“عن حساسية الشمس” قولوا لعين الشمس ماتحماشي؛ أصل عندي حساسية!
كتب: أحمد حسين
مرة وأنا صغير في أحد المصايف سمعت أهلي بيتكلموا عن جيران لينا مابيحبوش ينزلوا البحر إلا بعد العصر تقريبًا علشان ولادهم عندهم حساسية من الشمس. ساعتها أنا مافهمتش يعني إيه حساسية من الشمس، وبعدين افتكرت بقى إن الجيران دول من الناس اللي بيقولوا عليهم ”أعداء الشمس“، وبدأت أتعامل معاهم على هذا الأساس لحد ما اكتشفت إن في مرض اسمه حساسية الشمس لكن مالوش علاقة خالص بعداء الشمس.
حساسية الشمس هو مصطلح غالبًا بيوصف اضطرابات بتحصل للجلد زي الطفح الجلدي والحكّة (الهرش) نتيجة التعرض للشمس. كمان النوع ده من الحساسية بيحصل نتيجة خلل وراثي، أو في بعض الأحيان بتكون نتيجة عامل خارجي من أدوية معينة أو تعرض الجلد لنباتات زي الليمون الحامض مثلًا.
الحساسية مش دايمًا بتكون مؤثرة بشكل كبير، في بعض الحالات بتكون خفيفة وممكن تتحل من غير علاج. بس في حالات أخرى بتحتاج تتعالج بكريمات أو أدوية، ده غير إن الحالات دي ساعات بتحتاج تعمل إجراءات مشددة فيما يخص أنواع الملابس اللي بيلبسوها والمواد اللي بتتعمل منها.
غالبًا بتعرف إن عندك حساسية الشمس لما تحس إن جلدك بيتضرر جدًا من تعرضك للشمس، وبتظهر عليه علامات احمرار وألم وبقع صغيرة وبثور (حبوب) وأحيانا بيحصل التقشر والنزف. طبعًا كل الأعراض دي ممكن تكون بسيطة، لكن لو أصبحت مزعجة وشديدة ومستمرة، فالأفضل إنك تستشير طبيب متخصص فورًا.
طيب تعمل إيه لو عرفت إنك مصاب بحساسية الشمس؟
في شوية خطوات يفضّل إنك تعملهم، منها تجنب التعرض لأشعة الشمس لحد ما أعراض الحساسية تتحسن، ممكن الموضوع ياخد ساعات وممكن ياخد أيام (يوم أو يومين)، كمان حاول تستخدم مرطبات الجلد وبعض المستحضرات الطبية، اللي بتساعد في تخفيف أعراض الحساسية. وزي ما قولنا، كل ده على حسب الحالة نفسها إذا كانت خفيفة أو تحتاج لاستشارة طبيب.
إيه علاقة حساسية الشمس بفكرة أعداء الشمس؟
الحقيقة مالهمش أي علاقة ببعض، لأن ”أعداء الشمس“ أو اللي معظمنا بيطلق عليهم هذا الاسم بيكونوا في الأصل مصابين باضطراب جيني اسمه ”المهق – Albinism“. المهق ده اضطراب بيختفي فيه الميلانين (الصبغة المسئولة عن اللون) من الجسم والشعر والعيون. والاضطراب ده مالوش علاج فهو شيء خِلقي بيتولد الشخص بيه ويفضل معاه لآخر حياته.
طيب ليه بيسموا الشخص الأمهق بأعداء الشمس؟
سبب التسمية دي جيه من كون المصابين بالمهق جلدهم بيكون حساس في تعرضه للشمس، وده بيزود من خطورة إصابتهم بمرض سرطان الجلد لكنهم في النهاية يقدروا يتواجدوا في الشمس بشكل طبيعي عادي.
مشكلتنا بقى إننا مشهورين بحلاوة شمسنا ومن تصاريف القدر برضه إن يكون أكبر عدد من المصابين بحساسية الشمس هما القوقازيين، واللي من ضمنهم إحنا في مصر والشعب العربي كله. فأي حد يحس إن حلاوة شمسنا مش ماشية معاه وبيحس باضطرابات في الجلد، يحاول يتجنب الشمس شوية، لقى مفيش تحسن في الوضع خالص، الأفضل ساعتها يستشير طبيب جلدية!
