.
ليه وإزاي؟

8 حقائق «زائفة» عن النوم!

كتب: أحمد حسين

النوم بالنسبة لي هو تاني أهم حاجة في الحياة لأنه بيحتل نص يومي تقريبًا. فتخيلوا بقى لما تواجهني أنا وغيري مشكلة إن تعدي علينا لحظات الواحد مابيقدرش ينام فيها كويس لأسباب كتير وأحيانًا من غير سبب! ساعتها بنلاقي كمية نصايح كتير علشان ننام، أشهرهم بالنسبة لي ”اشرب لبن دافي وهتعرف تنام”، والحقيقة إنه عمر ما الموضوع ده خلاني عرفت أنام أبدًا، بالعكس ساعات بصحصح أكتر! في كمان نصايح تانية غيرها مرتبطة بالطفولة وغيره، والحقيقة أنا من متبعي منطق انصر نومك ظالمًا أو مظلومًا بس إحنا اتخدعنا كتير يا جماعة!

وعليه في المقال ده هنعرض معلومات كنا فاكرين إنها حقائق عن النوم وطلعت أي كلام للأسف:

1- لازم تنام 8 ساعات علشان جسمك يرتاح

على الرغم من إن كتير من البشر بياخدوا كفايتهم من النوم وبيرتاحوا فعلًا لما بيناموا 8 ساعات لكن في بعض البشر بيرتاحوا لما بيناموا 9 أو 10 ساعات، وفي ناس بيرتاحوا لما يناموا 5 أو 6 ساعات بالكتير. الموضوع مرتبط بعوامل كتير، منها السن والمجهود اللي بتبذله في اليوم وجيناتك نفسها بتتحكم في موضوع النوم. باختصار، مش كل الناس بتحتاج تنام 8 ساعات وبس ماشي!

7012380-photo-clock

2- النهاردة الجمعة؛ أجازة بقى نام زي ما تحب

هو فعلًا أمر مُغري جدًا إنك تنام لمدة كبيرة يوم الجمعة بعد أسبوع طويل من الشغل، لكن ده للأسف بيأثر جدًا على ساعتك البيولوجية (ساعة جسمك الداخلية)، كل وقت بتبدّل فيه ساعات النوم والصحيان جسمك بيتلغبط وبيحس إن في حاجة غلط، لذلك ممكن لما تنام 10 ساعات يوم الجمعة، تصحى تلاقي نفسك حاسس بصداع شديد وفي نفس الوقت عايز تنام تاني! فمضطرين يا جماعة إننا ننام عدد ساعات متوازن (العدد اللي متعودين عليه) في مواعيد مُحددة كل ليلة.

sleeping_cheetah-wide

3- كنت بنام في اليوم تلات ساعات وزي الفل أهوه

في من الأيام كنت بشتغل مع مقاول مقتنع إن عدم النوم هو طريق وصولك للنجاح علشان كده لما كنت بقول له إني بحب أنام من 6 لـ 8 ساعات، كان بيعتبرني مُهمل وبضيع عمري في النوم ومش متحمل مسئولية الدنيا فوق كتافي وحاجات من هذا القبيل، وكان بيتحفني بجملة ”أنا كنت بنام في اليوم تلات ساعات وزي الفُل قدامك أهوه“.

الحقيقة، إنه مابيكونش زي الفُل ولا حاجة، فالحرمان من النوم ممكن مايكونش تأثيره مباشر أو سريع لكنه بيظهر مع مرور الزمن، زي إنه يأثر على الشخص فيرفع من معدلات إصابته بمرض زي السكري وأمراض القلب والسِمنة المفرطة وحتى الجلطات. فاللي بيحرم نفسه من النوم مش زي الفُل ولا حاجة، هو بيكون بس لسه مش عارف إنه مش زي الفُل.

اعرف أكتر| آثار الحرمان من النوم على الجسم – إنفوجراف

uncomfortable_sleeping

4- شرب اللبن الدافي هيخليك تنام

طبعًا دي المعلومة الزائفة المحببة لنفسي، بس ليه الناس قالوا على اللبن الدافي إنه بيخليك تنام؟ المعلومة دي ظهرت لما الناس عرفوا إن اللبن بيحتوي على مادة التريبتوفان، ودي مادة جسمنا بيحولها لهرمون اسمه السيراتونين، واللي بيكون مؤثر في تهدئة الأعصاب والنوم.

الفكرة بقى إن اللبن بيكون فيه نسبة قليل من المادة دي، يعني باختصار ممكن يساعدك على الاسترخاء فعلًا، بس لو ماكانش عندك استعداد للنوم مش هتنام، إلا لو أخدت قبلها دش سخن كده يفك العضلات ويخليك تسترخي تماما، ساعتها ممكن اللبن يساعد على النوم، وبرضه كله على حسب استعداد جسمك وعقلك للنوم.

Milk-Wallpapers-1

5- ساعتين الضهر اللي بتنامهم دول هيبوظوا يومك

هو الموضوع ده معقد شوية. يعني لو نمت في نص اليوم لمدة كبيرة أكتر من اللي إنت محتاجها ممكن فعلًا المدة دي تبوظ لك اليوم. لكن العلماء قالوا إن النوم لمدة من 10 دقائق لساعة في نص اليوم، هيخليك منتبه أكتر خلال اليوم، زائد إن النوم في نص اليوم ده كويس لذاكرتك ولأدائك العقلي.

3042725-poster-p-1-how-to-sleep-in-uncomfortable-unavoidable-situations

6- عِد من 1 لحد 100 عشان تنام. استغماية هيّ!

لو عندك مشاكل مع النوم ومابتعرفش تدخل فيه بسهولة، فإنت بالتأكيد قابلت شخص واحد في حياتك نصحك بإنك تعد من 1 لـ 100، والموضوع ده فعلًا ممكن يخليك تنام، بس هو فعليًا مابيكونش له لازمة لما مابيكونش عندك استعداد للنوم. في دراسة تمت على بعض الناس اللي بيعانوا من الأرق، العلماء اكتشفوا إنهم لما بيعدّوا عقلهم بينتبه أكتر وممكن يركزوا مع العد ومايناموش. ساعتها العلماء نصحوهم إنهم يتخيلوا صور لأماكن هادئة، وده فعلًا خلاهم يرتاحوا وساعد البعض منهم إنه يدخل في النوم أكتر من موضوع العد ده.

sheep_0

7- لما بتتبنّج بتكون نايم

مش معنى إنك فاقد الوعي تبقى نايم. في الوقت اللي بتكون فيه تحت تأثير البنج بتكون فاقد الوعي، فالمخ مش بيرسل إشارات عصبية لأي جزء من جسمك، وده مابيحصلش وإنت نايم خالص. وأنت نايم مخك وحواسك شغالين عادي، لأن لو الكلام ده صح فمحاولات إنك تصحي أخوك من النوم مثلا عن طريق إنك تخبطه في كتفه مثلًا هتفشل كلها!

14572812072154-anesthesia

8- اللي عنده أرق مابيعرفش ينام خالص

الأرق هو واحد من إضطرابات النوم المشهورة وهو اضطراب بيصيب الإنسان وبيخليه ينام بصعوبة أو بشكل مُتقطع. وبالرغم من شهرته دي إلا إنه فعلًا في ناس كتير فاكرين إن الأرق معناه إنك تفضل صاحي لفترة طويلة جدًا من غير نوم، وده طبعًا كلام خاطيء. نسبة 1 من كل 3 أمريكان بيعانوا من إضطراب اسمه الأرق المُعتدل، بمعنى إنهم بيناموا فعلًا بس بيقلقوا كتير وهما نايمين ويصحوا كتير، أو يناموا ويصحوا عادي جدًا بس مايحسوش إنهم أخدوا كفايتهم/راحتهم من النوم ده.

اعرف أكتر| 8 مشاكل صحية ممكن تحصلك بسبب قلة النوم

3025086-poster-p-1-how-to-turn-your-insomnia-into-a-productivity-tool


المصادر: businessinsider  businessinsider  businessinsider  businessinsider  nytimes  ncbi.nlm.nih.gov  clinph-journal  nytimes  ncbi.nlm.nih.gov  sleepfoundation

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى