيبربش بشكل لا إرادي. في الحالتين دول أنت محتاج تروح للدكتور. وبرضه تروح له لو الرفّة دي ما راحتش في ظل أسابيع قليلة، أو لوعينك بتقفل مع الرفّة أو لو بتفتحها بصعوبة، أو لو عينك محمرة أو مورّمة أو بتنزّل إفرازات، أو لو جفونك نازلة لتحت.
نادرًا جدًا، لما بتبقى رفّة العين علامة على اضطرابات في المخ والجهاز العصبي زي شلل الوجه النصفي (Bell’s Palsy)، أو خلل التوتر (Dystonia)، وده خلل بيخلي العضلات تنقبض لا إراديًا، أو خلل التوتر العنقي اللي بيخلي عضلات الرقبة تنقبض لا إراديًا وتتلوح، أو التصلب المتعدد وده مرض بيسبب العجز وبيصيب المخ والحبل الشوكي، أو متلازمة توريت وده اضطراب بيسبب حركات تكرارية لا إرادية بدون القدرة على التحكم في الحركات دي.
المصدر:
