سيكولوجيا الحب: 8 أسباب نفسية للوقوع في الحب
كتب: أحمد حسين
كل شخص فينا له وجهة نظر في الحب، وجهة نظر بتكون في الغالب ذاتية تمامًا، سواء كانت ليها علاقة بتجارب سابقة أو حالية أو حتى من غير أي تجارب أصلًا. بس عمومًا، وبغض النظر عن تصوراتنا عن الحب، إلا إننا ماعندناش تصوّر واضح عن فكرة الإعجاب، أو إحنا بنُعجب ليه بشخص مُعين؟
العلم له أكتر من زاوية متعلقة بالموضوع ده. في زوايا مختصة بالشِق الإجتماعي والثقافي مثلًا، زي إن الطرفين يكونوا بيشتركوا في نفس وجهة النظر والخبرات. في شِق تاني، متعلق بالإعجاب المباشر عن طريق الريحة والطول وأشياء من هذا القبيل.
اعرف أكتر عن السبب الرئيسي لوقوعنا في الحب من هنا
بس عمومًا يعني، إحنا كائنات ميّالة للحب، أيًا كان الدافع إيه. ممكن يكون الدافع بيولوجي، ممكن يكون سيكولوجي، فإحنا ممكن نسيب الدافع الأول، ونتكلم أكتر عن الدافع التاني، سيكولوجيا الحب، أو ماذا يمكن أن تخبرك السيكولوجيا عن الحب.
قوانين سيكولوجيا الحب
1- فولة واتقسمت نُصّين:
أفلاطون كان عنده تصوّر عن الحب، سمعه من الكاتب المسرحي الهزلي أريستوفان، بيقول إن الناس اتخلقوا زمان نصيّن في جسد واحد، نص راجل ونص ست، بس بعد فترة، أغضبوا زيوس (إله الآلهة)، فقرر يعاقبهم بإنه يفصلهم عن بعض. لذلك، كل راجل وست ماشيين في الدنيا بيدوروا على نصهم التاني.
سيكولوجيا الحب بتقول حاجة شبه كده، الناس بيميلوا لإنهم يعجبوا أو يحبوا الناس اللي بيشوفوا إنهم شبههم، أو ممكن يُمثلوا نصهم التاني. ده بيتحدد عن طريق إنهم بيشتركوا في نفس القيم، وخبرات الحياة، والكثير من الأراء والتصورات.
2- إنت شبه بابا، إنتي شبه ماما!
أنا عارف إن الموضوع غريب، بس سيكولوجيا الحب بتقترح، إن الأشخاص ممكن يميلوا لبعض، بسبب إنهم بيفكروا بعض بأهلهم. يعني إيه؟ يعني إنت ممكن تحب واحدة علشان بتفكرك بمامتك، خصوصًا لو إنت يعني بتحب مامتك، والعكس صحيح البنت ممكن تحب حد يشبه باباها. طبعًا الكلام ده غير مطروح لو إنت بتكره مامتك وهي بتكره باباها.. ولو في احتمالية لحدوثه هتبقى بشكل بسيط يعني.
3- ريحتك حلوة.. دي ريحة الحبايب؟
في بعض الأدلة العلمية، بتقول إن الريحة ليها يد في موضوع الحب ده. القصد مش إنه الريحة تكون حلوة أو وحشة، القصد إن في شخص ممكن يعجب بشخص آخر بسبب ريحته. كمثال يعني، الستات في فترة التبويض بيميلوا أكتر للرجالة اللي ريحيتهم تيستوستيرون! مش بس كده، ده كمان العلم بيقترح إن بعض الرجالة بيميلوا للستات في فترات الدورة الشهرية.
4- نظرية الباب موارب
سيكولوجيا الحب بتقترح، إن الأشخاص اللي بيسيبوا الباب موارب، لا مفتوح ولا مقفول في وش الحب، بيكونوا أكثر جاذبية من غيرهم. ده حسب سيكولوجيا الحب يعني.
5- الطول بيفرق برضه
فكرة إن الشخص يكون طويل أو قصير دي ممكن تخلي حد يُعجب بيه، يعني في ناس بتحب الشخص الطويل. حقهم طبعًا لهم مُطلق الحرية، زي ما الناس اللي بيحبوا الشخص القصير أحرار، فيعني كل بيحب يختار المفضّل بالنسبة له.
6- الخوف كموصّل جيّد للحب
إنك تشارك في تجربة مخيفة مع الشخص اللي إنت مُعجب بيه أو يعني بتحاول تطوّر الإعجاب ده لشئ أكبر، شيء بيعتبر محفّز جدًا على فكرة إن الشخص الأخر يفكر فيك كمان كشخص ممكن يُعجب بيه أو يحبه.
7- ساكن في حي السيدة، وحبيبي ساكن في الحُسين!
لو إنت والشخص اللي مُعجب بيه، ساكنين جنب بعض، يبقى في الأغلب يعني هتتقابلوا، وده ممكن يخليكوا تطوّروا الإعجاب ده لحب. طبعًا كلام عبد المُطلب ده، عن الناس اللي بيحبوا بعض، لكن هو رايح من السيدة لسيدنا الحُسين علشان ينول الرضا في الأساس يعني.
8- ضحكت؟ يعني قلبها مال!
هي مش بالضرورة يعني أي بنت تضحك لولد أو العكس يبقى قلب حد فيهم مال للتاني أو لا سمح الله عملها، الموضوع مالوش أي علاقة خالص. بس سيكولوجيا الحب بتقترح، إن الشخصيتين اللي بيبقوا عارفين بينهم وبين نفسهم، إن في إعجاب متبادل مابينهم، بيكونوا غالبًا مبتسمين لبعض طول الوقت، يعني لما بيبصوا لبعض في الغالب لازم يبتسموا. هنا بقى ممكن نقول إنهم طالما ضحكوا، يبقى قلبهم مال فعلًا 😀
المصدر: businessinsider
